អ៊ីរ៉ង់ដាក់ទណ្ឌកម្មតបនឹងអឺរ៉ុបវិញ វិទ្យុបារាំងអន្តរជាតិជាភាសាពែក្ស ជាប់ឈ្មោះក្នុងបញ្ជីខ្មៅមួយដែរ
ឆ្លើយតបទៅនឹងទណ្ឌកម្មរបស់សហភាពអឺរ៉ុប អ៊ីរ៉ង់បានប្រកាសនៅថ្ងៃពុធទី ២៦ តុលា២០២២ ដាក់ទណ្ឌកម្មវិញ លើបុគ្គល ស្ថាប័ន និងសារព័ត៌មានមួយចំនួនរបស់បារាំងនិងអឺរ៉ុប ក្នុងនោះមានវិទ្យុបារាំងអន្តរជាតិជាភាសាពែក្សមួយផងដែរ។ វិទ្យុRFI បានបញ្ចេញប្រតិកម្មចាត់ទុកទណ្ឌកម្មអ៊ីរ៉ង់ ជាលេស ក្នុងការប៉ុនប៉ងពន្លត់សន្ទុះបះបោររបស់ប្រជាពលរដ្ឋនិងយុវជនអ៊ីរ៉ង់តែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:០៩
កាលពីថ្ងៃទី ១៧តុលា សហភាពអឺរ៉ុបបានអនុម័តទណ្ឌកម្ម ដាក់ប្រឆាំងនឹងស្ថាប័នប៉ូលិសសីលធម៌អ៊ីរ៉ង់ ព្រមទាំងមេដឹកនាំ១១នាក់ ដែលមានពាក់ព័ន្ធនឹងការបង្ក្រាបចលនាបាតុកម្មក្រោយការស្លាប់របស់នាងMahsa Amini កាលពីថ្ងៃទី ១៦កញ្ញា។
នៅថ្ងៃពុធទី ២៦តុលា ក្រសួងការបរទេសអ៊ីរ៉ង់បានប្រកាសដាក់ទណ្ឌកម្ម ប្រឆាំងនឹងសហភាពអឺរ៉ុបវិញ នូវស្ថាប័នអឺរ៉ុប ចំនួន ៨ និងបុគ្គលរស់នៅអឺរ៉ុប ចំនួន១២រូប ពីបទគាំទ្រក្រុមភេរវនិយម ញុះញង់ឱ្យមានអំពើហិង្សា និងបង្កឱ្យមានកុប្បកម្ម អំពើហិង្សានិងសកម្មភាពបែបភេរវកម្មនៅក្នុងប្រទេសអ៊ីរ៉ង់។
ស្ថាប័ននិងបុគ្គលជាប់ឈ្មោះក្នុងបញ្ជីខ្មៅអ៊ីរ៉ង់ ដែលមិនអាចទទួលទិដ្ឋាការចូលអ៊ីរ៉ង់ និងត្រូវបង្កកទ្រព្យធនក្នុងដែនអំណាចអ៊ីរ៉ង់ មានដូចជាក្រុមមិត្តអ៊ីរ៉ង់និងសមាជិកនៅសភាអឺរ៉ុប គណៈកម្មាធិការស្វែងរកយុត្តិធម៌អន្តរជាតិនិងសមាជិក សម្ព័ន្ធអន្តរជាតិប្រឆាំងនឹងការប្រកាន់ពូជសាសន៍និងរើសអើងពូជជ្វីហ្វ វិទ្យុអាល្លឺម៉ង់ និងវិទ្យុបារាំងអន្តរជាតិ ជាភាសាពែក្ស តំណាងសភាអឺរ៉ុប និងអ្នកនយោបាយបារាំង ព្រមទាំងនិពន្ធនាយកសារព័ត៌មានអាល្លឺម៉ង់ Bild ពីរនាក់ទៀត។
វិទ្យុបារាំងអន្តរជាតិRFI បានបញ្ចេញប្រតិកម្មភ្លាមចាត់ទុកថាទណ្ឌកម្មអ៊ីរ៉ង់ថាជាការប៉ុនប៉ងពន្លត់សន្ទុះបះបោរដ៏ខ្លាំងក្លារបស់ប្រជាពលរដ្ឋ គាំទ្រដោយចលនាយុវជនដែលហ៊ានបូជាជីវិតដើម្បីសេរីភាព។ ទណ្ឌកម្មនេះក៏មិនបានធ្វើឱ្យប៉ះពាល់ដល់ការងាររបស់វិទ្យុបារាំងអន្តរជាតិជាភាសាពែក្សទេ ព្រោះតាំងពីច្រើនឆ្នាំមកហើយ ក្រុមការងារRFI បានធ្វើការនៅក្រៅប្រទេសអ៊ីរ៉ង់ និងផ្តល់ព័ត៌មានដល់ពលរដ្ឋអ៊ីរ៉ង់តាមប្រព័ន្ធអ៊ីនធ័រនែត។ ទោះបីមានទណ្ឌកម្ម ក៏វិទ្យុបារាំងអន្តរជាតិនៅតែបន្តការងារផ្តល់ព័ត៌មាន ជុំវិញស្ថានភាពនៅក្នុងប្រទេសអ៊ីរ៉ង់ គាំទ្រប្រជាពលរដ្ឋ ជាពិសេសស្ត្រីអ៊ីរ៉ង់ក្នុងការតស៊ូដើម្បីសេរីភាពនិងសមភាព។ នេះ បើតាមសេចក្តីថ្លែងការណ៍របស់RFIវិទ្យុបារាំងអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ