យន្តហោះMH17៖តុលាការហូឡង់កាត់ទោសជនជាតិរុស្ស៊ី២នាក់ និងអ៊ុយក្រែន១នាក់ឲ្យជាប់គុកអស់មួយជីវិត
ក្រោយសវនាការ រយៈពេល២ឆ្នាំកន្លះ លើសំណុំរឿងផ្ទុះធ្លាក់យន្តហោះម៉ាឡេស៊ី MH 17 តុលាការហូឡង់បានចេញសាលក្រមដ៏គួរឲ្យទន្ទឹងរង់ចាំ កាលពីថ្ងៃព្រហស្បតិ៍ ទី ១៧ វិច្ឆកា។ សាលក្រមរបស់តុលាការហូឡង់បានបញ្ជាក់ថា យន្តហោះក្រុមហ៊ុនម៉ាឡេស៊ី MH17ដែលផ្ទុះធ្លាក់ សម្លាប់មនុស្ស២៩៨នាក់ កាលពីឆ្នាំ ២០១៨ រងត្រូវ គ្រាប់មីស៊ីលBuk ផលិតនៅរុស្ស៊ី។ នៅថ្ងៃព្រហស្បតិ៍ តុលាការហូឡង់បានសម្រេចផ្តន្ទាទោសជនសង្ស័យ៣រូប ចំណែកជនសង្ស័យទី៤ត្រូវបានតុលាការលើកលែងការចោទប្រកាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
បន្ទាប់ពីបើកសវនាការ ២ឆ្នាំកន្លះ តុលាការហូឡង់បានសម្រេចចេញសាលក្រម ផ្តន្ទាទោស ជនជាតិរុស្ស៊ី ២រូប និងជនជាតិអ៊ុយក្រែន ១រូប ឲ្យជាប់ពន្ធនាគារអស់មួយជីវិត ក្នុងបទឃាតកម្មសម្លាប់មនុស្ស។ ចំណែក ជនសង្ស័យទី៤ ដែលជាជនជាតិរុស្ស៊ី ត្រូវបានតុលាការសម្រេចលើកលែងការចោទប្រកាន់។
ក្នុងចំណោមជនសង្ស័យ ទាំង៣រូបដែលត្រូវតុលាការហូឡង់កាត់ទោសឲ្យជាប់ពន្ធនាគារអស់មួយជីវិត មាន២នាក់ ជាអតីតភ្នាក់ងារស៊ើបការសម្ងាត់របស់រុស្ស៊ី និង១នាក់ ជាប្រធានក្រុមឧទ្ទាមអ៊ុយក្រែន។ អ្នកទាំងបីត្រូវតុលាការចោទប្រកាន់ថា ចូលរួម និងបញ្ជាឲ្យបាញ់មីស៊ីល Buk ពីតំបន់ភាគខាងកើត ដែលគ្រប់គ្រងដោយក្រុមឧទ្ទាមទាមទារផ្តាច់ទឹកដីនិយមរុស្ស៊ី។ តាមប្រធានតុលាការហូឡង់ លោកHendrik Steenhuis មីស៊ីលBukផលិតឡើងនៅរុស្ស៊ីជាដើមហេតុធ្វើឲ្យផ្ទុះធ្លាក់យន្តហោះMH17 ដែលបានសម្លាប់អ្នកដំណើរទាំងអស់ និងបុគ្គលិកសរុប ២៩៨នាក់ ក្នុងនោះ ២ភាគ៣ ជាជនជាតិហូឡង់។
នៅថ្ងៃព្រហស្បតិ៍ តុលាការហូឡង់បានចេញសាលក្រមកំបាំងមុខ ព្រោះថា ជនសង្ស័យទាំង ៣រូប ដែលបដិសេធ មិនជាប់ពាក់ព័ន្ធនឹងការធ្លាក់យន្តហោះរបស់ក្រុមហ៊ុនម៉ាឡេស៊ី គ្មានវត្តមាន ចូលរួម នៅក្នុងសវនាការនៅប្រទេសហូឡង់។
ទោះត្រូវតុលាការផ្តន្ទាទោសឲ្យជាប់ពន្ធនាគារ អស់មួយជីវិត ប៉ុន្តែ គេមិនរំពឹងថា នឹងអាចតាមចាប់ខ្លួនឧក្រិដ្ឋជនខាងលើមកថ្កោលទោស ព្រោះថា រុស្ស៊ីដែលមិនទទួលស្គាល់ការចោទប្រកាន់របស់តុលាការហូឡង់ បានបដិសេធមិនបញ្ជូនជនជាតិរបស់ខ្លួនទៅតុលាការហូឡង់។
សម្រាប់ក្រុមគ្រួសារជនរងគ្រោះ មកពី១០ប្រទេស ការចេញសាលក្រម នៅ៨ឆ្នាំ ក្រោយសោកនាដកម្មផ្ទុះធ្លាក់យន្តហោះMH17 នឹងជួយឲ្យពួកគេបានធូរទ្រូងបន្តិច ព្រោះថា នៅទីបំផុត អ្នកទទួលខុសត្រូវ ត្រូវបានគេវែកមុខរកឃើញ និងផ្តន្ទាទោសឲ្យជាប់ពន្ធនាគារ។ ដើម្បីការស្វែងរកយុត្តិធម៌ដល់ទីបំផុត ក្រុមគ្រួសារជនរងគ្រោះបានអំពាវនាវឲ្យគេតាមរកចាប់ឧក្រិដ្ឋជនមកទទួលទោស តាមផ្លូវច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ