អូស្ត្រាលីនឹងបន្តសហការជាមួយសាឡូម៉ុង បើទោះបីមានកិច្ចព្រមព្រៀងសន្តិសុខចិន និងសាឡូម៉ុង
កិច្ចព្រមព្រៀងសន្តិសុខ ដ៏ចម្រូងចម្រាសរវាងចិន និងប្រទេសកោះ សាឡូម៉ុងនឹងមិនធ្វើឲ្យកិច្ចព្រមព្រៀងសន្តិសុខ អូស្ត្រាលី-សាឡូម៉ុងត្រូវបិទបញ្ចប់នោះឡើយ។ នៅក្នុងបទសម្ភាសន៍ជាមួយទូរទស្សន៍អូស្ត្រាលី ABC កាលពីថ្ងៃអាទិត្យ រដ្ឋមន្រ្តីការបរទេសអូស្ត្រាលី បានអះអាងថា អូស្ត្រាលីនឹងនៅតែបន្តសហការ ខាងផ្នែកសន្តិសុខ ជាមួយ ប្រទេសកោះ សាឡូម៉ុង។
ចុះផ្សាយនៅថ្ងៃ៖
ស្តាប់ - ០២:៣៦
កិច្ចព្រមព្រៀងសន្តិសុខ ដែលនឹងអនុញ្ញាតឲ្យចិនបញ្ជូនកងទ័ព និងនាវាចម្បាំងទៅចតនៅប្រទេសកោះសាឡូម៉ុង បានធ្វើឲ្យអាមេរិក និងបណ្តាប្រទេសនៅមហាសមុទ្រប៉ាស៊ីហ្វិកដទៃទៀត ជាពិសេស អូស្ត្រាលី កើតក្តីបារម្ភ នៅមិនស្រណុកចិត្ត។
នៅដើមខែមេសា នាយករដ្ឋមន្រ្តីសាឡូម៉ុង លោកManasseh Sogavare បានអះអាងថា លោកនឹងមិនអនុញ្ញាតឲ្យមានការសាងសង់មូលដ្ឋានទ័ពចិននៅប្រទេសកោះសាឡូម៉ុងដាច់ខាត។ ប៉ុន្តែ ពាក្យធានារបស់ប្រមុខរដ្ឋាភិបាលកោះសាឡូម៉ុងនៅតែមិនទាន់ធ្វើឲ្យប្រទេសជិតខាង នៅមហាសមុទ្រប៉ាស៊ីហ្វិក ជឿទុកចិត្ត។
នៅក្នុងបទសម្ភាសន៍ជាមួយទូរទស្សន៍អូស្ត្រាលី កាលពីថ្ងៃអាទិត្យ រដ្ឋមន្រ្តីការបរទេសអូស្ត្រាលី លោកស្រី Marise Payne បានវាយតម្លៃថា ការនិយាយធានារបស់រដ្ឋាភិបាលកោះសាឡូម៉ុងមានសារៈសំខាន់ណាស់ ប៉ុន្តែ អូស្ត្រាលីនៅតែព្រួយបារម្ភពីការខ្វះតម្លាភាពនៅក្នុងកិច្ចព្រមព្រៀងសន្តិសុខ ដែលសាឡូម៉ុងនឹងចុះហត្ថលេខាជាមួយចិន។
នៅសប្តាហ៍មុន រដ្ឋាភិបាលអូស្ត្រាលីបានបញ្ជូនរដ្ឋមន្រ្តីរបស់ខ្លួន ផ្នែកទទួលបន្ទុកកិច្ចការប៉ាស៊ីហ្វិកទៅជួប បញ្ចុះបញ្ចូលកុំឲ្យកោះសាឡូម៉ុងចុះហត្ថលេខាជាមួយ ចិន ប៉ុន្តែ នាយករដ្ឋមន្រ្តីសាឡូម៉ុងបានបដិសេធ មិនព្រមធ្វើតាម។ ផ្ទុយទៅវិញ លោកនឹងបញ្ជូនរដ្ឋមន្រ្តីការបរទេសកោះសាឡូម៉ុង ទៅកាន់បណ្តាប្រទេសនៅក្នុងតំបន់ប៉ាស៊ីហ្វិក ដើម្បី ពន្យល់លម្អិតពីខ្លឹមសារនៃកិច្ចព្រមព្រៀងសន្តិសុខចិន កោះសាឡូម៉ុង។ នាយករដ្ឋមន្រ្តីកោះសាឡូម៉ុង បញ្ជាក់ថា ប្រទេសប្រជុំកោះសាឡូម៉ុងដែលខ្លាំង និងស្ថិរភាព គឺជាប្រយោជន៍សន្តិសុខរួមនៅក្នុងតំបន់។
រដ្ឋមន្រ្តីការបរទេសអូស្ត្រាលីវិញ អះអាងថា បើទោះបីជាកោះសាឡូម៉ុងបង្កើតកិច្ចព្រមព្រៀងសន្តិសុខមួយទៀតជាមួយចិន ប៉ុន្តែ អូស្ត្រាលីនឹងនៅតែបន្តសហការផ្នែកសន្តិសុខជាមួយ កោះសាឡូម៉ុង។ លោកស្រីបានលើកយកឧទាហរណ៍ នៃការអនុវត្តកិច្ចព្រមព្រៀង ដូចជាការបញ្ជូនកងកម្លាំងផ្តល់ជំនួយរបស់ប្រទេសប៉ាស៊ីហ្វិក ដែលមានអូស្ត្រាលី នូវែលសេឡង់ ហ្វីជី និងប៉ាពូអាស៊ី នូវែលហ្គីណេ ទៅស្តារសណ្តាប់ធ្នាប់ នៅសាឡូម៉ុង ដែលរងរញ្ជួយដោយកុប្បកម្មហិង្សា ប្រឆាំងរដ្ឋាភិបាលកាលពីខែវិច្ឆិកាឆ្នាំមុន។
សេចក្តីព្រាងកិច្ចព្រមព្រៀងដែលបានបែកលេចធ្លាយទៅដល់កាសែតអូស្ត្រាលីបានបង្ហាញ ថា ទៅតាមកិច្ចព្រមព្រៀងចិន និងកោះសាឡូម៉ុង ចិននឹងអាចបញ្ជូន ប៉ូលិសរបស់ខ្លួន ទៅតាមសំណើរបស់អាជ្ញាធរសាឡូម៉ុង ដើម្បីទៅពង្រាយ រក្សាសណ្តាប់ធ្នាប់នៅ លើកោះសាឡូម៉ុង។ មួយវិញ ទៀតកងកម្លាំងចិននឹងត្រូវអនុញ្ញាតផងដែរឲ្យមានសិទ្ធិការពារបុគ្គលចិន និងគម្រោងវិនិយោគរបស់ចិន នៅលើកោះសាឡូម៉ុង។ គួររំលឹកថា នៅក្នុងមហាកុប្បកម្មដ៏ហិង្សា នៅលើកោះសាឡូម៉ុង កាលពីឆ្នាំមុន ក្រុមហ៊ុនចិនជាផ្ទាំងស៊ីបនៃការវាយប្រហារ និងរងការរើសអើងពីក្រុមកុប្បករ។ ក្រុមបក្សប្រឆាំងបានចោទប្រកាន់រដ្ឋាភិបាល ថា ពុករលួយ និងលុបចោលទំនាក់ទំនងជាមួយ តៃវ៉ាន់ ដើម្បីគ្រាន់តែចង់បានផលប្រយោជន៍លុយរបស់ចិនដោយមិនខ្វល់បញ្ហា ផលប៉ះពាល់ ដោយសារការវិនិយោគរបស់ចិន នៅលើកោះសាឡូម៉ុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ