អ្នកជំនាញបារាំង៖ជំនួយយោធារបស់ប្រទេសបារាំងចំពោះប្រទេសអ៊ុយក្រែននៅមានកម្រិត
នៅថ្ងៃចន្ទ ទី៥ ធ្នូ រុស្ស៊ីបានបាញ់ស្រោចមីស៊ីលជាច្រើនគ្រាប់លើអ៊ុយក្រែនដោយបណ្តាលឲ្យដាច់បណ្តាញអគ្គិសនី និងប្រព័ន្ធទឹកស្អាតជាថ្មី។ ការវាយប្រហារដោយមីស៊ីលរបស់រុស្ស៊ីបានកើតមានឡើងក្នុងថ្ងៃចូលជាធរមាននូវយន្តការកំណត់តម្លៃប្រេងរុស្ស៊ីដែលជាទណ្ឌកម្មថ្មីរបស់បស្ចិមលោកប្រឆាំងរុស្ស៊ី។ តែរុស្ស៊ីបានព្រមានថា ទណ្ឌកម្មថ្មីមួយនេះនឹងគ្មានផលវិបាកលើប្រតិបត្តិយោធារបស់ខ្លួននៅអ៊ុយក្រែនទេ។ គួរបញ្ជាក់ថា ទន្ទឹមនឹងជួយអ៊ុយក្រែនតាមរយៈការដាក់ទណ្ឌកម្មសេដ្ឋកិច្ចលើរុស្ស៊ី បស្ចិមលោកក៏បានជួយជាអាវុធឲ្យអ៊ុយក្រែនដែរ។ ក្នុងចំណោមប្រទេសដែលបានផ្តល់អាវុធឲ្យអ៊ុយក្រែនច្រើនជាងគេក៏មានបារាំងមួយដែរ។ តែអ្នកជំនាញបារាំងលោកឡេអូ ប៉េរីយ៉ាតបានកត់សម្គាល់ឃើញថា ជំនួយយោធារបស់បារាំងចំពោះអ៊ុយក្រែននៅមានកម្រិតនៅឡើយ បើធៀបនឹងប្រទេសអឺរ៉ុបមួយចំនួន។
ចុះផ្សាយនៅថ្ងៃ៖
ស្តាប់ - ០២:០២
« ជំនួយយោធារបស់អង់គ្លេសចំពោះអ៊ុយក្រែនគឺប្រហាក់ប្រហែលនឹងប្រទេសបារាំងដែរ។ តែអ្វីដែលខុសគ្នានៅត្រង់ថា អង់គ្លេសបានចាប់ផ្តើមយកចិត្តទុកដាក់ជួយអ៊ុយក្រែនតាំងពីឆ្នាំ ២០១៤ តាមរយៈបេសកកម្មនៃការបណ្តុះបណ្តាល ការផ្គត់ផ្គង់សម្ភារៈបរិក្ខារយោធាដែលមានកាន់តែច្រើនទៅៗ។ ចំណែកបារាំងហាក់បានចាប់ផ្តើមពីចំណុចសូន្យ ព្រោះក្នុងពេលនោះ បារាំងបានជាប់ដៃនៅកន្លែងផ្សេង ពិសេសនៅតំបន់អាហ្រ្វិក និងនៅតំបន់មជ្ឈិមបូព៌ា។ នេះជាភាពខុសគ្នាមួយគួរឲ្យកត់សម្គាល់។
ឥឡូវនេះ ហេតុអ្វីបានជាអង់គ្លេសមានលទ្ធភាពផ្តល់គ្រឿងសព្វាវុធច្រើនដល់ម្លឹងឲ្យអ៊ុយក្រែន?។ មូលហេតុ គឺមកពីអង់គ្លេសខ្លួនឯងបានផ្តើមកាត់បន្ថយកម្លាំងទ័ពជើងគោក។ ដល់អ៊ីចឹងទៅ អង់គ្លេសមានសល់គ្រឿងសព្វាវុធក្នុងបរិមាណមួយចំនួននៅក្នុងដៃ។ តែចូរកុំភ្លេចថានៅអង់គ្លេសក៏ដូចនៅអាល្លឺម៉ង់ ការស្តុកអាវុធមានលក្ខណៈខុសគ្នា បើធៀបនឹងប្រទេសផ្សេង។ នៅអង់គ្លេសក៏ដូចនៅអាល្លឺម៉ង់ បើមានឡានទាហានមួយឈប់ប្រើនៅក្នុងកងទ័ព ឡានទាហាននោះត្រូវបានកងទ័ពបន្តរក្សាទុករយៈពេលប៉ុន្មានឆ្នាំ ពោលមិនបោះចោលភ្លាមៗទេ។
គេបានឃើញនៅអាល្លឺម៉ង់ ឡានទាហានឈប់ប្រើនៅក្នុងកងទ័ពក្នុងឆ្នាំ ២០១ដែលបានរក្សាទុកក្នុងឃ្លាំងត្រូវបានអាល្លឺម៉ង់បញ្ជូនទៅឲ្យអ៊ុយក្រែន។ ចំណែកករណីបារាំងវិញ ឡានទាហានដែលឈប់ប្រើនៅក្នុងកងទ័ពត្រូវបានបោះចោលភ្លាមៗដោយមិនស្តុកទុកទេ។ ឧទាហរណ៍ជាក់ស្តែង រថពាសដែកខ្លះដែលបានធ្វើទំនើបកម្មក្នុងឆ្នាំ ២០០០ និងបានឈប់ប្រើក្នុងឆ្នាំ ២០១៦ ត្រូវបានបោះចោលតែម្តង។ អ៊ីចឹងហើយបានជានៅពេលសង្រ្គាមមកដល់ យើងគ្មានលទ្ធភាពពិតប្រាកដក្នុងការផ្តល់ឲ្យអ៊ុយក្រែន »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ