កាតា ព្រមានពីឥទ្ធិពលអវិជ្ជមាននៃវិធានការអឺរ៉ុបប្រឆាំងនឹងអំពើពុករលួយ
វិធានការរបស់សភាអឺរ៉ុបប្រឆាំងនឹងកាតា ក្រោយផ្ទុះរឿងអាស្រូវពុករលួយក្នុងវង្វង់ស្ថាប័នអឺរ៉ុប នឹងជះផលវិបាកអវិជ្ជមានដល់ទំនាក់ទំនងរវាងរាជាណាចក្រប្រេងកាតកាតា និងការផ្គត់ផ្គង់ថាមពលពិភពលោក។ នេះជាពាក្យព្រមានរបស់ក្រុងដូហា នៅថ្ងៃអាទិត្យទី ១៨ធ្នូ ថ្ងៃបិទបញ្ចប់ការប្រកួតបាល់ទាត់ពិភពលោក។
ចុះផ្សាយនៅថ្ងៃ៖
ស្តាប់ - ០២:០៨
នៅក្នុងសេចក្តីថ្លែងការណ៍ តំណាងការទូតកាតា បានសម្តែងការសោកស្តាយចំពោះសេចក្តីសម្រេចរបស់សភាអឺរ៉ុប ដែលគ្មានមូលដ្ឋាន ដែលផ្អែកលើព័ត៌មានមិនពិត ឮតាមការពាក្យលេចធ្លាយ ដោយមិនរង់ចាំលទ្ធផលអង្កេត។ សម្រាប់កាតា ការអង្កេតប្រឆាំងនឹងអំពើពុករលួយមានពាក់ព័ន្ធច្រើនប្រទេស ប៉ុន្តែហេតុអ្វីបានជាពាក្យរិះគន់ និងការវាយប្រហារសំដៅតែលើកាតា ?!
“សេចក្តីសម្រេចចាត់វិធានការប្រឆាំងកាតា ដោយកំរិតកិច្ចសហប្រតិបត្តិការ និងការប្រាស្រ័យទាក់ទងគ្នា ក្នុងអំឡុងពេលបើកអង្កេត នឹងជះឥទ្ធិពលអាក្រក់លើកិច្ចសហប្រតិបត្តិការ តំបន់និងពិភពលោក ក្នុងវិស័យសន្តិសុខ និងលើកិច្ចពិភាក្សាដែលកំពុងប្រព្រឹត្តទៅជុំវិញភាពកម្រនិងសន្តិសុខថាមពលពិភពលោក”។ នេះបើតាមប្រតិកម្មរបស់អ្នកការទូតកាតា ដោយច្រានចោលយ៉ាងដាច់អហង្ការពាក្យចោទប្រកាន់របស់អឺរ៉ុប។
កាតាជាប្រទេសផលិតឧស្ម័នធម្មជាតិពង្រាវដ៏ចម្បងនៅលើពិភពលោកជាមួយអាមេរិកនិងអូស្ត្រាលី។ តាំងពីរុស្ស៊ីចូលធ្វើសង្គ្រាមឈ្លានពានអ៊ុយក្រែនមក ក្រុមប្រទេសនៅអឺរ៉ុបកាន់តែច្រើនឡើងៗប្រឹងចែចូវកាតា ដើម្បីស្វែងរកប្រភពថាមពលមកជំនួសឧស្ម័នរុស្ស៊ី។ តែ ក្រោយផ្ទុះរឿងអាស្រូវពុករលួយនៅសភាអឺរ៉ុប សមាជិកសភាអឺរ៉ុប បានបោះឆ្នោតអនុម័តស្ទើរជាឯកច្ឆ័ន្ទអត្ថបទច្បាប់មួយស្នើសុំឱ្យសភាអឺរ៉ុបផ្អាកទំនាក់ទំនងជាមួយក្រុមអង្គការផ្សេងៗតំណាងឱ្យផលប្រយោជន៍កាតា និងការព្យួរកិច្ចការសភាដែលមានពាក់ព័ន្ធនឹងកាតា ដូចជា ក្នុងផ្នែកផ្តល់ទិដ្ឋាការ ឬ កិច្ចព្រមព្រៀងផ្នែកអាកាសចរណ៍។
ប៉ុន្តែសេចក្តីថ្លែងការណ៍កាតាថ្ងៃអាទិត្យនេះ ក៏បានគូសបញ្ជាក់អំពីចំណងទំនាក់ទំនងយ៉ាងរឹងមាំជាមួយប្រទេសជាច្រើន ក្នុងសហភាពអឺរ៉ុប ដែលបន្តផ្តល់ទំនុកចិត្តលើកាតា ក្នុងពេលកំពុងរងការរិះគន់និងវាយប្រហារ។ សូមបញ្ជាក់ថា ទោះបីមានរឿងអាស្រូវយ៉ាងដូច្នេះក្តី ក៏ប្រធានាធិបតីបារាំងនៅតែធ្វើដំណើរទៅចូលរួមផ្ទាល់ ក្នុងវគ្គពាក់កណ្តាលផ្តាច់ព័ត្រ និងផ្តាច់ព័ត្រ ដើម្បីគាំទ្រក្រុមកីឡាករបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ