HRW ៖ អន្តរជាតិគួរគាំទ្រសិទ្ធិមនុស្សក្នុងប្រទេសផ្សេងដូចធ្វើនៅអ៊ុយក្រែន
នៅក្នុងរបាយការណ៍ប្រចាំឆ្នាំចេញផ្សាយនៅថ្ងៃព្រហស្បតិ៍ទី ១២មករា២០២៣ អង្គការការពារសិទ្ធិមនុស្សHumain Right Watch បានអះអាងថាសហគមអន្តរជាតិគួរតែមានសកម្មការពារសិទ្ធិមនុស្សនៅក្នុងបណ្តាប្រទេសផ្សេងទៀតដែលរងគ្រោះ ដូចប្រតិកម្មដែលបានធ្វើជាមួយអ៊ុយក្រែន។ តាំងពីរុស្ស៊ីបើកប្រតិបត្តិការយោធាចូលឈ្លានពានអ៊ុយក្រែនមក សហគមន៍អន្តរជាតិឆ្លើយដោយស៊ីចង្វាក់ ប្រឆាំងតបនឹងការរំលោភសិទ្ធិនៅអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:០០
ដើម្បីបរិហារទង្វើរំលោភសិទ្ធិមនុស្ស របាយការណ៍ប្រចាំឆ្នាំ កម្រាស់៧០០ទំព័រ បានរៀបរាប់រាល់គ្រប់សកម្មភាពរំលោភសិទ្ធិមនុស្សនៅលើពិភពលោក ក្នុងឆ្នាំ២០២២ តាំងពីប្រទេសចិនទៅដល់អាហ្វហ្កានីស្ថាន ដោយឆ្លងទៅអ៊ីរ៉ង់ អេត្យូពី និងមិនរំលងឡើយប្រទេសអ៊ុយក្រែន។
អង្គការការពារសិទ្ធិមនុស្សHRWបានរំលើកឡើងអំពីការរំលោភសិទ្ធិមនុស្សពីគ្រប់ភាគី តែកងកម្លាំងរុស្ស៊ីជាដើមហេតុនៃទង្វើល្មើសដ៏ច្រើនលើសលុប ជាពិសេសការរំលោភលើជនស៊ីវិល និងបានកោតសរសើរភាពរហ័សរហួនរបស់តុលាការព្រហ្មទណ្ឌក្នុងការក្តោបសំណុំរឿងនៅអ៊ុយក្រែននេះ ព្រមទាំងប្រតិកម្មរហ័សរបស់សហភាពអឺរ៉ុប សហរដ្ឋអាមេរិក អង់គ្លេស និងបណ្តារដ្ឋាភិបាលផ្សេងទៀត ក្នុងការដាក់ទណ្ឌកម្មយ៉ាងធ្ងន់ធ្ងរគ្មានប្រៀបលើរុស្ស៊ី។
សម្រាប់លោកស្រីនាយកប្រតិបត្តិស្តីទីរបស់HRW ថ្វីបើអ៊ុយក្រែនធ្លាក់ក្នុងភាពខ្មៅងងឹតនៃផ្សែងសង្គ្រាមមែន តែពន្លឺរះជាប់ជានិច្ច នោះគឺសកម្មភាពរបស់សហគមន៍អន្តរជាតិ និងស្ថាប័នយុត្តិធម៌អន្តរជាតិ។ “ពិតជាពុំធ្លាប់មានទេក្នុងប្រវត្តិសាស្ត្រ ដែលអន្តរជាតិឆ្លើយតបទៅនឹងជម្លោះមួយ ប្រកបដោយភាពស៊ីចង្វាក់យ៉ាងនេះ”។
សូមឱ្យទង្វើចំពោះអ៊ុយក្រែន មានកើតនៅក្នុងបណ្តាប្រទេសផ្សេងទៀត ដូចជានៅអេត្យូពី ចិន ឬ អ៊ីរ៉ង់ ៖ ដើម្បីនាំអ្នកទទួលខុសត្រូវលើទង្វើកាប់សម្លាប់នៅតំបន់ទីហ្ក្រេ ប្រទេសអេត្យូពី យល់ពីតម្លៃនៃកិច្ចព្រមព្រៀងសន្តិភាពដែលរុស្ស៊ីនិងចិនបានរារាំងនៅក្រុមប្រឹក្សាសន្តិសុខអង្គការសហប្រជាជាតិ- ដើម្បីប្រឆាំងនឹងនយោបាយចិនចំពោះជនជាតិភាគតិចអ៊ុយហ្កួរ ដែលអំពើខ្លះអាចមានទម្រង់ជាឧក្រិដ្ឋកម្មប្រឆាំងមនុស្សជាតិ- ដើម្បីជួយប្តូរស្ថានភាពសិទ្ធិមនុស្សនៅអ៊ីរ៉ង់ ដែលតេហេរ៉ង់បង្ក្រាបបាតុករយ៉ាងសន្ធាប់។ នេះជាសម្រែកអំពាវនាវរបស់លោកស្រីប្រធានប្រតិបត្តិស្តីទីរបស់អង្គការHRW។
ជាចុងក្រោយរបាយការណ៍ HRW បានចោទប្រកាន់ការប្រើស្តង់ដារពីរ ជុំវិញបញ្ហាសិទ្ធិមនុស្ស ដោយលើកឧទាហរណ៍ជាក់ស្តែងថា លោកប្រធានាធិបតីអាមេរិកត្រលប់ទៅភ្ជាប់ទំនាក់ទំនងជាមួយអារ៉ាប៊ីសាអូឌីត ព្រោះត្រូវការថាមពល ឬអឺរ៉ុបស្វាគមន៍ជនភៀសខ្លួនអ៊ុយក្រែន តែមិនខ្វល់នឹងអនាគតរបស់ជនភៀសខ្លួនអាហ្វហ្កានីស្ថានឬស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ