បារាំងចាប់ពិនិត្យច្បាប់អន្តោប្រវេសន៍ ពន្លឿនការបណ្តេញជនខិលខូច តែសម្រួលដល់សិទ្ធិជ្រកកោនការងារ
កំពុងតែរងព្យុះបាតុកម្មប្រឆាំងនឹងកំណែទម្រង់ច្បាប់សោធននិវត្តន៍ គណៈរដ្ឋមន្ត្រីបារាំងត្រូវចាប់ពិភាក្សា នៅថ្ងៃអង្គារទី ១កុម្ភៈ អំពីសេចក្តីព្រាងច្បាប់ស្តីអំពីអន្តោប្រវេសន៍។ ជាសំណុំរឿងដ៏ចម្រូងចម្រាសខ្លាំងមួយទៀត ដែលរដ្ឋាភិបាលកាន់អំណាចអាចនឹងរងការរិះគន់ច្រើនបន្ថែមទៀត ហើយមិនប្រាកដថាអាចអនុម័តបានដោយស្រួលៗ។ តើបារាំងចង់ធ្វើកំណែទម្រង់ច្បាប់អន្តោប្រវេសន៍ យ៉ាងណា ?
ចុះផ្សាយនៅថ្ងៃ៖
ស្តាប់ - ០១:៥២
មិនមែនជាការរកលេសបង្វែរចំណាប់អារម្មណ៍ពលរដ្ឋដែលកំពុងតវ៉ាប្រឆាំងនឹងកំណែទម្រង់ច្បាប់សោធននិវត្តន៍ទេ ប៉ុន្តែក្រៅអំពីបញ្ហាចូលនិវត្តន៍ អន្តោប្រវេសន៍ក៏ជាកង្វល់ដ៏ចម្បងបំផុតមួយរបស់ប្រជាពលរដ្ឋបារាំងដែរ។ នេះជាការពន្យល់របស់តំណាងរាស្ត្របក្សកាន់អំណាចបារាំង។
នៅក្នុងសេចក្តីព្រាងច្បាប់ ដែលបើតាមប្រសាសន៍របស់លោកប្រធានាធិបតីបារាំង អេម៉ាណុយអែល ម៉ាក្រុង កាលពីខែធ្នូ២០២២ ចង់បង្ហាញពីតឹងតែង និងមនុស្សធម៌ គ្រោងធ្វើកំណែទម្រង់ពីរចំណុចធំៗ ទាក់ទងនឹងសន្តិសុខនិងសិទ្ធិជ្រកកោនការងារ។
លើផ្នែកសន្តិសុខ បារាំងគ្រោងចេញវិធានការមួយខ្សែ សម្រាប់សម្រួលការបណ្តេញអន្តោប្រវេសន៍ខុសច្បាប់ ជាពិសេសជនខិលខូចបរទេសដែលមានទោសឧក្រិដ្ឋឬបទល្មើស ត្រូវជាប់ពន្ធនាគារចាប់ពី១០ឆ្នាំឡើងទៅ។ ជាមួយពន្លឿន ការបញ្ជូនអន្តោប្រវេសន៍ខុសច្បាប់ចេញពីទឹកដីបារាំង ប្រកបដោយប្រសិទ្ធភាព និងដើម្បីពន្លឿនដំណើរបែបបទ បារាំងមានគម្រោងកំណែទម្រង់រចនាសម្ព័ន្ធនៃការច្បាប់សុំសិទ្ធិជ្រកកោន។
រដ្ឋាភិបាលចង់ឱ្យពលករខុសច្បាប់ធ្វើការ ក្នុងវិស័យដែលបារាំងកំពុងត្រូវការខ្លាំង (អាហារដ្ឋាននិងសំណង់ ...) អាចសុំបណ្ណស្នាក់នៅស្របច្បាប់ ប្រសិនបើពួកគេបានមករស់នៅក្នុងទឹកដីបារាំងបានបីឆ្នាំយ៉ាងតិច។ ជាបណ្ណស្នាក់នៅពិសេស សម្រាប់បំពេញការងារដែលបារាំងខ្វះកម្លាំងពលកម្ម ដែលមានសុពលភាព១ឆ្នាំ និងដែលបន្តអនុវត្តសាកល្បងរហូតដល់ឆ្នាំ២០២៦។ អ្នកមានស្នាដៃ អ្នកមានជំនាញសុខាភិបាល និងឱសថសាស្ត្រ ទទួលសញ្ញាប័ត្រនៅក្រៅអឺរ៉ុប ក៏នឹងអាចសុំសិទ្ធិស្នាក់នៅពិសេស តាមរយៈដាក់ពាក្យសុំធ្វើការនៅតាមសា្ថបនសុខភាពរដ្ឋឬឯកជនបារាំងដែរ។
ជាចុងក្រោយ ដើម្បីឱ្យមានសម្របខ្លួនចូលក្នុងសង្គមបានល្អ គ្រប់អន្តោប្រវេសន៍ត្រូវចេះភាសាបារាំង ក្នុងកំរិតអប្បបរិមាកំណត់ដោយរដ្ឋាភិបាល មិនមែនត្រឹមតែទៅរៀនមួយវគ្គពីរដូចបច្ចុប្បន្ននេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ