ខែកក្កដា២០២២ គឺជាខែដែលមានសីតុណ្ហភាពក្តៅបំផុតមិនធ្លាប់មាន សម្រាប់ពិភពលោក
យោងតាមអង្គការឧតុនិយមពិភពលោក ខែកក្កដាកន្លងទៅនេះ គឺជាខែដែលមានសីតុណ្ហភាពក្តៅបំផុតមួយ សម្រាប់ពិភពលោកយើង។ រលកកំដៅក្តៅខ្លាំងនេះ បាននិងកំពុងតែបន្តបោកបក់ មកលើទ្វីបអឺរ៉ុបជាពិសេស អមជាមួយនឹងគ្រោះរាំងស្ងួត ព្រមទាំងមហន្តរាយភ្លើងឆេះព្រៃ គួរឲ្យបារម្ភបំផុតមិនធ្លាប់មាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
ពិភពលោកយើង ទើបតែបានឆ្លងកាត់ ខែកក្កដាកន្លងទៅថ្មីៗនេះ ជាខែមួយក្នុងចំណោមខែកក្កដាចំនួន៣ ដែលមានសីតុណ្ហភាពក្តៅបំផុត។ នេះគឺជាការលើកឡើង នៅក្នុងសន្និសីទកាសែត របស់លោកស្រី Clare Nullis អ្នកនាំពាក្យអង្គការឧតុនិយមពិភពលោក កាលពីថ្ងៃទី៩សីហា។
សីតុណ្ហភាពខែកក្កដាឆ្នាំ២០២២ ទាបជាងខែកក្កដាឆ្នាំ២០១៩តែបន្តិចប៉ុណ្ណោះ តែក្តៅជាខែកក្កដាឆ្នាំ២០១៦។ តែយ៉ាងណា អង្គការឧតុនិយមពិភពលោកអះអាងថា កម្រិតខ្ពស់ទាបនេះ គឺខុសគ្នាតែតិចតួចបំផុត។ ជារួម សីតុណ្ហភាពកាលពីខែកក្កដាឆ្នាំ២០២២ គឺមានលើសប្រមាណ ០,៤°c នៃសីតុណ្ហភាពមធ្យមរបស់ខែកក្កដា ចន្លោះពីឆ្នាំ១៩៩១ ដល់ឆ្នាំ២០២០។ ជាងនេះទៀត សីតុណ្ហភាពកាលពីខែកក្កដា នៅតែក្តៅខ្លាំងបើទោះបីជាមាន អភូតហេតុធម្មជាតិ La Niña ដែលជំរុញឲ្យសីតុណ្ហភាពក្នុងបរិយាកាស ចុះកំដៅក៏ដោយ។
គួរបញ្ជាក់ថា កាលពីខែកក្កដា អង្គការឧតុនិយមពិភពលោក បានអំពាវនាវ ឲ្យថ្នាក់ដឹកនាំគ្រប់ប្រទេស ត្រូវតែភ្ញាក់រលឹក យកចិត្តទុកដាក់ ខ្វាយខ្វល់នឹងបញ្ហាសីតុណ្ហភាពពិភពលោក ដែលកាន់តែក្តៅខ្លាំង។ រលកកំដៅបោកបាក់ខ្លាំងយ៉ាងចំលែក និងកាន់តែញឹកញាប់ ក្នុងរយៈពេលយូរ ដោយសារបម្រែបម្រួលអាកាសធាតុ។
ក្រៅពីរលកកំដៅ តំបន់មួយចំនួននៃពិភពលោក កំពុងតែឆ្លងកាត់គ្រោះរាំងស្ងួតជាខ្លាំង។ អង្គការឧតុនិយមពិភពលោក អះអាងថា ខែកក្កដាកន្លងទៅ គ្រោះរាំងស្ងួតកាន់តែធ្ងន់ធ្ងរ នៅអឺរ៉ុប នៅតំបន់មួយភាគធំនៃអាមេរិកខាងជើង អាមេរិកខាងត្បូង នៅអាស៊ីកណ្តាល និងអូស្ត្រាលី។ តែដោយឡែក តំបន់ខ្លះ មានកម្រិតសំណើមខ្ពស់ ដូចជានៅភាគខាងកើតរុស្ស៊ី ភាគខាងជើងប្រទេសចិន នៅតំបន់ភខាងជើងអាហ្វ្រិក រហូតដល់ភាគពាយ័ព្យឥណ្ឌា។
គួរបញ្ជាក់ថា បណ្តាប្រទេសមួយចំនួននៅអឺរ៉ុប ជាពិសេសបារាំង បានជួបនឹងរលកកំដៅយ៉ាងចំលែក កាលពីខែកក្កដា។ សីតុណ្ហភាពក្តៅខ្លាំង ព្រមជាមួយការរាំងស្ងួតគ្មានភ្លៀង បានធ្វើឲ្យអាជ្ញាធរបារាំងខ្វាយខ្វល់ជាខ្លាំងពីបញ្ហាខ្វះទឹកប្រើប្រាស់។ បឹង ស្ទឹង ទន្លេមួយចំនួនធំនៅបារាំង ត្រូវរីងស្ងួតឃើញបាតដី ខណៈភ្លើងឆាបឆេះព្រៃឈើ មានជាច្រើនទីតាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ