សង្គ្រាមអ៊ុយក្រែន ៖ មេវ៉ាក់ណែរុស្ស៊ីថាត្រូវការពីរឆ្នាំក្នុងការដណ្តើមយកភាគខាងកើតអ៊ុយក្រែនទាំងស្រុង
អេវហ្គីនី ព្រីហ្គោហ្ស៊ីន ស្ថាបនិកក្រុមហ៊ុនទាហានស៊ីឈ្នួល វ៉ាក់ណែ Wagnerបានប្រកាសនៅក្នុងបទសម្ភាសន៍ដ៏កម្រមួយថា មូស្គូ អាចនឹងដណ្តើមគ្រប់គ្រងទាំងស្រុង តំបន់ភាគខាងកើតបំផុតអ៊ុយក្រែន ដោយចំណាយពេលពីរឆ្នាំ។ ដំណឹងនេះធ្វើឡើងក្នុងខណៈដែលកងកម្លាំងរុស្ស៊ីកំពុងសម្រុកវាយប្រហារខ្លាំង និងបានអះអាងដណ្តើមយកក្រុងយុទ្ធសាស្ត្រតូចមួយចម្ងាយប្រមាណពីរបីគីឡូម៉ែត្រខាងជើងក្រុងBakhmout មិនឆ្ងាយប៉ុន្មានពីក្រុងសូលេដាដែលគេដណ្តើមបានកាលពីថ្ងៃទី ១១មករា។
ចុះផ្សាយនៅថ្ងៃ៖
ស្តាប់ - ០១:៥០
ចូលជួយកងកម្លាំងទាហានរុស្ស៊ី ក្នុងសង្គ្រាមនៅអ៊ុយក្រែន មេក្រុមវ៉ាក់ណែ បានប្រកាសយល់ពីអំពីគម្រោងនិងកម្មវត្ថុព្រមទាំងភាពចាំបាច់របស់រុស្ស៊ីក្នុងការចង់ក្រសោបគ្រប់គ្រងទាំងស្រុង តំបន់ផ្តាច់ខ្លួនដូណេតស្ក៍ និងឡូហានស្ក៍ ភាគខាងកើតអ៊ុយក្រែន ដែលមូស្គូបានទទួលស្គាល់ជាឯកតោភាគី កាលពីឆ្នាំទៅ ថាជាតំបន់មួយរបស់សហព័ន្ធរុស្ស៊ី។
សម្រាប់មេក្រុមទាហានស៊ីឈ្នួលនេះ ដើម្បីសម្រេចកម្មវត្ថុយកតំបន់ទាំងពីរ គេត្រូវការពេលវេលាប្រមាណពីមួយឆ្នាំកន្លះទៅពីរឆ្នាំ។ ហើយបើចង់ដណ្តើមយកដីឱ្យកាន់តែធំ រហូតដល់ទន្លេ Dniepr ដែលហូរកាត់អ៊ុយក្រែនពីជើងទៅត្បូង នោះគេនឹងត្រូវការពេលវេលាប្រមាណជាបីឆ្នាំ។
នេះជាការអះអាងរបស់បុគ្គល ព្រីហ្កោហ្ស៊ីន មិនមែនជាសំដីផ្លូវការរបស់យោធារុស្ស៊ីទេ ប៉ុន្តែទឹកមាត់មេក្រុមវ៉ាកណែ ចាប់មានឥទ្ធិពល នៅលើសមរភូមិរបស់រុស្ស៊ីនៅអ៊ុយក្រែន យ៉ាងហោចណាស់សម្រាប់មតិសាធារណៈទូទៅ។ សំដីរបស់មេវ៉ាក់ណែ អាចជាការកំណត់ពេលវេលានៃសង្គ្រាម ដែលលោកពូទីន ហៅថា “ប្រតិបត្តិការពិសេស” ចាប់បើកកាលពីថ្ងៃ ទី ២៤កុម្ភៈ២០២២។
ទន្ទឹមនឹងការអះអាងនេះ មេទ័ពស៊ីឈ្នួល បានប្រកាសនៅថ្ងៃអាទិត្យនេះ យកឈ្នះលើកងទ័ពអ៊ុយក្រែនដោយដណ្តើមបានក្រាស្នាហូរ៉ា ទីតាំង យុទ្ធសាស្ត្រមួយនៃក្រុងបាក់ម៉ូដ ដែលរុស្ស៊ីប៉ុនប៉ងតាំងពីជាច្រើនខែមកហើយ។ ទីភ្នាក់ងារសារព័ត៌មានបារាំងមិនអាចផ្ទៀងផ្ទាត់ព័ត៌មាននេះដោយឯករាជ្យទេ។ តាំងពីជាង៦ខែមកនេះ ក្រុមវ៉ាក់ណែ និងយោធារុស្ស៊ី បានព្យាយាមវាយយកក្រុងបាក់ម៉ូដ ក្រុងភាគខាងកើតអ៊ុយក្រែនមួយដែលមានតម្លៃយុទ្ធសាស្ត្រល្មមទេ តែការឈ្នះមានតម្លៃជានិម្មិតរូបខ្លាំង បើយោលទៅរយៈពេលនៃការប្រយុទ្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ