អង្គការឧតុនិយមពិភពលោក៖គេត្រូវផ្លាស់ប្តូរប្រព័ន្ធថាមពលទាំងស្រុង បើសិនចង់ជៀសវាងវិបត្តិអសន្តិសុខថាមពល
នៅពេលពិភពលោកកំពុងជួបវិបត្តិថាមពលឡើងថ្លៃ ដោយសារវិបត្តិសង្រ្គាមអ៊ុយក្រែន អង្គការឧតុនិយមពិភពលោកដែលជាស្ថាប័នមួយរបស់អង្គការសហប្រជាជាតិបានចេញរបាយការណ៍ ពញ្ញាក់ស្មារតីឲ្យពិភពលោកប្រញាប់ផ្លាស់ប្តូរប្រព័ន្ធផ្គត់ផ្គង់ថាមពលសព្វថ្ងៃ បើសិន មិនចង់ជួបបញ្ហាអសន្តិសុខថាមពល។ តាមអង្គការឧតុនិយមពិភពលោក មួយភាគនៃប្រព័ន្ធផ្គត់ផ្គង់ថាមពលក្នុងពិភពលោកប្រឈមរងការគំរាមកំហែងដោយគ្រោះមហន្តរាយធម្មជាតិដែលបង្កឡើងដោយការប្រែប្រួលអាកាសធាតុ។
ចុះផ្សាយនៅថ្ងៃ៖ កែប្រែថ្ងៃទី៖
រោងចក្រផលិតអគ្គិសនីដើរដោយថាមពលផូស៊ីល ដូចជាប្រេង ធ្យូងថ្ម ឧស្ម័ន ជាប្រភពបញ្ចេញឧស្ម័នកាបូនិក ដែលជាឧស្ម័នផ្ទះកញ្ចក់ ដើមហេតុនៃការឡើងកំដៅផែនដី និងការប្រែប្រួលអាកាសធាតុ។ ប៉ុន្តែ ជាមួយគ្នានោះ របាយការណ៍របស់អង្គការឧតុនិយមពិភពលោករកឃើញដែរថា រោងចក្រផលិតអគ្គិសនីដែលបញ្ចេញឧស្ម័នកាបូនិក្រាស់ក្រែលទាំងនោះ ក៏ជាអ្នកងាយរងគ្រោះខ្លាំង ដោយសារគ្រោះមហន្តរាយធម្មជាតិ ដែលបណ្តាលមកពីការប្រែប្រួលអាកាសធាតុដែរ។
នៅក្នុងរបាយការណ៍ប្រចាំឆ្នាំ ស្តីពីស្ថានភាពសេវាអាកាសធាតុ (ចេញផ្សាយកាលពីថ្ងៃអង្គារ) អង្គការឧតុនិយមពិភពលោក បានព្រមានថា គ្រោះមហន្តរាយធម្មជាតិដែលមានសន្ទុះ កម្លាំងកាន់តែខ្លាំង និងកាន់តែញឹកញាប់ ដូចជា គ្រោះរាំងស្ងួត គ្រោះទឹកជំនន់ និងការឡើងកំពស់ទឹកសមុទ្រ ដែលជាលទ្ធផលនៃការប្រែប្រួលអាកាសធាតុ កំពុងគំរាមកំហែងប្រភពផ្គត់ផ្គង់ថាមពល នៅក្នុងពិភពលោក។
តាមរបាយការណ៍ខាងលើ នៅឆ្នាំ ២០២០ ៨៧%នៃរោងចក្រអគ្គិសនីដើរដោយថាមពលនុយក្លេអ៊ែរ ថាមពលផូស៊ីល និងស្ថានីយ៍វ៉ារីអគ្គិសនី នៅក្នុងពិភពលោក ពឹងផ្អែកខ្លាំងលើតម្រូវការទឹកត្រជាក់។ ប៉ុន្តែ ១ភាគ៣នៃរោងចក្រដោយថាមពលឥន្ធនៈផូស៊ីលស្ថិតនៅក្នុងតំបន់ខ្វះទឹក។ ២៥%នៃរោងចក្រដើរដោយថាមពលនុយក្លេអ៊ែរ ស្ថិតនៅជាប់ស្ទឹង ដែលកំពុងប្រឈមនឹងការរីងស្ងួត ហួតហែង។ រោងចក្រអគ្គិសនីមួយចំនួនក៏កំពុងប្រឈមរងគ្រោះផងដែរដោយសារការឡើងកំពស់ទឹកសមុទ្រ និងខ្យល់ព្យុះសមុទ្រ។
សម្រាប់អគ្គលេខាធិការអង្គការឧតុនិយមពិភពលោក Petteri Taalas ពេលវេលាមិននៅខាងមនុស្សលោក នោះទេ ហើយអាកាសធាតុកំពុងប្រែប្រួល ក្រឡាប់ចាក់ នៅចំពោះភ្នែករបស់មនុស្ស។ ដូច្នេះ អ្វីដែលគេត្រូវធ្វើបន្ទាន់ គឺការវិនិយោគ ដើម្បី ផ្លាស់ប្តូរប្រព័ន្ធផ្គង់ផ្គង់សព្វថ្ងៃ ដោយជំនួសមកវិញ នូវថាមពលកកើតឡើងវិញ ដូចជា ថាមពលបានមកពីផ្ទាំងសូឡា និងវាយោអគ្គិសនីជាដើម។
តាមអង្គការឧតុនិយម ពិភពលោក វាយោអគ្គិសនី និងផ្ទាំងសូឡាមិនត្រឹមតែផលិតថាមពលស្អាតស្អំ ដែលនឹងជួយឲ្យពិភពលោកកាត់បន្ថយ ការបញ្ចេញឧស្ម័នបានច្រើនតែប៉ុណ្ណោះ ប៉ុន្តែ ទីតាំង ផ្ទាំងសូឡា និងស្ថានីយ៍វាយោអគ្គិសនី នឹងជួយឲ្យគេអាចធានាបានសន្តិសុខថាមពល ជាពិសេសនៅក្នុងអំឡុងរលកកំដៅខ្លាំង។
ដើម្បីបញ្ចុះបញ្ចូលឲ្យគេបង្កើនទ្វេដងប្រភពផ្គង់ផ្គង់អគ្គិសនី ដែលបានមកពីថាមពលស្អាតស្អំ របាយការណ៍របស់អង្គការឧតុនិយមបានលើកយកករណីអសន្តិសុខថាមពល បង្កឡើងដោយរលកកំដៅ នៅអាហ្សង់ទីន ជាទីដែល រោងចក្រផលិតអគ្គិសនីត្រូវបង្ខំចិត្ត កាត់ផ្តាច់ភ្លើង ដោយសារតម្រូវការកើនឡើងខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ