ប្រមុខ AIEA ប្រកាសពីការត្រៀមបញ្ចេញរបាយការណ៍ស្តីពីស្ថានភាពនៅមជ្ឈមណ្ឌលនុយក្លេអ៊ែរហ្សាប៉ូរីចា
នាយកទីភ្នាក់ងារថាមពលបរមាណូអន្តរជាតិលោករ៉ាហ្វាអែល ក្រូស៊ីបានត្រឡប់ដល់ទីក្រុងវីយែន ប្រទេសអូទ្រីសវិញហើយ ក្រោយពីបានបំពេញទស្សនកិច្ចរយៈពេលប៉ុន្មានម៉ោងជាមួយក្រុមការងាររបស់លោកនៅមជ្ឈមណ្ឌលនុយក្លេអ៊ែរហ្សាប៉ូរីចាក្នុងប្រទេសអ៊ុយក្រែន។ នៅក្នុងសន្និសីទកាសែតមួយរៀបចំក្នុងទីក្រុងវីយែននាថ្ងៃសុក្រ ទី២ កញ្ញា លោកក្រូស៊ីបានបញ្ជាក់ថា លោកនឹងចេញផ្សាយរបាយការណ៍មួយស្តីពីស្ថានភាពនៅមជ្ឈមណ្ឌលនុយក្លេអ៊ែរហ្សាប៉ូរីចានាសប្តាហ៍ក្រោយ។ ទន្ទឹមគ្នានេះ លោកបានច្រានចោលលើការចោទប្រកាន់របស់រដ្ឋាភិបាលអ៊ុយក្រែន និងថា លោកមិនរងសម្ពាធ ឬឥទ្ធិពលពីអ្នកណាទេ។ បន្ទាប់មក នាយកទីភ្នាក់ងារថាមពលបរមាណូអន្តរជាតិរូបនេះបានពន្យល់រៀបរាប់អំពីការងារដែលលោកបានធ្វើនៅមជ្ឈមណ្ឌលនុយក្លេអ៊ែរហ្សាប៉ូរីចា។
ចុះផ្សាយនៅថ្ងៃ៖
ស្តាប់ - ០១:៥០
« ដូចដែលអស់លោកបានដឹងរួចហើយ ការងារដែលខ្ញុំបានដឹកនាំជាដំណើរទស្សនកិច្ចលើកទី១ ដែលមានរយៈពេលប៉ុន្មានម៉ោង។ នៅក្នុងរយៈពេលប៉ុន្មានម៉ោងនេះ ខ្ញុំអាចធ្វើការងារបានច្រើន។ មានការងារច្រើនណាស់ដែលខ្ញុំបានធ្វើនៅមជ្ឈមណ្ឌលនុយក្លេអ៊ែរហ្សាប៉ូរីចា។ ក្រោយមក និងដូចអស់លោកបានដឹងរួចហើយ មានអ្នកជំនាញរបស់យើងចំនួន ៦នាក់បានបន្តស្ថិតនៅមជ្ឈមណ្ឌលនុយក្លេអ៊ែរហ្សាប៉ូរីចា។ ពួកគេទាំង ៦នាក់នឹងបន្តការងារដែលយើងបានចាប់ផ្តើម។
បន្ទាប់មកទៀត យើងនឹងរៀបចំឲ្យមានវត្តមានជាប្រចាំរបស់អ្នកជំនាញយើងនៅទីនោះ។ វត្តមានជាអចិន្ត្រៃយ៍នេះនឹងមានគ្នាតែ ២នាក់ប៉ុណ្ណោះដែលនឹងត្រូវបន្តកាងារជាបន្តទៀត។ ខ្ញុំចង់បញ្ជាក់ថានៅមជ្ឈមណ្ឌលនុយក្លេអ៊ែរហ្សាប៉ូរីចា យើងបានឃើញសកម្មភាពយោធានៅជុំវិញមជ្ឈមណ្ឌលនោះ។ ខ្ញុំបានកត់សម្គាល់ឃើញ និងបានឃើញផ្ទាល់នឹងភ្នែករបស់ខ្ញុំចំពោះសកម្មភាពយោធានៅទីនោះ ហើយក្រុមការងាររបស់ខ្ញុំក៏បានឃើញដូចគ្នានេះ។
យើងបានឃើញស្លាកស្នាម និងរន្ធជាច្រើននៅលើជញ្ជាំងរបស់មជ្ឈមណ្ឌលនុយក្លេអ៊ែរ។ ស្លាកស្នាម និងរន្ធទាំងនេះកើតចេញពីគ្រាប់កាំភ្លើង និងអំបែងគ្រាប់ផ្លោង ឬគ្រាប់មីស៊ីល។ នេះជាសក្ខីកម្មដែលបញ្ជាក់ថា ទីតាំងនៅមជ្ឈមណ្ឌល និងអគាររបស់មជ្ឈមណ្ឌលនោះត្រូវបានគេបំពានមិនមែនតែម្តងទេ គឺច្រើនលើក ច្រើនសារ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ