សង្រ្គាមអ៊ុយក្រែន៖ លោកពូទីនគំរាមថា អ្វីៗនៅមិនទាន់ចាប់ផ្តើមមែនទែននៅឡើយទេ
ខណៈពេលដែលទីក្រុងរបស់អ៊ុយក្រែន នៅតំបន់ដុនបាស់ កំពុងរងការវាយប្រហារកាន់តែសន្ធប់ពីសំណាក់កងទ័ពរុស្ស៊ី លោកប្រធានាធិបតី ពូទីន បានគំរាមក្រុមប្រទេសខាងលិច ថា រុស្ស៊ីនៅមិនទាន់ចាប់ផ្តើមអ្វីៗមែនទែននៅឡើយទេ នៅអ៊ុយក្រែន។ នៅថ្ងៃសុក្រ រដ្ឋមន្រ្តីការបរទេសរុស្ស៊ីបានដើរចេញពីកិច្ចប្រជុំក្រុមប្រទេស G20 នៅទីក្រុងបាលី ជាទីដែលប្រមុខការទូតអាមេរិក និងអឺរ៉ុបរិះគន់ខ្លាំងៗ ប្រទេស រុស្ស៊ី ក្នុងរឿងធ្វើសង្រ្គាមឈ្លានពានអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៩
ប្រមុខការបរទេសរុស្ស៊ី លោកស៊ែរហ្គេយ ឡាវរ៉ូវបានងើបដើរចេញពីបន្ទប់ប្រជុំG20 នៅពេលរដ្ឋមន្រ្តីការបរទេសអាល្លឺម៉ង់ឡើងនិយាយរិះគន់រុស្ស៊ីក្នុងរឿងធ្វើសង្រ្គាមនៅ អ៊ុយក្រែន។ កិច្ចប្រជុំថ្នាក់រដ្ឋមន្រ្តីការបរទេសរបស់ក្រុមប្រទេសG20 ដែលមានឥណ្ឌូណេស៊ីជាម្ចាស់ផ្ទះបានបើកទ្វារជាមួយសេចក្តីអំពាវនាវរបស់រដ្ឋមន្រ្តីការបរទេសរបស់ឥណ្ឌូណេស៊ី ដើម្បីឲ្យគេដោះស្រាយជម្លោះនៅលើតុចរចា ជាជាងការធ្វើសង្រ្គាមនៅសមរភូមិ ដែលកំពុងជះផលអាក្រក់នៅក្នុងពិភពលោក ដូចជាទៅលើបញ្ហាស្បៀង ថាមពល និងថវិកា។ ដាក់ខ្លួន ជាប្រទេសអព្យាក្រឹត ឥណ្ឌូណេស៊ីអញ្ជើញរដ្ឋមន្រ្តីការបរទេសរុស្ស៊ីឲ្យចូលរួមផ្ទាល់ក្នុងកិច្ចប្រជុំ G20 ទោះបីមានការប្រឆាំងរបស់អាមេរិក។
តាមមន្រ្តីការទូតជាច្រើនដែលដកស្រង់សំដីដោយទីភ្នាក់ងារព័ត៌មានបារាំង AFP រដ្ឋមន្រ្តីការបទេសរុស្ស៊ី អវត្តមានផងដែរ នៅក្នុងកិច្ចប្រជុំដែលមានបទអន្តរាគមន៍របស់រដ្ឋមន្រ្តីការបរទេសអ៊ុយក្រែន និងរបស់រដ្ឋមន្រ្តីអាមេរិក ដែលបានបរិហាររិះគន់រុស្ស៊ីថា ជាអ្នកទទួលខុសត្រូវ នៃការផ្ទុះឡើងវិបត្តិស្បៀង និងថាមពលក្នុងពិភពលោក និងបានទាមទារឲ្យរុស្ស៊ីបើកផ្លូវឲ្យគេនាំចេញស្រូវសាលីអ៊ុយក្រែនឡើងវិញ។
ឆ្លើយតបទៅវិញ ប្រមុខការបរទេសរុស្ស៊ីនិយាយថា លោកនឹងមិនរត់តាមអាមេរិកដើម្បី សុំឲ្យមានការចរចា និងថា ក្រុមប្រទេសលោកខាងលិចបានប្រើវេទិកាG20ដើម្បីចោទប្រកាន់រុស្ស៊ី ប៉ុន្តែ មិនមែនក្នុងគោលដៅដោះស្រាយវិបត្តិធំៗរបស់ពិភពលោក។
សម្រាប់រដ្ឋមន្រ្តីការបរទេសអាល្លឺម៉ង់ ការងើបដើរចេញពីបន្ទប់ប្រជុំរបស់ប្រមុខការបរទេសរុស្ស៊ី ស្តែងឲ្យកាន់តែច្បាស់ពីអាកប្បកិរិយារបស់រុស្ស៊ីដែលមិនចង់ចរចា ដើម្បីបិទបញ្ចប់វិបត្តិស្បៀងក្នុងពិភពលោក។
នៅក្នុងកិច្ចប្រជុំជាមួយសមាជិកសភារុស្ស៊ី កាលពីថ្ងៃព្រហស្បតិ៍ ប្រធានាធិបតីរុស្ស៊ី លោកពូទីនបាននិយាយថា រុស្ស៊ីមិនបដិសេធការចរចាដើម្បីសន្តិភាព ប៉ុន្តែ លោកនៅបានគំរាមអ្នកដែលបដិសេធការចរចាជាមួយរុស្ស៊ី ថា បើសិនគេចេះតែពន្យារពេល នោះគេកាន់តែពិបាកក្នុងការចរចាជាមួយរុស្ស៊ី។
ដោយនិយាយយោងទៅដល់សហរដ្ឋអាមេរិក និងបណ្តាប្រទេសអឺរ៉ុបដែលផ្តល់សព្វាវុធដល់អ៊ុយក្រែន ដើម្បីទប់ទល់នឹងកងទ័ពរុស្ស៊ី លោកពូទីនបានផ្គើនដាក់ក្រុមប្រទេសលោកខាងលិចថា រុស្ស៊ីនៅមិនទាន់ចាប់ផ្តើមអ្វីមែនទែននៅឡើយទេ នៅអ៊ុយក្រែន។
នៅលើទីតាំងសមរភូមិប្រយុទ្ធនៅ តំបន់ដុនបាស់ ភាគខាងកើតអ៊ុយក្រែន កងទ័ពរុស្ស៊ីបានដណ្តើមទឹកដីកាន់តែច្រើន និងបានបង្កើនការវាយប្រហារ បាញ់បំផ្លោងទៅលើទីក្រុង ដែលនៅសេសសល់ ស្ថិតក្រោមការគ្រប់គ្រងរបស់អ៊ុយក្រែន។ កងទ័ពអ៊ុយក្រែន ដែលបានដកខ្លួនថយ បណ្តើរៗ ដោយសារការវាយប្រហារដ៏សន្ធប់របស់កងទ័ពរុស្ស៊ី បានចោទប្រកាន់រុស្ស៊ីថា បានបាញ់ដោយចេតនាសំដៅផ្ទះសម្បែង និងសម្លាប់របស់ប្រជាជនស៊ីវិល នៅទីក្រុងក្រាម៉ូតូស្ក៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ