ដើម្បីធានាកំណើនសេដ្ឋកិច្ច ជប៉ុនត្រូវការកម្លាំងពលករអន្តោប្រវេសន៍ ៤ដងនៃចំនួនសព្វថ្ងៃ
ប្រឈមនឹងការធ្លាក់ថយចុះនៃកម្លាំងពលកម្មដោយសារភាពចាស់រិចរឹលនៃប្រជាសាស្រ្ត ជប៉ុនត្រូវការកម្លាំងពលកម្មបរទេសបន្ថែម ដល់ទៅ ៤ដង ដើម្បីអាចសម្រេចគោលដៅ សេដ្ឋកិច្ចរបស់រដ្ឋាភិបាល។ តាមការសិក្សារបស់ក្រុមវិទ្យាស្ថាន សិក្សាសាធារណៈ ដែលត្រូវបានចុះផ្សាយកាលពីថ្ងៃព្រហស្បតិ៍ទី ៣កុម្ភៈ ពីពេលនេះ ដល់ឆ្នាំ ២០៤០ ជប៉ុនត្រូវការពលករអន្តោប្រវេសន៍ជាង៦លាននាក់ដើម្បីអាចធានាកំណើនសេដ្ឋកិច្ចជាមធ្យម ១,២%ក្នុងមួយឆ្នាំ។
ចុះផ្សាយនៅថ្ងៃ៖
ស្តាប់ - ០២:៣៨
ការសិក្សារបស់ក្រុមវិទ្យាស្ថានសាធារណៈ បានបង្ហាញពីតម្រូវការចាំបាច់នៃពលករអន្តោប្រវេសន៍ សម្រាប់ដោះស្រាយវិបត្តិកម្លាំងពលកម្មធ្លាក់ចុះនៅជប៉ុន ដែលបណ្តាលមកពីភាពចាស់រិចរឹលនៃប្រជាសាស្រ្តជប៉ុន។ ជារួម ក្នុងរយៈពេល១៨ឆ្នាំ ទៅមុខ ជប៉ុនត្រូវបង្កើនចំនួនពលករអន្តោប្រវេសន៍ របស់ខ្លួន ឲ្យបាន៤ដង ឲ្យដល់ចំនួន ៦,៧៤លាននាក់ ពីពេលនេះ ដល់ឆ្នាំ ២០៤០ បើសិនជប៉ុនចង់សម្រេចគោលដៅកំណើនសេដ្ឋកិច្ច ជាមធ្យម ១,២%ក្នុងមួយឆ្នាំ។
ជប៉ុនសព្វថ្ងៃ មានពលករអន្តោប្រវេសន៍ តែជាង ១,៧២លាននាក់ប៉ុណ្ណោះ ដែលតំណាងឲ្យ២,៥%នៃកម្លាំងពលកម្មក្នុងស្រុកសរុប។ សម្រាប់ប្រធានទីភ្នាក់ងារសហប្រតិបត្តិការអន្តរជាតិនៃប្រទេសជប៉ុនJICA ដែលបានចូលរួម ក្នុងការសិក្សាខាងលើ ជប៉ុន ត្រូវប្រញាប់ចាត់វិធានការបន្ទាន់ដើម្បីស្រូបយកពលករបរទេស ព្រោះថា នាពេលអនាគត ជប៉ុននឹងអាចជួបការប្រកួតប្រជែងជាមួយប្រទេសដូចជាចិន ដែលត្រូវការពលករអន្តោប្រវេសន៍សម្រាប់តម្រូវការសេដ្ឋកិច្ចក្នុងស្រុក។
ការសិក្សាចុះផ្សាយកាលពីថ្ងៃព្រហស្បតិ៍បានបង្ហាញដែរថា កម្លាំងពលកម្មក្នុងស្រុកជប៉ុននឹងធ្លាក់ចុះ ជាង ១០% នៅ២ទសវត្សរ៍ខាងមុខ។ មូលហេតុសំខាន់មួយ នោះ គឺ ចាប់តាំងពីឆ្នាំ ២០០៨ ចំនួនប្រជាជនជប៉ុនបានធ្លាក់ថយចុះ ជារៀងរាល់ឆ្នាំ មកនៅ ត្រឹម ១២៥លាននាក់ គិតត្រឹមឆ្នាំមុន។ ចំនួនប្រជាជនវ័យចំណាស់ដែលផុតអាយុធ្វើការបានកើនឡើងខ្ពស់ ចំណែកឯចំនួនក្មេងដែលនឹងត្រូវចូលខ្លួនមកជំនួសកម្លាំងពលកម្មក៏មានការធ្លាក់ចុះ។
ដើម្បី ប៉ះប៉ូវ បង្រ្គប់កម្លាំងពលកម្មក្នុងស្រុក ប្រធានអង្គការJICA បានអំពាវនាវឲ្យរដ្ឋាភិបាលជប៉ុនចាត់វិធានការ ធ្វើកំណែទម្រង់ច្បាប់ ដើម្បី ធ្វើយ៉ាងណាឲ្យជប៉ុនក្លាយជាប្រទេសដ៏គួរឲ្យទាក់ទាញ សម្រាប់ពលករអន្តោប្រវេសន៍ ដូចជាការផ្តល់ទិដ្ឋការការងារក្នុងរយៈពេលវែងជាដើម។ ការអំពាវនាវឲ្យបើកទ្វារទទួលពលករអន្តោប្រវេសន៍ គឺជារឿងដ៏រសើបរបស់ជប៉ុន ដែលមានច្បាប់អន្តោប្រវេសន៍ដ៏តឹងរ៉ឹង បំផុត ដើម្បីការពារកុំឲ្យជប៉ុនសំបូរចម្រុះជាតិសាសន៍បរទេស។ ប៉ុន្តែ បញ្ហាខ្វះកម្លាំងពលកម្ម ក្នុងស្រុក និងការទាមទារឲ្យបើកព្រំដែន ដើម្បីទទួលពលករ និងសិស្សបរទេស នៅក្រោយវិបត្តិកូវីដ បានដាក់សម្ពាធលើរដ្ឋាភិបាល ឲ្យបង្កើតទិដ្ឋាការថ្មី។
នៅជប៉ុន ពាក់កណ្តាលនៃពលករអន្តោប្រវេសន៍មានប្រភពមកពីវៀតណាម និងចិន។ នៅក្នុងការសិក្សារបស់ខ្លួន ក្រុមវិទ្យាស្ថានស្រាវជ្រាវសាធារណៈ សង្ឃឹមថា រដ្ឋាភិបាលនឹងបង្កើនចំនួនពលករបរទេសមកពីប្រទេសដែលមានប្រាក់ចំណូលទាបផ្សេងទៀត ដូចជាកម្ពុជា ឬភូមាជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ