មេដឹកនាំតំបន់ផ្តាច់ទឹកដីអ៊ុយក្រែន ប្រកាសជោគជ័យក្នុងប្រជាមតិ
អាជ្ញាធរគ្រប់គ្រងទឹកដីអ៊ុយក្រែន នៅភាគខាងកើតនិងខាងត្បូង ដែលបន្តុបដោយរុស្ស៊ី បានប្រកាសទទួលបានជោគជ័យ ក្នុងប្រជាមតិតំបន់ កាលពីចុងសប្តាហ៍។ ប្រជាពលរដ្ឋ បានបោះឆ្នោតគាំទ្រ ការភ្ជាប់តំបន់ហ្សាប៉ូរីចា ខឺសិន លូហ្កនស្ក៍ និងដូនេតស្ក៍ ទៅនឹងប្រទេសរុស្ស៊ី ទទួលសំឡេងគាំទ្រ ដ៏ច្រើនលើសលុប។ បានលទ្ធផលហើយ ដំណើរបែបបទ ប្រកាសបញ្ជូលដែនដីទាំងទៅក្នុងសហព័ន្ធរុស្ស៊ី នឹងប្រព្រឹត្តទៅយ៉ាងឆាប់ៗបំផុត។
ចុះផ្សាយនៅថ្ងៃ៖
ស្តាប់ - ០២:០១
បរិហារដោយក្រុងកៀវ និងក្រុមលោកខាងលិច ប្រជាមតិតំបន់ចង់ផ្តាច់ទឹកដីអ៊ុយក្រែន គ្មានអ្វីជាផ្លូវការទេ។ ប៉ុន្តែ រៀបចំដោយម៉ូស្គូ ការភ្ជាប់តំបន់ចំនួនបួន នៅភាគខាងកើត និងខាងត្បូងអ៊ុយក្រែន មកក្នុងសហព័ន្ធរុស្ស៊ី នឹងមានដំណើរបែបបទយ៉ាងលឿន ដូចអ្វីដែលធ្លាប់កើតមាននៅគ្រីមេ កាលពីឆ្នាំ២០១៤។ កាលណោះ លោកពូទីន បានចុះហត្ថលេខាសន្ធិសញ្ញាក្រសោបយកដីគ្រីមេ តែពីរថ្ងៃក្រោយប្រជាមតិ និងមុនការអនុម័តរបស់សភារុស្ស៊ីទៅទៀត។ សម្រាប់លើកនេះ សភាដូម៉ារបស់រុស្ស៊ី នឹងធ្វើការបោះឆ្នោតនៅថ្ងៃទី ២៩កញ្ញា២០២២ ទទួលយកតំបន់ទាំងបួន ជាដែនដីរុស្ស៊ី ជាផ្លូវការ ដោយមានពិធីអបអរ ប្រគុំតន្ត្រីនិងបាញ់កាំជ្រួច នៅយប់ថ្ងៃសុក្រផង នៅទីក្រុងមូស្គូ។
នាឱកាសបុណ្យជាតិនោះ លោកប្រធានាធិបតីរុស្ស៊ី វ្លាដេមៀ ពូទីន ទំនងជាអាចនឹងថ្លែងសុរន្ទរកថា ប្រកាសបញ្ចូលដែនដីនេះទៅក្នុងសហព័ន្ធរុស្ស៊ីផង។ បើតាមអ្នកសង្កេតការណ៍ លោកពូទីន នឹងបង្ហាញគោលនយោបាយធំៗ ពិសេសបង្ហាញអំពីបន្ទាត់ព្រំដែនរុស្ស៊ីថ្មី ថាស្ថិតនៅត្រឹមដែនដីអ៊ុយក្រែនដែលកំពុងគ្រប់គ្រងដោយយោធារុស្ស៊ីបច្ចុប្បន្ន ឬប្រកាសកាត់យកតំបន់ ដូនេតស្ក៍ និងលូហ្កនស្ក៍ ទាំងមូលតែម្តង បើទោះបីតំបន់នេះមួយភាគស្ថិតក្រោមការគ្រប់គ្រងរបស់អ៊ុយក្រែនក៏ដោយ។
ជាប្រតិកម្ម ប្រធានាធិបតីអ៊ុយក្រែន បានអះអាងភ្លាមតាមប្រព័ន្ធសង្គមតេឡេក្រាម កាលពីល្ងាចថ្ងៃអង្គារទី ២៧កញ្ញា២០២២ ថា នឹងការពារប្រជាជនអ៊ុយក្រែន ក្នុងតំបន់គ្រប់គ្រងដោយយោធារុស្ស៊ីក្នុងពេលបច្ចុប្បន្នផង និង តំបន់គ្រីមេផង។ ហើយអ៊ុយក្រែនមិនអាចចូលចរចាជាមួយរុស្ស៊ីបានទេ ក្រោយការលេបយកដី តាមរយៈប្រជាមតិបែបនេះ។ នេះជាសាររបស់លោក ហ្សេឡេនស្គី ទៅកាន់កាន់ក្រុមប្រឹក្សាសន្តិសុខអង្គការសហប្រជាជាតិ។ ក្នុងជំនួបប្រជុំក្រុមប្រឹក្សាសន្តិសុខ ម្សិលមិញនេះ អគ្គលេខាធិការរងអង្គការសហប្រជាជាតិ ទទួលបន្ទុកកិច្ចការនយោបាយ ប្រកាសគាំទ្របូរណភាពដែនដីទាំងមូលរបស់អ៊ុយក្រែន ដែលទទួលស្គាល់ដោយអន្តរជាតិ។ ចំណែកក្រុមG7 បានប្តេជ្ញាជាថ្មីមិនទទួលស្គាល់លទ្ធផលប្រជាមតិរបស់រុស្ស៊ីទេ ហើយវ៉ាស៊ីនតោនសន្យាតបតវិញដោយដាក់ទណ្ឌកម្មសេដ្ឋកិច្ចយ៉ាងធ្ងន់ធ្ងរ។ ពីអង្គការសហប្រជាជាតិ ឯកអគ្គរដ្ឋទូតចិន បានអំពាវនាវឱ្យមានការគោរពបូរណភាពដែនដីគ្រប់ប្រទេសទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ