អ៊ុយក្រែន ប្តូររដ្ឋមន្ត្រីការពារជាតិក្នុងបរិបទនៃរឿងអាស្រូវពុករលួយនិងសន្ទុះនៃកម្លាំងរុស្ស៊ី
ប្រមុខចារកិច្ចយោធា Kyrylo Boudanov គីរីឡូ ប៊ូដាណូវ នឹងក្លាយជារដ្ឋមន្ត្រីក្រសួងការពារជាតិ ជំនួសរដ្ឋមន្ត្រីការពារជាតិចាស់ ដែលទំនងជានឹងទៅកាន់តំណែងជារដ្ឋមន្ត្រីក្រសួងការឧស្សាហកម្មវិញ។ ការប្តូរផ្លាស់រដ្ឋមន្ត្រីការពារជាតិ ប្រព្រឹត្តទៅជួនចំពេលអ៊ុយក្រែនកំពុងមានរឿងអាស្រូវពុករលួយផ្ទៃក្នុងផង និងជួនចំពេលរុស្ស៊ីកំពុងបង្កើនការវាយសម្រុកលើសមរភូមិខ្លាំងផង។
ចុះផ្សាយនៅថ្ងៃ៖
ស្តាប់ - ០២:១៣
ក្នុងស្ថានភាពកំពុងមានសង្គ្រាម តែងតាំងប្រមុខចារកិច្ចលោក គីរីឡូ ប៊ូដាណូវ អាយុ៣៧ឆ្នាំ ជារដ្ឋមន្ត្រីការពារជាតិអ៊ុយក្រែនថ្មី ជាសេចក្តីសម្រេចចិត្តដ៏ឡូហ្សិកបំផុត។ នេះជាប្រសាសន៍របស់លោក ដាវីដ អារ៉ាខាមីញ៉ា ប្រធានក្រុមបក្សបម្រើប្រជាជនរបស់លោកប្រធានាំធិបតីហ្សេឡេនស្គីនៅសភា កាលពីយប់ថ្ងៃអាទិត្យទី៥កុម្ភៈ២០២៣។ បើតាមតំណាងរាស្ត្ររូបនេះដដែល រដ្ឋមន្ត្រីការពារជាតិចាស់លោក អូឡេកស៊ី រ៉េស្នីកូវ Oleksiï Reznikov នឹងត្រូវតែងតាំងឱ្យជារដ្ឋមន្ត្រីក្រសួងឧស្សាហកម្មវិញ ប៉ុន្តែគ្មានការបញ្ជាក់អំពីកាលបរិច្ឆេទច្បាស់លាស់នៃការរុះរើរដ្ឋមន្ត្រីនេះទេ។
សម្រាប់លោក ដាវីដ អារ៉ាខាមីញ៉ា សង្គ្រាម និងកាលៈទេសៈ បានជំរុញឱ្យអ៊ុយក្រែនពង្រឹង និងផ្ចង់កម្លាំង ហេតុនេះហើយទើបមានការប្តូរផ្លាស់នាពេលនេះ និងនៅថ្ងៃមុខ។ សត្រូវកំពុងត្រៀមសម្រុក អ៊ុយក្រែនត្រូវតែត្រៀមការពារខ្លួន។ ស្ថានភាពនៅលើសមរភូមិកំពុងតានតឹងខ្លាំងណាស់ នៅតំបន់ប៉ែកខាងកើតប្រទេស។ របាយការណ៍ជាច្រើនបានបញ្ជាក់ថាកម្លាំងអ្នកឈ្លានពានកំពុងចង់ធ្វើអ្វីជានិម្មិតរូបខ្លាំងនៅខែកុម្ភៈនេះ ដើម្បីសាកល្បងសងសឹកសកម្មភាពបរាជ័យមុនៗ។ ដោយជាក់ស្តែង សត្រូវកំពុងបង្កើនសម្ពាធខ្លាំងនៅតាមសមរភូមិជួរមុខ។ នេះបើតាមប្រសាសន៍របស់លោកប្រធានាធិបតីអ៊ុយក្រែនកាលពីយប់មិញ។
ម្យ៉ាងវិញទៀត ការប្តូរផ្លាស់រដ្ឋមន្ត្រីការពារជាតិ បានប្រព្រឹត្តទៅក្នុងខណៈដែលអ៊ុយក្រែនកំពុងជួបរឿងអាស្រូវពុករលួយ។ ក្លាយជារដ្ឋមន្ត្រីការពារជាតិ នៅខែវិច្ឆិកា២០២១ លោករ៉ស្នីកូវ ជាតំណាងមេដឹកនាំដ៏ល្បីម្នាក់ក្នុងសង្គ្រាមអ៊ុយក្រែន ដោយបានរួមចំណែករកអាវុធយុទ្ធភ័ណ្ឌជាច្រើនមកបំពាក់ឱ្យកម្លាំងយោធាអ៊ុយក្រែន។ ប៉ុន្តែក្រសួងការពារជាតិរបស់អំណាចរបស់លោកមានប្រលាក់ប្រលូសក្នុងបទចោទប្រកាន់ពុករលួយថាដំឡើងថ្លៃវិក័យបត្រស្បៀងអាហារសម្រាប់យោធាពីរបីដងលើសតម្លៃទីផ្សារ។ រឿងអាស្រូវបានរុញអនុប្រធានរបស់លោកឱ្យលាលែងពីតំណែងកាលពីចុងខែមករា។ នៅក្នុងសន្និសីទកាសែត ព្រឹកថ្ងៃអាទិត្យ លោករ៉េស្នីកូវ បានអះអាងអំពីស្អាតស្អំរបស់លោក ហើយរង់ចាំសេចក្តីសម្រេចពីលោកហ្សេឡេនស្គី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ