រុស្ស៊ីទម្លាក់កំហុសលើការប្រើទូរស័ព្ទរបស់កូនទាហានថាហេតុនាំឱ្យអ៊ុយក្រែនប្លោងគ្រាប់ត្រូវស្លាប់ច្រើន
ក្រោយពីបានរកឃើញសាកសពថ្មីបន្ថែមទៀតមក រុស្ស៊ីបានប្រកាសនៅថ្ងៃពុធទី ៤មករានេះ ថាចំនួនមនុស្សស្លាប់ ក្នុងការបាញ់ប្លោងរបស់អ៊ុយក្រែន ក្នុងយប់ឆ្លងឆ្នាំ ទៅលើក្រុងម៉ាគីអ៊ីវកា បានកើនឡើងដល់៨៩នាក់។ សម្រាប់ក្រសួងការពារជាតិរុស្ស៊ី អ៊ុយក្រែនវាយប្រហារបានសម្រេចនិងបង្កឱ្យមានការបាត់បង់ជីវិតច្រើន ក៏ដោយសារតែទាហានរុស្ស៊ីលួចប្រើប្រាស់ទូរស័ព្ទដៃ ល្មើសនឹងវិន័យ។
ចុះផ្សាយនៅថ្ងៃ៖
នៅក្នុងសេចក្តីថ្លែងការណ៍ រុស្ស៊ីបានអះអាងថាគណៈកម្មការកំពុងបើកអង្កេតជុំវិញបរិបទដែលនាំឱ្យអ៊ុយក្រែនអាចដៅទីតាំងវាយប្រហារមកចំអាគារមួយដែលមានទាហានរុស្ស៊ីកំពុងស្នាក់នៅ។ ការប្រើទូរស័ព្ទចល័ត ផ្ទាល់ខ្លួន ដោយខុសច្បាប់ ក្នុងចំនួនដ៏ច្រើន ជាកត្តានាំឱ្យសត្រូវអាចកំណត់ទីតាំងរបស់ទាហាន ហើយតម្រង់មីស៊ីលបាញ់មកចំ ដោយតាមការពិតទៅនោះមីស៊ីលទាំងបួនអ៊ុយក្រែនតម្រង់សាលារៀនទេ។ នេះបើតាមក្រសួងការពារជាតិរុស្ស៊ីដដែល។
ប៉ុន្តែបើតាមលោក Semyon Pegov អ្នកកាសែត ក្នុងសមរភូមិសង្គ្រាម ដែលធ្លាប់បានទទួលមេដាយកិត្តិយសពីលោកពូទីនកាលពីចុងឆ្នាំ២០២២ ហេតុផលផ្តល់ដោយក្រសួងការពារជាតិរុស្ស៊ី មិនសូវគួរឱ្យជឿទេ។ អ៊ុយក្រែនទំនងជាអាចស៊ើបដឹងព័ត៌មានដោយប្រើដ្រូនជាជំនួយ ឬដោយភ្នាក់ងារចារកិច្ច មិនមែនរំពឹងតែលើការចាប់សញ្ញានៃការប្រើប្រាស់ទូរស័ព្ទចល័តទេ។ នេះជាបើតាមសំណេររបស់លោក Semyon Pegov ក្នុងបណ្តាញសង្គមTelegram ដោយបន្ថែមថាតុល្យការនៃទាហានបាត់ជីវិតប្រហែលនឹងកើនឡើងច្រើនបន្ថែមទៀត ព្រោះបញ្ជីឈ្មោះចំនួនទាហានបាត់ខ្លួនវែងខ្លាំងណាស់។ គ្រាន់តែលោកមិនអាចបញ្ជាក់ប្រភពបានតែប៉ុណ្ណោះ។ បើតាមប្រភពយោធាអ៊ុយក្រែន មានទាហានរុស្ស៊ីប្រមាណ៤០០នាក់បានបាត់បង់ជីវិតនៅក្នុងការវាយប្រហារលើក្រុងម៉ាគីអ៊ីវកានេះ។
នេះជាការបាត់បង់ជីវិតទាហានយ៉ាងធ្ងន់ធ្ងរបំផុត គិតចាប់តាំងពីរុស្ស៊ីបើកប្រតិបត្តិការចូលឈ្លានពានអ៊ុយក្រែន នៅថ្ងៃទី ២៤កុម្ភៈ២០២២មក។ ខុសពីទម្លាប់ នេះក៏ជាលើកដំបូងដែរដែលអាជ្ញាធររុស្ស៊ីបានប្រកាសទទួលស្គាល់ជាសាធារណៈ និងជួបប្រជុំគ្នាឧទ្ទិសដល់វិញ្ញាណក្ខន្ធយោធាពលីជីវិត។ ប៉ុន្តែសម្រាប់អ្នកជំនាញ និងអ្នកស្រាវជ្រាវ រុស្ស៊ី មិនអាចលាក់បាំងព័ត៌មានបានទៀតទេ។ ក្រសួងការពារជាតិ គ្មានលទ្ធភាពបញ្ចេញប្រតិកម្មតបនឹងការវាយប្រហាររបស់អ៊ុយក្រែន ហើយទោះបីមានការហាមឃាត់និងត្រួតពិនិត្យប្រព័ន្ធផ្សព្វផ្សាយព័ត៌មានយ៉ាងណាក៏ដោយ ក៏ដំណឹងបានលេចធ្លាយពេញបណ្តាញសង្គម តពីមាត់មួយទៅមាត់មួយ តាមទូរស័ព្ទដែលទាហានហៅទៅម្តាយ និងពីម្តាយម្នាក់ទៅម្តាយម្នាក់ទៀត។ ដល់ពេលមួយដែលរុស្ស៊ីលែងមិនអាចបិទបាំងព័ត៌មានទៀតហើយ បើទោះបីនៅក្នុងសារជូនពរឆ្នាំថ្មី លោកប្រធានាធិបតីពូទីន ថ្លែងយ៉ាងណាក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ