សហភាពអឺរ៉ុបដាក់ទណ្ឌកម្មអ៊ីរ៉ង់ពីបទផ្តល់ដ្រូនឲ្យរុស្ស៊ីប្រើនៅក្នុងសង្រ្គាមអ៊ុយក្រែន
នៅថ្ងៃព្រហស្បតិ៍ ទី២០ តុលា ក្រុមប្រទេសសមាជិកសហភាពអឺរ៉ុបបានព្រមព្រៀងគ្នាលើទណ្ឌកម្មអ៊ីរ៉ង់ពីបទផ្តល់ដ្រូនឲ្យរុស្ស៊ីប្រើនៅក្នុងសង្រ្គាមអ៊ុយក្រែន។ ទណ្ឌកម្មនេះជាលទ្ធផលដែលប្រទេសសមាជិកអឺរ៉ុបបានជួបជជែកគ្នាអស់រយៈពេល ៣ថ្ងៃ។ រដ្ឋាភិបាលអ៊ុយក្រែនបានសាទរចំពោះចម្លើយចំណាត់ការដ៏ឆាប់រហ័សរបស់សហភាពអឺរ៉ុប។ ចំណែករុស្ស៊ីបានបរិហារពីគំនាបរបស់បស្ចិមប្រទេសលើប្រទេសអ៊ីរ៉ង់។ គួរបញ្ជាក់ថា គឺអ៊ុយក្រែនជាអ្នកដែលបានស្នើឲ្យអឺរ៉ុបដាក់ទណ្ឌកម្មលើអ៊ីរ៉ង់ ក្រោយពីរុស្ស៊ីបានប្រើដ្រូនអ៊ីរ៉ង់វាយប្រហារលើទីក្រុងកៀវ។
ចុះផ្សាយនៅថ្ងៃ៖
ស្តាប់ - ០២:០៩
នៅក្នុងជំហានដំបូង ទណ្ឌកម្មរបស់សហភាពអឺរ៉ុបប្រឆាំងអ៊ីរ៉ង់ជាទណ្ឌកម្មបង្កទ្រព្យសម្បតិទៅលើឥស្សរជនយោធាជាន់ខ្ពស់ចំនួន ៣នាក់ និងស្ថាប័នមួយ។ ឥស្សរជនយោធាជាន់ខ្ពស់ទាំង ៣នាក់មានមេបញ្ជាការកងទ័ពអ៊ីរ៉ង់ម្នាក់ អ្នកទទួលខុសត្រូវផ្នែកឡូជីស្ទិកម្នាក់ និងមេបញ្ជាការដ្រូននៃកងឆ្មាំបដិវត្តន៍អ៊ីរ៉ង់ម្នាក់។ ចំណែកស្ថានប័នមួយគឺជាក្រុមហ៊ុនអ៊ីរ៉ង់ឈ្មោះ Shahed Aviation Industrie ដែលមានជាប់ពាក់ព័ន្ធជាមួយកងឆ្មាំបដិវត្តន៍អ៊ីរ៉ង់។ ប្រធានាធិបតីប្រទេសឆែកដែលជាប្រធានប្តូរវេនសហភាពអឺរ៉ុបបានបញ្ជាក់ថា ក្រៅពីឥស្សរជនយោធាជាន់ខ្ពស់ទាំង ៣នាក់ និងក្រុមហ៊ុនអ៊ីរ៉ង់មួយនេះ ទណ្ឌកម្មនឹងត្រូវដាក់បន្ថែមទៅលើស្ថានប័នអ៊ីរ៉ង់ចំនួន ៣ទៀតដែលធ្លាប់ជាប់ទណ្ឌកម្មអឺរ៉ុបនាពេលកន្លងមក។
គួរបញ្ជាក់ថា អ៊ុយក្រែនជាអ្នកដែលបានស្នើក្នុងថ្ងៃចន្ទ ទី១៧ តុលាឲ្យអឺរ៉ុបដាក់ទណ្ឌកម្មប្រឆាំងអ៊ីរ៉ង់ ក្រោយពីរុស្ស៊ីបានវាយប្រហារច្រើនកន្លែងលើទីក្រុងកៀវដោយប្រើដ្រូនអ៊ីរ៉ង់។ ក្នុងថ្ងៃពុធ ទី១៩ តុលា កងទ័ពអ៊ុយក្រែនបានបញ្ជាក់ពីការកម្ទេចបានដ្រូនអ៊ីរ៉ង់ចំនួន ២២៣គ្រឿងតាំងពីពាក់កណ្តាលខែកញ្ញា។ បន្ទាប់មកក្នុងថ្ងៃពុធដដែលនៅអង្គការសហប្រជាជាតិ រុស្ស៊ី និងអ៊ីរ៉ង់បានបដិសេធយ៉ាងដាច់អហង្ការពីការផ្គត់ផ្គង់ដ្រូនដោយក្រុងតេហេរ៉ង់ចំពោះក្រុងមូស្គូនៅក្នុងសង្គ្រាមរុស្ស៊ីនៅអ៊ុយក្រែន។ យ៉ាងណាក៏ដោយ ប្រធានក្រុមប្រឹក្សាអឺរ៉ុបលោក Charles Michel បានសាទរលើការសម្រេចចិត្តដ៏ឆាប់រហ័សរបស់អឺរ៉ុបប្រឆាំងអ៊ីរ៉ង់។
« ជាចម្លើយរបស់យើងប្រឆាំងនឹងរបបអ៊ីរ៉ង់ដែលបានផ្តល់ដ្រូនឲ្យរុស្ស៊ីដើម្បីសម្លាប់ប្រជាជនអ៊ុយក្រែនស្លូតត្រង់ » នេះជាប្រតិកម្មរបស់នាយករដ្ឋមន្រ្តីប្រទេសឆែក។ ចម្លើយសាទរក៏មានពីភាគីអ៊ុយក្រែនដែរ។ តែរុស្ស៊ីបានចេញមុខបរិហារលើការសម្រេចចិត្តរបស់សហភាពអឺរ៉ុបដោយចាត់ទុកការដាក់ទណ្ឌកម្មលើអ៊ីរ៉ង់ថាជាការដាក់គំនាបលើអ៊ីរ៉ង់ពីអាមេរិក និងសហភាពអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ