សង្រ្គាមអ៊ុយក្រែន៖ អង្គការការពារសិទ្ធិមនុស្សHRWបរិហារុស្ស៊ីថាបានរំលោភច្បាប់សង្រ្គាម
ការជំនុំជម្រះដោយមិនស្មើភាព ទៅលើអ្នកទោសឈ្លើយសឹកសង្រ្គាម គឺជាបទឧក្រិដ្ឋកម្មសង្រ្គាម។ អ្នកនាំពាក្យរបស់ឧត្តមស្នងការសិទ្ធិមនុស្សរបស់អង្គការសហប្រជាជាតិ បាននិយាយរំលឹកយ៉ាងដូច្នេះ នៅបន្ទាប់ពីតុលាការរបស់ពួកឧទ្ទាមរុស្ស៊ី និយមសម្រេចផ្តន្ទាទោស ប្រហារជីវិតទាហានបរទេសបីរូប កាលពីព្រហស្បតិ៍ទី ៩មិថុនា។ នៅថ្ងៃសុក្រទី ១០មិថុនា អង្គការការពារសិទ្ធិមនុស្សHuman Right Watchបានចេញផ្សាយរបាយការណ៍ស៊ើបអង្កេតមួយស្តីពីការវាយប្រហាររបស់កងទ័ពទៅលើក្រុងឆេនៀវ Tchernihiv ដែលស្ថិតនៅចម្ងាយ១២០គីឡូម៉ែត្រពីរដ្ឋធានីកៀវ។ ក្រុងឆេនៀវធ្លាប់ត្រូវកងទ័ពរុស្ស៊ី ឡោមព័ទ្ធពេញមួយខែមីនាកន្លង។ បន្ទាប់ពីបានចុះទៅដល់កន្លែងកើតហេតុ នៅខែមេសា និងបានប្រមូលភស្តុតាង និងរូបភាពផ្កាយរណបជាច្រើន អង្គការការពារសិទ្ធិមនុស្សអាចបញ្ជាក់ថា រុស្ស៊ីបានរំលោភអនុសញ្ញា កំពុងចូលជាធរមាន ព្រោះរុស្ស៊ី បានសម្លាប់ប្រជាជនស៊ីវិល។ យើងស្តាប់លោកស្រីប៊ែលគី វីឡេ Belkis Wille អ្នកស៊ើបអង្កេតម្នាក់របស់អង្គការ Human Right Watch ដែលបានចុះស៊ើបអង្កេតផ្ទាល់នៅទីក្រុងឆេនៀវ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៩
“មិត្តរួមការងារ និងខ្ញុំបានចំណាយពេលយ៉ាងតិចមួយសប្តាហ៍ នៅ ឆេនៀវ ដើម្បីស៊ើបអង្កេតលើការវាយប្រហារកាលពីខែមេសា។ បន្ទាប់មក យើងបានចំណាយពេលដ៏ច្រើនទៅលើការវិភាគ គ្រប់មុខ ដែលមានតាំងពីរូបភាពផ្កាយរណប រូបថត វីដេអូដែលគេបង្ហោះនៅលើអ៊ីនធ័រនែត។ ធ្វើដូច្នេះ គឺដើម្បីទទួលបានរូបភាពពេញលេញ បន្ថែមពីការស៊ើបអង្កេតផ្ទាល់ នៅកន្លែងកើតហេតុ ដូចជានៅឆេនៀវ និងបន្ថែមពីលើការអះអាងរបស់សាក្សី ដែលយើងបានជួបសម្ភាសន៍។
ការវាយប្រហារមួយចំនួន ដែលយើងបានស្រាវជ្រាវ បានបង្ហាញយ៉ាងច្បាស់ក្រឡែតពីការរំលោភច្បាប់សង្រ្គាម។ ឧទាហរណ៍ ការវាយប្រហារទៅលើទីតាំងមួយកន្លែង បានសម្លាប់ប្រជាជនស៊ីវិល ៤៧នាក់។ នៅក្នុងតំបន់ដែលរងការវាយប្រហារនោះ យើងមិនបានឃើញ ទីតាំងយោធាអ៊ុយក្រែន ដែលអាចជាផ្ទាំងស៊ីបនោះទេ។ ប្រតិបត្តិការរបៀបនេះ គឺជាប្រភេទប្រតិបត្តិការដែលអ្នកស្រាវជ្រាវ របស់តុលាការព្រហ្មទណ្ឌអន្តរជាតិ ឬរដ្ឋអាជ្ញាអ៊ុយក្រែន ក៏ដូចជារបស់ប្រទេសអឺរ៉ុបចង់ស៊ើបអង្កេត ហើយនិងអាចចង់ស្វែងរកអ្នកទទួលខុសត្រូវដែលបានបញ្ជាឲ្យមានការវាយប្រហារយ៉ាងដូច្នេះ”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ