ប្រធានាធិបតីបារាំងបំពេញទស្សនកិច្ចក្នុងប្រទេសរូម៉ានី និងម៉ុលដាវីដែលជាប់ព្រំដែនអ៊ុយក្រែន
ប្រធានាធិបតីបារាំងលោកអេម៉ានុយអែល ម៉ាក្រុងបំពេញទស្សនកិច្ចនៅក្នុងប្រទេសរូម៉ានីនាថ្ងៃអង្គារ ទី១៤ មិថុនា និងនៅក្នុងប្រទេសម៉ុលដាវីនាថ្ងៃពុធ ទី១៥ មិថុនា។ នៅក្នុងបរិបទនៃសង្រ្គាមរុស្ស៊ីឈ្លានពានអ៊ុយក្រែន រូម៉ានី និងម៉ុលដាវីដែលមានព្រំដែនជាប់អ៊ុយក្រែនជាប្រទេសដែលកំពុងប្រឈមនឹងសង្រ្គាមមួយនេះខ្លាំងជាងគេ។ ទីកន្លែងដែលលោកម៉ាក្រុងត្រូវទៅមុនគេនៅក្នុងទឹកដីរូម៉ានី គឺមូលដ្ឋានយោធាមួយដែលមានវត្តមានទ័ពបារាំង និងទ័ពបែលហ្សិកដែលជាកម្លាំងទ័ពក្នុងក្របខណ្ឌអង្គការអូតង់។
ចុះផ្សាយនៅថ្ងៃ៖
ស្តាប់ - ០២:១៥
មូលដ្ឋានយោធាក្នុងទឹកដីរូម៉ានីដែលលោកម៉ាក្រុងបំពេញទស្សនកិច្ចមានឈ្មោះ មីហាអ៊ីល-កូហ្កឺនីចានូ (Mihail-Kogalniceanu) ស្ថិតក្បែរ កំពង់ផែដ៏ធំនៅសមុទ្រខ្មៅឈ្មោះ កុងស្តង់ចា (Constanta)។ មានទាហានអូតង់ចំនួន ៨០០នាក់កំពុងឈរជើងនៅមូលដ្ឋានយោធាមីហាអ៊ីល-កូហ្កឺនីចានូ ក្នុងនោះមានទាហានបារាំងចំនួន ៥០០នាក់ដែលជាកម្លាំងប្រតិកម្មរហ័សរបស់អង្គការអូតង់។ ចំនួនទាហានអូតង់នៅលើមូលដ្ឋានយោធាមួយនេះនឹងកើនដល់ ១ ០០០នាក់នៅដំណាច់ឆ្នាំ ២០២២ នេះ។ នៅក្រោយការសួរសុខទុក្ខទាហានបារាំង លោកម៉ាក្រុងចូលជួបនាយករដ្ឋមន្រ្តីរូម៉ានី និងត្រឡប់ទៅស្រស់ស្រូបអាហារពេលល្ងាចនៅមូលដ្ឋានយោធាដដែលនោះវិញ។
នៅថ្ងៃបន្ទាប់ក្នុងថ្ងៃពុធ ទី១៥ មិថុនា លោកម៉ាក្រុងនឹងមានកិច្ចសន្ទនាជាមួយប្រធានាធិបតីរូម៉ានីលោកខ្លៅ យោហានីស។ ប្រធានបទដែលលោកម៉ាក្រុង និងលោកយោហានីសនឹងលើកយកទៅជជែករួមមាន សង្រ្គាមរុស្ស៊ីឈ្លានពានអ៊ុយក្រែន ឬមួយក៏សំណើសុំចូលជាសមាជិកសហភាពអឺរ៉ុបរបស់ប្រទេសអ៊ុយក្រែន ហ្សកហ្ស៊ី និងម៉ុលដាវីដែលក្រុមប្រឹក្សាអឺរ៉ុបនឹងលើកយកទៅសិក្សានៅសប្តាហ៍ក្រោយ។ បន្ទាប់មកក្នុងថ្ងៃពុធ ទី១៥ មិថុនាដដែល ប្រធានាធិបតីបារាំងបន្តដំណើរទៅកាន់ម៉ុលដាវីដែលជាប្រទេសមួយទៀតកំពុងប្រឈម និងកំពុងស្គាល់អស្ថិរភាពដោយសារសង្រ្គាមនៅអ៊ុយក្រែន។
នៅម៉ុលដាវី លោកម៉ាក្រុងនឹងចូលជួបប្រធានាធិបតីលោកស្រីម៉ាយ៉ា សានឌូដែលមានជំហរគាំទ្រអឺរ៉ុប។ គឺជាឱកាសមួយដែលលោកម៉ាក្រុងបញ្ជាក់ពីការគាំទ្ររបស់បារាំងចំពោះម៉ុលដាវីដែលជាប្រទេសតូច និងជាប្រទេសក្រីក្រជាងគេមួយអឺរ៉ុប។ តែគេមិនត្រូវភ្លេចនិយាយទេថា ម៉ុលដាវីកំពុងទទួលជនភៀសខ្លួនអ៊ុយក្រែនជិត ១០០ ០០០នាក់ឲ្យជ្រកកោន។ ក្នុងពេលមានវត្តមាននៅរូម៉ានី និងម៉ុលដាវីដែលជាប្រទេសមានព្រំដែនជាប់អ៊ុយក្រែនពេលនេះ តើលោកម៉ាក្រុងអាចឆ្លៀតទៅបំពេញទស្សនកិច្ចនៅអ៊ុយក្រែនដែរ ឬទេ?។ វិមានប្រធានាធិបតីបារាំងអេលីហ្សេបន្តមិនបញ្ជាក់ និងមិនបដិសេធដោយត្រឹមឆ្លើយថា មានជម្រើសច្រើនកំពុងធ្វើការសិក្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ