អត្រាកំណើតទារកនៅចិន បានធ្លាក់ចុះខ្លាំង ក្នុងរវាង៤០ឆ្នាំចុងក្រោយ
អត្រាកំណើតទារក នៅក្នុងប្រទេសចិន បានធ្លាក់ចុះទាបខ្លាំងណាស់ បើគិតប្រៀបធៀបនឹងតួលេខ ក្នុងរវាង៤០ឆ្នាំចុងក្រោយនេះ។ អត្រាកំណើតធ្លាក់ចុះ បើទោះបីជាប៉ុន្មានឆ្នាំចុងក្រោយនេះ រដ្ឋាភិបាលចិន បានព្យាយាមបន្ធូរបន្ថយគោលនយោបាយកូនតែ១ និងបានជំរុញលើកទឹកចិត្ត ឲ្យប្រជាជនចិន មានកូន២ ទៅ៣នាក់ក៏ដោយ។
ចុះផ្សាយនៅថ្ងៃ៖
ស្តាប់ - ០២:៣៧
បើទោះបីជាឆ្លងកាត់វិបត្តិកូវីដ១៩ ដែលបានបង្ខំប្រជាជនចិន ឲ្យសំងំនៅតែក្នុងផ្ទះ ក៏ប៉ុន្តែអត្រាបង្កកំណើត និងកំណើតទារក នៅក្នុងប្រទេសចិន មិនបានកើនឡើងទេ។ ក្នុងឆ្នាំ២០២០ អត្រាកំណើតទារក មានត្រឹមតែ ៨.៥២ សម្រាប់ប្រជាជន១០០០នាក់។ នេះបើផ្អែកតាមតួលេខផ្លូវការ របស់ការិយាល័យស្ថិតិប្រជាជនចិន ចេញផ្សាយនៅថ្ងៃទី២៤វិច្ឆិកា។
តួលេខនេះ គឺជាកម្រិតកំណើតទារកទាបបំផុត បើគិតពីឆ្នាំ១៩៧៨មក។ កាលពីឆ្នាំ២០១៩ អត្រាកំណើតទារក មានចំនួន ១០.៤១កំណើត សម្រាប់ប្រជាជន១០០០នាក់ ដែលជាកម្រិតមួយទាបខ្លាំងណាស់ទៅហើយ។
គួរកត់សំគាល់ថា ប៉ុន្មានឆ្នាំចុងក្រោយនេះ រដ្ឋាភិបាលចិន បានធ្វើកំណែទម្រង់ច្រើនណាស់ ដើម្បីជំរុញលើកទឹកចិត្ត ឲ្យប្រជាជនខ្លួន យកកូនឲ្យលើសពី១។ កាលពីឆ្នាំ២០១៦ រដ្ឋចិនបានអនុញ្ញាតឲ្យប្រជាជនអាចមានកូន២នាក់ ហើយនៅឆ្នាំ២០២១នេះ រដ្ឋចិន ទើបអនុញ្ញាត ឲ្យប្រជាជនមានកូនដល់ទៅ៣នាក់។ តែយ៉ាងណា ការបន្ធូរបន្ថយទាំងនេះ ហាក់មិនបានជំរុញឲ្យប្រជាជនចិន សម្រេចយកកូនច្រើននោះទេ ដោយសារតែការចំណាយប្រចាំថ្ងៃ និងក្នុងការរៀនសូត្ររបស់កុមារ មានតម្លៃកាន់តែខ្ពស់ខ្លាំង។
ជាងនេះទៀត នៅក្នុងឆ្នាំ២០២០កន្លងទៅ ចំនួនអាពាហ៍ពិពាហ៍ ក៏បានធ្លាក់ចុះផងដែរ ក្នុងកម្រិតទាបបំផុត ក្នុងរវាងប្រមាណ១៧ឆ្នាំចុងក្រោយនេះ។ នៅទូទាំងប្រទេសចិន មានប្តីប្រពន្ធចំនួនតែ ៨.១៤លានគូតែប៉ុណ្ណោះ ដែលបានចាប់ដៃគ្នាចូលរោងការ នៅក្នុងឆ្នាំ២០២០។ ដោយឡែក ករណីលែងលះគ្នា ក៏បានចុះថយដែរ ក្នុងឆ្នាំ២០២០ បន្ទាប់ពីរដ្ឋចិន បានដាក់កំហិតឲ្យប្តីប្រពន្ធដែលចង់លែងលះគ្នា ត្រូវគិតពិចារណាឡើងវិញ រយៈពេលមួយខែ មុននឹងបើកនីតិវិធីលែងលះជាផ្លូវការ។ តែយ៉ាងណាក៏ដោយ កម្រិតធ្លាក់ចុះ ទាំងការរៀបអាពាហ៍ពិពាហ៍ និងការលែងលះ មួយផ្នែកធំ គឺអាចបណ្តាលមកពីស្ថានភាពឆ្លងរាលដាលកូវីដ១៩ នៅក្នុងឆ្នាំ២០២០កន្លងទៅ។
តែយ៉ាងណាក៏ដោយ អត្រាតួលេខស្ថិតិរបស់ចិន ជាទូទៅពិបាកឲ្យគេទុកចិត្តណាស់។ យោងតាមទីភ្នាក់ងារ Bloomberg បានសង្កេតឃើញភាពខុសគ្នាខ្លាំង រវាងអត្រាតួលេខរបស់ការិយាល័យស្ថិតិចិន និងលទ្ធផលធ្វើជំរឿនប្រជាជនរៀងរាល់១០ឆ្នាំម្តង។ ក្នុងហេតុផលនេះ អត្រាកំណើតទារកនៅក្នុងប្រទេសចិន រវាងពីឆ្នាំ ២០០០ ដល់២០១០ ក្នុងភាពជាក់ស្តែង ប្រហែលជាអាចលើសតួលេខផ្លូវការ ចំនួន១១.៦លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ