តើអ្វីទៅជាកម្មវត្ថុនៃទស្សនកិច្ចរបស់ លោកពូទីន នៅបេឡារុស ?
នៅថ្ងៃទី ១៩ ធ្នូនេះ បេឡារុស កំពុងត្រៀមលក្ខណៈទទួលស្វាគមន៍ដំណើរទស្សនកិច្ចផ្លូវការរបស់លោកប្រធានាធិបតីរុស្ស៊ី វ្លាដេមៀ ពូទីន។ ក្នុងបរិបទបច្ចុប្បន្ន ពង្រឹងសម្ព័ន្ធភាពរុស្ស៊ី-បេឡារុស ជាប្រការដ៏ចាំបាច់ជាងពេលណាៗទាំងអស់។ មូស្គូ ក៏ត្រូវការ និងរំពឹងលើការគាំទ្រដ៏ធំធេងរបស់ក្រុងមីនស្ក៍ដែរ។
ចុះផ្សាយនៅថ្ងៃ៖
ស្តាប់ - ០២:២១
តាំងពីផ្ទុះកូវីដ១៩មក ប្រធានាធិបតីរុស្ស៊ី លោក វ្លាដេមៀពូទីន កម្រធ្វើដំណើរទៅបរទេសណាស់ និងខកខានមិនបានមកបេឡារុស អស់រយៈពេលបីឆ្នាំកន្លះហើយ។ ក្រុងមីនស្ក៍ ទើបមានឱកាសលាកម្រាលព្រំស្វាគមន៍ជាថ្មីមហាមិត្តរុស្ស៊ីនៅពេលនេះ។ តាមរបៀបវារៈ ជំនួបពិភាក្សារវាងប្រមុខដឹកនាំទាំងពីរ ផ្តោតជាបឋមលើសំណុំរឿងសេដ្ឋកិច្ច។ លោកប្រធានាធិបតីបេឡារុស អាឡិចសង់ លូកាឆេនកូ ប្រាថ្នាអនុម័តវិធានការបន្ទាន់ដើម្បីស្ថិរភាពហិរញ្ញវត្ថុ។ រដ្ឋាភិបាលបេឡារុសទទួលបានកម្ចីឥណទានពីរុស្ស៊ីជាញឹកញយណាស់។
ចំណែកខាងរុស្ស៊ីវិញ ក៏ត្រូវការចង់ស្រូបយកបេឡារុសឱ្យចូលក្នុងប្រព័ន្ធរបស់សហព័ន្ធរុស្ស៊ីដែរ។ តាំងពីយូរឆ្នាំមកហើយដែលលោកវ្លាដេមៀពូទីន សំឡឹងចង់បាន ជាពិសេសតាំងពីប្រធានាធិបតី លូកាឆេនកូ ចុះខ្សោយដោយត្រូវប្រឈមខ្យល់ប្រឆាំងក្នុងប្រទេសកាលពីរដូវក្តៅឆ្នាំ២០២០មក។ រហូតមកទល់ពេលនេះ ការបញ្ចូលបេឡារុសក្នុងប្រព័ន្ធរុស្ស៊ី ធ្វើឡើងក្នុងក្របខ័ណ្ឌសេដ្ឋកិច្ចទេ ប៉ុន្តែនៅចំពោះមុខស្ថានភាពសន្តិសុខបច្ចុប្បន្ន ក្រេមឡាំងអាចនឹងចង់ចាប់បេឡារុសបញ្ចូលក្នុងកម្មវិធីយោធារបស់ខ្លួនដែរ?!
ទស្សនកិច្ចរបស់លោកពូទីន នៅបេឡារុស ប្រព្រឹត្តទៅតែ១០ខែក្រោយការបើកប្រតិបត្តិការយោធាចូលឈ្លានពានអ៊ុយក្រែន ដែលកាលណោះ ចំណុចចាប់ផ្តើមជាច្រើនមានចេញពីទឹកដីបេឡារុសផង។ កាលពីខែតុលា បេឡារុស បានប្រកាសបង្កើតកងកម្លាំងរួមជាមួយរុស្ស៊ី ដោយមានយោធារុស្ស៊ីជាច្រើនពាន់នាក់បានធ្វើដំណើរមកដល់ទឹកដីបេឡារុស។ នៅថ្ងៃចន្ទនេះ បើតាមការអះអាងរបស់ទីភ្នាក់ងារសារព័ត៌មាន Interfax កងពលរុស្ស៊ី ជាច្រើនកងនឹងធ្វើលំហាត់សឹកតាកទិក នៅបេឡារុស តាមបណ្តោយព្រំដែនអ៊ុយក្រែន។ ពុំមានការបញ្ជាក់លម្អិតអំពីកាលបរិច្ឆេទ និងទីតាំងពិតប្រាកដនៃសមយុទ្ធដែលប្រកាសឡើងក្នុងថ្ងៃទស្សនកិច្ចរបស់លោកពូទីន នៅបេឡារុសទេ។
ហេតុដូច្នេះហើយបានជា ក្រុមលោកខាងលិច និងអ៊ុយក្រែន សង្ស័យថាលោកពូទីន ធ្វើដំណើរមកក្រុងមីនស្ក៍ ដើម្បីដាក់សម្ពាធលើប្រធានាធិបតីបេឡារុសលោក លូកាឆេនកូ ឱ្យចូលរួមយ៉ាងសកម្មឡើងក្នុងសង្គ្រាមនៅអ៊ុយក្រែន។ សម្រាប់មេបញ្ជាការកងទ័ពអ៊ុយក្រែន អាចនឹងមានការវាយលុកថ្មីលើក្រុងកៀវ នៅក្នុងអំឡុងរដូវត្រជាក់ដើមឆ្នាំ២០២៣ផង។ ប្រធានាធិបតីអ៊ុយក្រែន ហ្សេឡេនស្គី បានអះអាងនៅល្ងាចមិញថា ការការពារព្រំដែនជាមួយរុស្ស៊ី និងបេឡារុស ជាអាទិភាពជានិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ