ហ្សេ៧និងក្រុមប្រទេសងាយរងគ្រោះ បង្កើតរចនាសម្ព័ន្ធប្រឈមនឹងហានិភ័យអាកាសធាតុ
អាល្លឺម៉ង់ ប្រធានផ្លាស់វេនហ្សេ៧ និងក្រុមប្រទេសដែលងាយរងគ្រោះអាកាសធាតុ បានប្រកាសបង្កើតរចនាសម្ព័ន្ធមួយ សម្រាប់ផ្តល់ជាហិរញ្ញវត្ថុ ជួយប្រជាពលរដ្ឋ ដែលរងផលប៉ះពាល់ពីការឡើងកម្តៅអាកាសធាតុ។ គំនិតផ្តួចផ្តើមនេះ បានទទួលការស្វាគមន៍ ដោយប្រុងប្រយ័ត្នបំផុតពីសំណាក់អង្គការក្រៅរដ្ឋាភិបាល។
ចុះផ្សាយនៅថ្ងៃ៖
ស្តាប់ - ០២:១៨
“រចនាសម្ព័ន្ធពិភពលោកប្រឆាំងហានិភ័យអាកាសធាតុ” ដែលប្រមូលថវិកា មកទល់ពេលនេះ ចំនួន ២០០លានអឺរ៉ូ គ្រោងនឹងជួយប្រជាពលរដ្ឋក្នុងប្រទេសងាយរកគ្រោះ ដែលមានប្រព័ន្ធធានារ៉ាប់រងទន់ខ្សោយ ឱ្យបានទទួលជំនួយហិរញ្ញវត្ថុ បានមុនឬនៅក្រោយមហន្តរាយអាកាសធាតុភ្លាម។ នេះបើតាមសេចក្តីថ្លែងការណ៍របស់អាល្លឺម៉ង់និងក្រុមប្រទេសងាយរងគ្រោះV២០ ដែលមានចំនួន ៥៨ប្រទេស។
រដ្ឋមន្ត្រីក្រសួងអភិវឌ្ឍន៍អាល្លឺម៉ង់បានលម្អិតពីកន្លែងរៀបចំសន្និសីទអាកាសធាតុបន្ថែមទៀតថា រចនាសម្ព័ន្ធនេះ មានបញ្ចូលប្រព័ន្ធធានារ៉ាប់រងទល់នឹងការខូចខាតប៉ះពាល់ដល់ផលដំណាំ ដល់អាគារ ឬដល់សកម្មភាពរបស់ក្រុម ពោលគឺប្រព័ន្ធការពារសង្គមសម្របទៅតាមស្ថានការណ៍ ឬផ្តល់ហិរញ្ញវត្ថុភ្លាម សម្រាប់ឱ្យរដ្ឋាភិបាលយកទៅសាងសង់សាលា ស្ពានស្នល់ឡើងវិញ។
បានទទួលព្រមព្រៀងពីក្រុមប្រទេសមហាឧស្សាហកម្មទាំង៧ (ហ្សេ៧) ក្នុងជំនួបកំពូលកាលពីខែមិថុនា ប្រទេសមួយក្រុមដំបូងដែលបានទទួលផលពីប្រព័ន្ធថ្មីនេះមានជាអាទិ៍ បង់ក្លាដែស កូស្តារីកា ហ្វីជី ហ្កាណា ប៉ាគីស្ថាន ហ្វីលីពីន និងសេណេហ្កាល់។
គំនិតផ្តួចផ្តើមរបស់អាល្លឺម៉ង់ ដែលធ្លាក់មកជួនចំពេលសន្និសីទអាកាសធាតុCOP២៧កំពុងជជែកយ៉ាងពុះកញ្ជ្រោលជុំវិញបញ្ហាទារសំណងខូចខាត ពុំបានទទួលការគាំទ្រជាឯកច្ឆ័ន្ទទេ។ តំណាងអង្គការក្រៅរដ្ឋាភិបាល Climate Action Netword ActionAid International យល់ថាប្រព័ន្ធនេះមិនអាចបង្វែរចំណាប់អារម្មណ៍ប្រទេសកំពុងអភិវឌ្ឍន៍ ដែលកំពុងទាមទារបង្កើតយន្តការហិរញ្ញវត្ថុសម្រាប់ប្រឈមនឹងការបាត់បង់និងខូចខាតដោយអាកាសធាតុទេ។ រដ្ឋមន្ត្រីហិរញ្ញវត្ថុហ្កាណានិងជាប្រធានក្រុមប្រទេសងាយរងគ្រោះV២០ ថាយឺតពេលបន្តិចហើយ។ ការប្រែប្រួលអាកាសធាតុបានធ្វើឱ្យក្រុមប្រទេសងាយរងគ្រោះបានបាត់បង់និងខូចខាត គិតជាទឹកប្រាក់អស់៥២៥ពាន់លានដុល្លារតាំងពីឆ្នាំ២០០០មក។
ប៉ុន្តែសម្រាប់អាល្លឺម៉ង់ ប្រព័ន្ធការពារប្រឆាំងនឹងហានិភ័យអាកាសធាតុ មិនមែនជាល្បិចបញ្ចៀសការចរចាផ្លូវការ ស្តីពីការទាមទារ សំណងបាត់បង់និងខូចខាត ឬការសម្រុះសម្រួលផ្តល់ហិរញ្ញវត្ថុដល់ក្រុមប្រទេសងាយរងគ្រោះអាកាសធាតុ នៅក្នុងសន្និសីទអន្តរជាតិស្តីពីអាកាសធាតុCOP២៧ទេ ព្រោះពុំមែនមានតែដំណោះស្រាយមួយគត់នេះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ