បារាំង៖ប្រធានាធិបតីលោកម៉ាក្រុងបរិហារលើសេណារីយ៉ូនៃការបំភិតបំភ័យស្តីពីការផ្តាច់ភ្លើងអគ្គិសនី
នៅក្នុងប្រទេសបារាំង ហានិភ័យនៃការផ្តាច់ភ្លើងអគ្គិសនីនារដូវរងារកំពុងក្លាយជាក្តីបារម្ភខ្លាំងរបស់ពលរដ្ឋបារាំង។ ថ្មីៗនេះ រដ្ឋាភិបាលបានលម្អិតពីវិធានការមួយចំនួនដើម្បីប្រឈមនឹងការខ្វះភ្លើងអគ្គិសនីប្រើប្រាស់នៅពេលមានអាកាសធាតុចុះត្រជាក់ខ្លាំង ក្នុងនោះក៏មានវិធានការផ្តាច់ភ្លើងអគ្គីសនីមួយដែរ។ សេណារីយ៉ូនៃការផ្តាច់ភ្លើងអគ្គិសនីនេះត្រូវបានក្រុមប្រឆាំងប្រើជាឧបករណ៍ដើម្បីរិះគន់ វាយប្រហាររដ្ឋាភិបាលយ៉ាងចាស់ដៃ។ តែអ្នកនាំពាក្យរដ្ឋាភិបាលធ្លាប់បានធានាថា ការផ្តាច់ភ្លើងអគ្គិសនីនារដូវរងារនឹងអាចចៀសបាន បើពលរដ្ឋប្រើភ្លើងដោយសន្សំសំចៃ។ ចំណែកប្រធានាធិបតីលោកម៉ាក្រុងបានអះអាងក្នុងថ្ងៃសៅរ៍ ទី៣ ធ្នូកុំឲ្យពលរដ្ឋជ្រួលច្របល់ក្នុងរឿងផ្តាច់ភ្លើងនេះ។ ក្នុងថ្ងៃអង្គារ ទី៦ ធ្នូនាកិច្ចប្រជុំកំពូលអឺរ៉ុប និងក្រុមប្រទេសតំបន់បាល់កង់រៀបចំក្នុងប្រទេសអាល់បានី លោកម៉ាក្រុងបានបញ្ចេញប្រតិកម្មជាថ្មីនៅក្នុងរឿងដដែលនេះដោយបានដំឡើងសំឡេងបរិហារខ្លាំងៗលើការជជែកវែកញែក និងសេណារីយ៉ូដែលលោកហៅជាសេណារីយ៉ូនៃការបំភិតបំភ័យ។
ចុះផ្សាយនៅថ្ងៃ៖
ស្តាប់ - ០១:៤១
« ការជជែកវែកញែកក្នុងរឿងផ្តាច់ភ្លើងអគ្គិសនី គឺមិនសមហេតុសមផល មិនទំនងទាល់តែសោះ។ តួនាទីរបស់រដ្ឋអំណាចសាធារណៈ និងតួនាទីរបស់រោងចក្រសហគ្រាសរដ្ឋមិនមែនដើម្បីបញ្ជូនការបំភិតបំភ័យ ឬមួយក៏ដឹកនាំដោយការបំភិតបំភ័យ បន្លាចនោះទេ។ ដូច្នេះ តួនាទីរបស់រដ្ឋាភិបាល តួនាទីរដ្ឋមន្រ្តីទាំងអស់ រួមទាំងតួនាទីរបស់ក្រុមហ៊ុនផលិតថាមពលផង គឺត្រូវផ្តល់ថាមពល………….វាមានតែប៉ុណ្ណឹង។
បន្ទាប់មក គឺត្រូវអំពាវនាវឲ្យមនុស្សម្នាក់ៗមានការទទួលខុសត្រូវនៅក្នុងការសន្សំសំចៃភ្លើងអគ្គិសនី។ មិនមែនជាការចាប់ផ្តើមដោយការបំភិតបំភ័យមនុស្សជាមួយនឹងសេណារីយ៉ូមិនសមហេតុសមផល និងជាមួយរឿងរ៉ាវផ្សេងទៀតដែលខ្ញុំបានឮនារយៈពេលប៉ុន្មានម៉ោងចុងក្រោយនេះទេ……………….សូមបិទបញ្ចប់វាឲ្យអស់ទៅ។
យើងជាប្រទេសធំមួយ។ យើងមានគំរូថាមពលដ៏ធំមួយ។ យើងនឹងមានថាមពលប្រើគ្រប់គ្រាន់នារដូវរងារនេះ ទោះមានសង្រ្គាមក៏ដោយ។ ដូច្នេះ ខ្ញុំស្នើឲ្យទាំងអស់គ្នាធ្វើការងាររបស់ខ្លួន។ ការងាររបស់ក្រុមហ៊ុនអគ្គិសនីបារាំង គឺត្រូវដាក់រោងចក្រអគ្គិសនីឲ្យដំណើរការ ការងាររបស់រដ្ឋាភិបាល គឺរៀបចំផែនការ ហើយការងាររបស់ទាំងអស់គ្នា គឺចូលរួមសន្សំសំចៃភ្លើងអគ្គិសនី។ សេណារីយ៉ូនៃការបន្លាច បំភិតបំភ័យ មិនមែនសម្រាប់ខ្ញុំទេ។ យើងស្ថិតនៅរួបរួមទាំងអស់គ្នា ហើយយើងបោះជំហានទៅមុខ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ