វត្តមានរុស្ស៊ីនៅក្នុងកិច្ចប្រជុំ G២០ កំពុងធ្វើឲ្យមានភាពចម្រូងចម្រាសនៅក្នុងចំណោមប្រទេសសមាជិក
ប្រទេសឥណ្ឌូណេស៊ីធ្វើជាម្ចាស់ផ្ទះរៀបចំកិច្ចប្រជុំថ្នាក់រដ្ឋមន្រ្តីការបរទេសនៃក្រុមប្រទេស G២០ រយៈពេល ២ថ្ងៃដោយចាប់ផ្តើមនៅថ្ងៃព្រហស្បតិ៍ ទី៧ កក្កដានេះ។ សង្រ្គាមរុស្ស៊ីឈ្លានពានអ៊ុយក្រែនជាប្រធានបទក្តៅ ខណៈដែលរុស្ស៊ីមានវត្តមាននៅក្នុងកិច្ចប្រជុំ។ អាមេរិកសង្ឃឹមមានដំណោះស្រាយឲ្យវិបត្តិអ៊ុយក្រែន ហើយបារាំងរង់ចាំពីការប្រឈមមុខត តាំងតឹងតែងជាមួយរុស្ស៊ីនៅក្នុងកិច្ចប្រជុំ។
ចុះផ្សាយនៅថ្ងៃ៖
ស្តាប់ - ០២:១២
ប្រភពការទូតបារាំងបានបញ្ជាក់ក្នុងថ្ងៃព្រហស្បតិ៍ ទី៧ កក្កដាពីការរង់ចាំនូវការប្រឈមមុខតឹងតែងជាមួយរុស្ស៊ីតាមរយៈវត្តមានរបស់ប្រមុខការទូតរុស្ស៊ីលោកស៊ែរហ្កី ឡារ៉ូស្វនៅក្នុងកិច្ចប្រជុំ។ តាមប្រភពដដែល រុស្ស៊ីបានស្ម័គចិត្តចូលរួមនៅក្នុងកិច្ចប្រជុំដោយខ្លួនឯង ខណៈដែលរុស្ស៊ីបានរំលោភបំពានលើគោលការណ៍សំខាន់ៗរបស់ G២០។ គោលការណ៍សំខាន់ៗទាំងនេះរួមមាន កិច្ចសហប្រតិបត្តិការ កិច្ចសន្ទនា និងការដោះស្រាយបញ្ហាដោយសន្តិវិធី ពោលមិនមែនប្រើកម្លាំងបាយទេ។
គួរបញ្ជាក់ថានៅក្នុងក្រុមប្រទេស G២០ មានក្រុមប្រទេសមហាអំណាចឧស្សាហកម្មទាំង ៧ និងក្រុមប្រទេសដែលកំពុងមានសេដ្ឋកិច្ចរីកលូតលាស់ខ្លាំងដូចជាចិន ឬឥណ្ឌា។ តែនៅក្នុងបរិបទនៃសង្រ្គាមរុស្ស៊ីឈ្លានពានអ៊ុយក្រែនដែលកំពុងបន្តមានសព្វថ្ងៃ ប្រទេសសមាជិក G២០ មានជំហរមិនដូចគ្នាទេ។ នៅម្ខាង ក្រុមបស្ចិមលោកបានពួតដៃគ្នាបរិហារ និងដាក់ទណ្ឌកម្មចាស់ដៃប្រឆាំងរុស្ស៊ី។ ចំណែកនៅម្ខាងទៀត មានប្រទេសខ្លះព្យាយាមមិនបរិហាររុស្ស៊ី និងមិនដើរតាមផ្លូវរបស់បស្ចិមលោក ដូចយ៉ាងចិន ឥណ្ឌា ឬអាហ្រ្វិកខាងត្បូង។
អ៊ីចឹងហើយបានជាវត្តមានរុស្ស៊ីនៅក្នុងកិច្ចប្រជុំបានធ្វើឲ្យមានការខ្វែងគំនិតគ្នានៅក្នុងចំណោមប្រទេសសមាជិក G២០។ ប្រភពការទូតបារាំងបានបញ្ជាក់ថា វត្តមានរុស្ស៊ីនៅក្នុងកិច្ចប្រជុំប្រហែលមិនអនុញ្ញាតឲ្យកិច្ចប្រជុំ G២០ ថ្នាក់រដ្ឋមន្រ្តីការបរទេសអាចចេញសេចក្តីថ្លែងការណ៍រួមបានទេ ពិសេសទាក់ទងនឹងសង្រ្គាមរុស្ស៊ីឈ្លានពានអ៊ុយក្រែន។ ចំណែកអាមេរិកសង្ឃឹមថា វត្តមានរុស្ស៊ីនៅក្នុងកិច្ចប្រជុំនឹងអាចអនុញ្ញតឲ្យមានភាពចម្រើនទៅមុខនៅក្នុងការចរចាស្តីពីវិបត្តិអ៊ុយក្រែន។
យ៉ាងណាក៏ដោយ ប្រមុខការទូតអាមេរិក និងប្រមុខការទូតបារាំងបានបញ្ជាក់ពីការមិនជួបសន្ទនាជាមួយប្រមុខការទូតរុស្ស៊ី។ តែប្រមុខការទូតអាមេរិកបានប្រាប់ពីការមានជំនួបជាមួយប្រមុខការទូតចិនដើម្បីនិយាយពីភាពតានតឹងរវាងចិន និងអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ