អឺរ៉ុបសម្តែងសាមគ្គីភាពជួយបារាំងពន្លត់ភ្លើងឆេះព្រៃ
ដោយហេតុតែភាពរាំងស្ងួតខ្លាំង និងរលកកម្តៅខ្ពស់ជាប្រវត្តិសាស្ត្រ ព្រៃឡើងស្ងួតខ្លាំង ភ្លើងក៏ងាយនឹងឆាបឆេះយ៉ាងលឿនរហ័ស និងសន្ធោសន្ធៅបំផុត។ បារាំង កំពុងរងគ្រោះភ្លើងឆេះព្រៃដ៏ធ្ងន់ធ្ងរបំផុត ជាលើកទីពីរ ក្នុងរយៈពេលមិនដល់មួយខែផង។ នៅចំពោះស្ថានភាពបែបនេះ សមាជិកសហភាពអឺរ៉ុបជាច្រើនប្រទេស បាននាំគ្នាសម្តែងសាមគ្គីភាពអឺរ៉ុប បញ្ជូនកម្លាំងមកជួយក្រុមពន្លត់អគ្គីភ័យបារាំង ជាងមួយពាន់នាក់ ដែលតតាំងនឹងភ្លើងឆេះព្រៃជាកន្លែង ក្នុងពេលតែមួយ។
ចុះផ្សាយនៅថ្ងៃ៖
ស្តាប់ - ០២:៣៥
ដោយមិនរាប់គ្រោះភ្លើងឆេះព្រៃតូចៗជាច្រើននិងជារៀងរាល់ថ្ងៃនៅភាគខាងត្បូងនៃប្រទេស គិតត្រឹមព្រឹកថ្ងៃព្រហស្បតិ៍ទី ១១សីហានេះ មានភ្លើងព្រៃឆាបឆេះខ្លាំង នៅគ្រប់ជ្រុងនៃប្រទេស ព្រៃJuraនៅភាគខាងកើត ព្រៃដូម អាវៃរ៉ុង ឡូហ្សែរ នៅភាគអាគ្នេយ៍ប្រទេស ... ប៉ុន្តែភ្លើងនៅព្រៃនៅខេត្ត Gironde ភាគនិរតីនៃប្រទេស កំណាចគួរឱ្យរន្ធត់ជាងគេ។ ក្នុងពេលតែមួយយប់ អណ្តាតភ្លើងដែលកាលពីជិតមួយខែមុន បានកម្លោចព្រៃនៅតំបន់នេះអស់ជាង១៤០០០ហិចតារហើយ បានត្របាក់ព្រៃអស់៦៨០០ហិចតារបន្ថែមទៀត។
ប្រឈមនឹងគ្រោះភ្លើងឆេះជាប្រវត្តិសាស្ត្រដូច្នេះ បារាំង ដែលពង្រឹងមធ្យោបាយប្រយុទ្ធប្រឆាំងនឹងព្រះអគ្គី ដោយប្រមូលផ្តុំអ្នកពន្លត់អគ្គីភ័យជាងមួយពាន់នាក់ យន្តហោះ៩គ្រឿងនិងឧទ្ធម្ភាគចក្របាញ់ទឹក២គ្រឿង បានអំពាវនាវសុំជំនួយពីសមាជិកសហភាពអឺរ៉ុបដូចគ្នា។ អាល្លឺម៉ង់ ក្រិក ប៉ូឡូញ រ៉ូម៉ានី អូទ្រីស បានប្រកាសផ្តល់ជំនួយ ជាកម្លាំងនិងសម្ភារៈភ្លាម។ ក្រុមពន្លត់អគ្គីភ័យនិងយានយន្តពន្លត់ភ្លើង អាល្លឺម៉ង់ និងប៉ូឡូញ ត្រូវមកដល់បារាំងយ៉ាងយូរនៅរសៀលថ្ងៃសុក្រ។ ចំណែកសហភាពអឺរ៉ុបនឹងបញ្ជូនយន្តហោះពន្លត់អគ្គីភ័យ៤គ្រឿងមកពីក្រិកនិងស៊ុយអែត។ នេះបើតាមសេចក្តីជូនដំណឹងរបស់គណៈកម្មការអឺរ៉ុប។
ហេតុអ្វីបានជាបារាំងរងគ្រោះខ្លាំង ? មេឃក្តៅខ្លាំង ដីស្ងួត ហើយគ្មានភ្លៀង ជាគ្រឿងផ្សំនាំឱ្យងាយកើតជាភ្លើង។ ដូចអេស្ប៉ាញនិងព័រទុយហ្កាល់ ចំនួន និងទំហំមហន្តរាយនៃភ្លើងឆេះ បានកើនឡើងខ្ពស់ជាងមធ្យមភាគប្រចាំកាលពី១៥ឆ្នាំមុនឆ្ងាយណាស់ ហើយរដូវក្តៅនៅមិនចប់ផង។ ជាសរុបនៅឆ្នាំនេះ ភ្លើងបានបំផ្លិចបំផ្លាញព្រៃអស់ជាង៤ម៉ឺនហិចតារ នេះបើតាមតួលេខរបស់រដ្ឋាភិបាលបារាំង តែដល់ទៅជាង៥ម៉ឺនហិចតារបើតាមទិន្នន័យផ្កាយរណបអឺរ៉ុប។ នៅចំពោះស្ថានភាពដ៏ធ្ងន់ធ្ងរបែបនេះ លោកស្រីនាយករដ្ឋមន្ត្រីបារាំង បានគូសបញ្ជាក់អំពីភាពសំខាន់នៃការប្រយុទ្ធប្រឆាំងនឹងការប្រែប្រួលអាកាធាតុ និងត្រៀមរៀបចំផែនការជាតិដើម្បីសម្របទៅនឹងការប្រែប្រួលអាកាសធាតុនៅពេលត្រលប់ពីវិស្សមកាលមកវិញ។
អ្នកវិទ្យាសាស្ត្រ ព្យាករថា យោលទៅតាមកំរិតនៃការប្រែប្រួលអាកាសធាតុ អឺរ៉ុបអាចនឹងមានចំនួនមនុស្សស្លាប់កើនឡើងមួយទ្វេជាពីរ ឬដល់មួយជាបីផង ដោយសារកម្តៅ។ ក្រៅពីងាយមានគ្រោះភ្លើងឆេះព្រៃ ការឡើងកម្តៅអាកាសធាតុមធ្យម និងបំរែបំរួលទឹកភ្លៀងល្មមៗ ក៏អាចធ្វើឱ្យព្រៃនៅអឺរ៉ុប នៅតំបន់អឌ្ឍគោលខាងជើង រហូតរុស្ស៊ី អាឡាស្កា និងកាណាដា ប្រឈមនឹងគ្រោះឆេះព្រៃកាន់តែញឹកញាប់ខ្លាំង ហើយបំផ្លាញដោយប្រភេទឈើផ្សេងដែលធន់នឹងកម្តៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ