បារាំង៖ក្រុមសហជីពរៀបចំបាតុកម្មនិងកូដកម្មទ្រង់ទ្រាយធំប្រឆាំងនឹងកំណែទម្រង់ច្បាប់ចូលនិវត្តន៍
នៅក្នុងប្រទេសបារាំង កំណែទម្រង់ច្បាប់ចូលនិវត្តន៍របស់រដ្ឋាភិបាលកំពុងបន្តទទួលការប្រឆាំងពីក្រុមសហជីព។ ក្នុងថ្ងៃអង្គារ ទី៧ មីនានេះ ក្រុមសហជីពបានរៀបចំបាតុកម្ម និងកូដកម្មជាថ្មីដោយមានទ្រង់ទ្រាយធំជាងលើកមុនៗ ពិសេសចង់ដាក់ប្រទេសឲ្យជាប់គាំងតែម្តង។ ទន្ទឹមគ្នានេះ និងដើម្បីបង្កើនគំនាបលើរដ្ឋាភិបាល ក្រុមសហជីពបានអំពាវនាវឲ្យប្តូរយុទ្ធសាស្រ្តពីការធ្វើបាតុកម្ម និងកូដកម្មតែមួយថ្ងៃទៅជាការធ្វើបាតុកម្ម និងកូដកម្មបន្តថ្ងៃជាប់ៗគ្នា។
ចុះផ្សាយនៅថ្ងៃ៖
ស្តាប់ - ០២:០៣
« ទ្រង់ទ្រាយធំ មិនធ្លាប់មាន និងមិនអាចបំភ្លេចបាន » នេះជាពាក្យសម្តីរបស់ក្រុមអ្នកដឹកនាំសហជីពសម្រាប់ចលនាប្រឆាំងនឹងកំណែទម្រង់ច្បាប់ចូលនិវត្តន៍ដែលរៀបចំក្នុងថ្ងៃអង្គារ ទី៧ មីនានេះ។ កម្មវត្ថុរបស់ក្រុមសហជីព គឺបង្កើនគំនាបដាក់រដ្ឋាភិបាលដែលកំពុងបន្តធ្វើ គ ធ្វើថ្លង់នឹងក្តីព្រួយបារម្ភរបស់ពលរដ្ឋចំពោះកំណែទម្រង់ច្បាប់ចូលនិវត្តន៍។ យោងតាមលទ្ធផលស្ទង់មតិនាដើមខែមីនានេះ មានពលរដ្ឋបារាំងចំនួន ៧២% បានប្រឆាំងនឹងកំណែទម្រង់ច្បាប់ចូលនិវត្តន៍ ពោលច្រើនជាងក្នុងខែមករាដែលមានត្រឹម ៦៦%។
ផ្ទាំងស៊ីបយុទ្ធសាស្រ្តរបស់ក្រុមសហជីពនៅក្នុងចលនាប្រឆាំងលើកនេះផ្តោតសំខាន់លើវិស័យដឹកជញ្ជូនសាធារណៈ និងកន្លែងស្តុកប្រេងឥន្ធនៈ។ ចរាចរណ៍រថភ្លើងលើដី និងក្រោមដីមួយភាគធំត្រូវបានកាត់បន្ថយ ឬបិទទាំងស្រុងតែម្តង។ កន្លែងស្តុកប្រេងឥន្ធនៈបានរងការបិទខ្ទប់ដោយក្រុមបាតុករ កូដករ។ ក្រៅពីនេះ ភាពជាប់គាំង និងភាពរអាក់រអួលក៏កើតមានលើផ្នែកជាច្រើនទៀតដូចជានៅតាមសាលារៀន និងនៅតាមសាកលវិទ្យាល័យ។ ក្រុមអ្នកទទួលខុសត្រូវសហជីពបានបញ្ជាក់ថា មានមនុស្សជាង ២លាននាក់នឹងចូលរួមនៅក្នុងក្បួនបាតុកម្ម និងកូដកម្មនៅទូទាំងប្រទេសក្នុងថ្ងៃអង្គារ ទី៧ មីនានេះ។
តាមសហជីពមួយឈ្មោះ CFDT មានទីតាំងប្រមូលផ្តុំបាតុករចំនួន ៣២០កន្លែងត្រូវបានរៀបចំនៅទូទាំងប្រទេស។ គួរបញ្ជាក់ថា នេះជាលើកទី៦ ដែលក្រុមសហជីពបានរៀបចំក្បួនបាតុកម្ម និងកូដកម្មប្រឆាំងនឹងកំណែទម្រង់ច្បាប់ចូលនិវត្តន៍របស់រដ្ឋាភិបាល។ តែអ្វីដែលជាការសន្យាថ្មីរបស់ក្រុមសហជីពពេលនេះ គឺចង់ធ្វើឲ្យប្រទេសជាប់គាំង និងរៀបចំបាតុកម្ម កូដកម្មបន្តថ្ងៃជាប់ៗគ្នា ពោលមិនមែនធ្វើតែមួយថ្ងៃដូចលើកមុនៗទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ