រដ្ឋមន្រ្តីការបរទេសអូស្ត្រាលី ធ្វើដំណើរទស្សនកិច្ច លើកទី១ ទៅប្រទេសចិន
ថ្ងៃអង្គារ៍ ទី២០ធ្នូ រដ្ឋមន្ត្រីកិច្ចការបរទេសអូស្ត្រាលី ធ្វើដំណើរទស្សនកិច្ចផ្លូវការជាលើកទី១ ទៅប្រទេសចិន។ ក្នុងរយៈពេល៤ឆ្នាំចុងក្រោយនេះ គ្មានដំណើរទស្សនកិច្ចផ្លូវការណាមួយរៀបចំធ្វើឡើងទេ បន្ទាប់ពីប្រទេសទាំងពីរជួបបញ្ហាទំនាស់ការទូត និងទំនាស់ផ្នែកសេដ្ឋកិច្ចពាណិជកម្ម ឈានដល់ការដាក់ទណ្ឌកម្មគ្នាទៅវិញទៅមក។
ចុះផ្សាយនៅថ្ងៃ៖
ស្តាប់ - ០២:២៧
រដ្ឋបាលទីក្រុងកង់បេរ៉ា បានប្រកាសបញ្ជាក់ថា រដ្ឋមន្ត្រីការបរទេស អញ្ជើញទៅរដ្ឋធានីប៉េកាំង ដើម្បីអបអរខួប ៥០ឆ្នាំ នៃទំនាក់ទំនងទូតរបស់រដ្ឋទាំងពីរ ហើយប្រមុខការទូតអូស្ត្រាលីអ្នកស្រី ផែន្នី វុង និងជួបពិភាក្សាជាមួយប្រមុខការទូតចិន លោក វ៉ាង យី។
កាលពីថ្ងៃច័ន្ទ អ្នកនាំពាក្យក្រសួងការបរទេសចិន ប្រកាសពីប៉េកាំង ក្នុងន័យថា ដំណើរទស្សនកិច្ចរបស់ប្រមុខការទូតអូស្ត្រាលីអ្នកស្រី ផែន្នី វុង គឺដើម្បីជំរុញកិច្ចពិភាក្សាគ្នា ហើយថ្លឹងថ្លែងពីភាពខុសគ្នា ហើយនិងពង្រឹកកិច្ចសហប្រតិបត្តិការទ្វេភាគីឲ្យល្អឡើងវិញ។
ការបើកផ្លូវឲ្យមានដំណើរទស្សនកិច្ចផ្លូវការរបស់រដ្ឋមន្ត្រីការបរទេសអូស្ត្រាលីនេះ គឺបន្ទាប់ពី នាយករដ្ឋមន្ត្រីអូស្ត្រាលី និង ប្រធានាធិបតីចិន បានជួបជជែកគ្នា នៅកោះបាលី កាលពីខែវិច្ឆិកា កន្លងទៅថ្មីៗ។ នេះជាជំហានឈានទៅបើកច្រកការទូតឡើងវិញ។
គួររំឭកជូនថា ប្រទេសទាំងពីរទាស់ទែងខ្វែងគំនិតគ្នា ៤ឆ្នាំមកហើយ។ អូស្ត្រាលី មិនពេញចិត្តនឹងការផ្សាយឥទ្ធិពលកាន់តែខ្លាំងឡើងៗរបស់ចិននៅក្នុងតំបន់អាស៊ី ហើយក៏មិនគាំទ្រចំពោះការរឹតត្បិតជ្រុលរបស់ចិន នៅតំបន់ខេត្តស៊ីនជាំង នៅទីបេ និងនៅហុងកុង។ ឆ្នាំ២០២០ អូស្ត្រាលី បានហាមឃាត់មិនឲ្យចរាចរណ៍លក់ដូរ ទូរសព្ទ Huawei និងហាមដាច់ខានប្រព័ន្ធអ៊ិនធ័រនែតល្បឿនលឿន 5G របស់ចិន ហើយអូស្ត្រាលី ក៏ថែមទាំងនាំអាទិ៍ជំរុញឲ្យស៊ើបអង្កេតប្រភពដើមដំបូង នៃមេរោគកូវីដ១៩ ។
ទាំងនេះ ធ្វើឲ្យរដ្ឋបាលក្រុងប៉េកាំងខឹងខ្លាំង។ ចិនបានប្រតិកម្មជាបន្តបន្ទាប់ ឈានដល់ការដាក់ទណ្ឌកម្មសេដ្ឋកិច្ច-ពាណិជ្ជកម្ម គ្នាទៅវិញទៅមក។ ចិនជាប្រទេសដៃគូពាណិជ្ជកម្មធំជាងគេរបស់អូស្ត្រាលី។ ចិនផ្គត់ផ្គង់ សារធាតុរ៉ែ និងលោហៈ ដល់អូស្ត្រាលី។
ក្នុងរបៀបវរៈនៃដំណើរទស្សនកិច្ចនេះ ប្រមុខការទូតអូស្ត្រាលីបញ្ជាក់ថានឹងដាក់បញ្ចូលលក្ខខណ្ឌឲ្យដោះលែងជនជាតិអូស្ត្រាលីដែលចិនប៉េកាំងចាប់ខ្លួននិងកាត់ទោស។ ក្នុងនោះយ៉ាងហោច មានអ្នកកាសែតពីរនាក់ ដែលសុទ្ធសឹងតែជាជនជាតិអូស្ត្រាលីដើមកំណើតចិន។ ម្នាក់ឈ្មោះ ចេង លី ត្រូវអាជ្ញាធរចិន ចាប់ខ្លួនពីខែតុលា២០២០ ក្រោមបទចោទប្រកាន់ផ្តល់ព័ត៌មានសម្ងាត់ជាតិដល់រដ្ឋបរទេស។ ម្នាក់ទៀត យ៉ាង ជុន ត្រូវរដ្ឋអំណាចចិន ចាប់ខ្លួនដើមឆ្នាំ២០១៩ និងកោតទោសពីបទប្រព្រឹត្តអំពើចារកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ