អាកាសធាតុ ៖ ២០២៣ នឹងបំបែកឯតទគ្គកម្មនៃភាពរាំងស្ងួតនៅបារាំងឬ ?
ភាពរាំងស្ងួតហួតហែងខ្លាំងរោគសញ្ញាមួយនៃការប្រែប្រួលអាកាសធាតុ។ តាំងពីថ្ងៃទី ២១មករាមក ទល់នឹងថ្ងៃអង្គារទី ២១កុម្ភៈ២០២៣នេះ គ្មានភ្លៀងមួយមេធំណាធ្លាក់ស្រោចស្រប់លើប្រទេសបារាំងទេ។ គឺជារយៈពេលរាំងភ្លៀងក្នុងរដូវរងារដ៏វែងជាងគេបំផុត ដែលពុំធ្លាប់មានកត់ក្នុងកំណត់ត្រាឯតទគ្គកម្មបារាំងទេ។ កង្វះទឹកភ្លៀងបែបនេះ នឹងធ្វើឱ្យស្រទាប់ដី ដែលជួបភាពរាំងស្ងួតជាប្រវត្តិសាស្ត្រស្រាប់កាលពីឆ្នាំទៅ មិនអាចស្តារប្រព័ន្ធទឹកក្រោមដីរបស់ខ្លួនបានឡើយ។
ចុះផ្សាយនៅថ្ងៃ៖
បើទោះបីជាមានភ្លៀងធ្លាក់បន្តិចបន្តួច នៅតាមតំបន់ខ្លះមែន តែតាំងពីថ្ងៃទី ២១មករាមក ប្រទេសបារាំងទាំងមូលមានកម្ពស់ទឹកភ្លៀងក្រោមមួយមីល្លីម៉ែត្រក្នុងមួយថ្ងៃប៉ុណ្ណោះ ពោលគឺបារាំងបានជួបគ្រោះរាំងភ្លៀង ដ៏វែងបំផុត លើសឆ្នាំ២០២០ (១៧មីនាដល់១៦មេសា)ទៀត។
ជាមួយនឹងចំនួនថ្ងៃគ្មានភ្លៀងសោះ៣១ថ្ងៃជាប់គ្នា នៅរដូវរងារដែលជារយៈពេលដ៏សំខាន់ សម្រាប់ដីស្រូបជាតិទឹកនិងសំណើម ទៅបំពេញប្រព័ន្ធទឹកក្រោមដី រដូវរងារឆ្នាំ២០២៣ បានបំបែកឯតទគ្គកម្មគ្រោះអត់ភ្លៀងយូរបំផុត កាលពីឆ្នាំ១៩៨៩ ដែល កាលណោះ រយៈពេលរាំងភ្លៀងមាន២២ថ្ងៃជាប់គ្នា។
ឧតុនិយមព្យាករថាមេឃអាចចាប់មានភ្លៀងនៅថ្ងៃពុធស្អែក ប៉ុន្តែទោះជាយ៉ាងដូច្នេះ ក៏ កុម្ភៈ២០២៣ ជាខែដែលមានកង្វះទឹកភ្លៀងដល់ទៅជាង៥០% និងក្លាយជាខែដែលស្ងួតខ្លាំងបំផុត គិតចាប់តាំងពីឆ្នាំ១៩៥៩ ឆ្នាំដែលបារាំងចាប់វាស់កំរិតសីតុណ្ហភាពមក។ តាំងពីខែសីហា២០២១មក បារាំងខ្វះទឹកភ្លៀង ជារៀងរាល់ខែ លើកលែងតែខែធ្នូ២០២១ ខែមិថុនានិងកញ្ញា២០២២ទេ។ ក្រៅអំពីជំងឺកង្វះភ្លៀងរ៉ាំរ៉ៃ បារាំងត្រូវបន្ថែមដោយគ្រោះអាកាសធាតុក្តៅខ្លាំងនិងស្ងួតហួតហែងដីយ៉ាងខ្លាំងចម្លែកនៅរដូវក្តៅឆ្នាំ២០២២ រហូតអាជ្ញាធរប្រកាសដាក់ខេត្តជាច្រើនក្នុងបម្រាមប្រើប្រាស់ទឹកដោយប្រុងប្រយ័ត្ន។
ភាពរាំងស្ងួត គ្មានភ្លៀង បានក្លាយជាបាតុភូតដែលមានកើតកាន់តែញឹកញយនិងគួរឱ្យព្រួយបារម្ភ ដូចអ្វីដែលអ្នកជំនាញអង្គការសហប្រជាជាតិធ្លាប់ព្យាករជុំវិញផលវិបាកនៃការប្រែប្រួលអាកាសធាតុ ដោយសារស្នាដៃមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ