បារាំង៖តុលាការចាប់បើកសវនាការជំនុំជម្រះករណីភេរវកម្មនៅទីក្រុងនីសកាលពីឆ្នាំ២០១៦
នៅក្នុងប្រទេសបារាំង សវនាការជំនុំជម្រះលើករណីភេរវកម្មនៅទីក្រុងនីសកាលពីខែកក្កដា ឆ្នាំ២០១៦ ចាប់បើកធ្វើនាថ្ងៃចន្ទ ទី៥ កញ្ញា។ គួររម្លឹកថា ភេរវកម្មនៅទីក្រុងនីសបានកើតឡើងក្នុងយប់ថ្ងៃទី១៤ កក្កដា ឆ្នាំ ២០១៦ ដែលជាថ្ងៃបុណ្យជាតិបារាំង។ ក្នុងយប់ថ្ងៃនោះ បុរសម្នាក់បានបើកឡានកាមីញ៉ុងសំដៅលើហ្វូងមនុស្សដែលកំពុងរង់ចាំមើលការបាញ់កាំជ្រួច។ ឧប្បត្តិហេតុកាលណោះបានបណ្តាលឲ្យមានមនុស្សស្លាប់ ៨៦នាក់ និងរបួសជាង ៤៥០នាក់។
ចុះផ្សាយនៅថ្ងៃ៖
ស្តាប់ - ០២:៣០
សវនាការជំនុំជម្រះលើករណីភេរវកម្មនៅទីក្រុងនីសកាលពីជាង ៦ឆ្នាំមុននឹងត្រូវប្រើពេល ៣ខែកន្លះដោយគ្រោងបិទបញ្ចប់នៅថ្ងៃទី១៦ ធ្នូខាងមុខ។ សវនាការនេះមិនបានរៀបចំធ្វើនៅក្នុងទីក្រុងនីសដែលជាកន្លែងកើតហេតុផ្ទាល់ទេ តែរៀបចំធ្វើនៅក្នុងទីក្រុងប៉ារីសដោយតុលាការពិសេសដែលធ្លាប់បានបើកសវនាការជំនុំជម្រះលើករណីភេរវកម្មក្នុងក្រុងប៉ារីសកាលពីថ្ងៃទី១៣ វិច្ឆិកា ឆ្នាំ ២០១៥។ ទោះជាយ៉ាងនេះក្តី ដំណើរការសវនាការនេះនឹងត្រូវផ្សាយបន្តផ្ទាល់ទៅកាន់ទីក្រុងនីសនៅក្នុងបន្ទប់មួយស្ថិតក្នុងមជ្ឈមណ្ឌលសមាជ។
មួយវិញទៀត និងក៏ដូចជាសវនាការជំនុំជម្រះលើករណីភេរវកម្មក្នុងក្រុងប៉ារីសកាលពីថ្ងៃទី១៣ វិច្ឆិកា ឆ្នាំ ២០១៥ សវនាការជំនុំជម្រះលើករណីភេរវកម្មនៅទីក្រុងនីសកាលពីថ្ងៃទី១៤ កក្កដា ឆ្នាំ ២០១៦ នឹងត្រូវថតជាវីដេអូសម្រាប់រក្សាទុកជាឯកសារប្រវត្តិសាស្រ្ត។ ចំណែកនៅក្នុងបន្ទប់សវនាការជំនុំជម្រះលើករណីភេរវកម្មនៅទីក្រុងនីសពេលនេះ មានវត្តមានជនជាប់ចោទចំនួន ៨នាក់ដែលជាជនជាតិបារាំងដើមកំណើតទុយនីស៊ី ជាជនជាតិទុយនីស៊ី ឬមួយក៏ជាជនជាតិអាល់បានី។
តែគ្មានវត្តមានជនដៃដល់អាយុ ៣១ឆ្នាំ ជនជាតិទុយនីស៊ីឈ្មោះម៉ូហាម៉េដ ឡាហ្វេស-ប៊ូលែលដែលជាអ្នកបើកឡានកាំមីញ៉ុងសំដៅលើហ្វូងមនុស្សទេ ព្រោះរូបគេត្រូវបានប៉ូលិសបាញ់សម្លាប់ភ្លាមៗនៅនឹងកន្លែងកើតហេតុ។ មួយវិញទៀត នៅក្នុងចំណោមជនជាប់ចោទទាំង ៨នាក់ដែលមានវត្តមាននៅក្នុងសវនាការ គ្មានអ្នកណាម្នាក់ត្រូវបានកាត់ទោសពីបទសមគំនិតឃាតកម្ម ឬប៉ុនប៉ងឃាតកម្មដោយរៀបចំទុកឡើយ។ នេះក៏ដោយសារតែការស៊ើបអង្កេតមិនអាចកំណត់ថា តើពួកគេបានដឹងពីគម្រោងធ្វើភេរវកម្មឬអត់ទេ។
ក៏ប៉ុន្តែ ការស៊ើបអង្កេតបានបង្ហាញពីភាពជិតស្និទ្ធរបស់ពួកគេជាមួយជនដៃដល់ម៉ូហាម៉េដ ឡាហ្វេស-ប៊ូលែល និងយល់ឃើញថា ពួកគេបានដឹងច្បាស់ពីការភ្ជាប់ខ្លួនរបស់ម៉ូហាម៉េដ ឡាហ្វេស-ប៊ូលែលទៅនឹងមនោគមវិជ្ជានៃក្រុមជីហាតប្រដាប់អាវុធ នោះបើទោះបីជាការស៊ើបអង្កេតមិនបានរកឃើញពីចំណងទាក់ទងផ្ទាល់រវាងម៉ូហាម៉េដ ឡាហ្វេស-ប៊ូលែល និងអង្គការជីហាតក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ