ប្រធានាធិបតីបារាំងពន្យល់ពីមូលហេតុនៃការលើកពេលព្រះរាជទស្សនកិច្ចរបស់ព្រះមហាក្សត្រអង់គ្លេសនៅបារាំង
នៅក្នុងប្រទេសបារាំង ក្រុមសហជីពបានអំពាវនាវឲ្យបន្តចលនាបាតុកម្មប្រឆាំងនឹងច្បាប់កំណែទម្រង់សោធននិវត្តន៍។ ក្រោយពីបានរៀបចំក្នុងថ្ងៃព្រហស្បតិ៍ ទី២៣ មីនាមក ចលនាបាតុកម្មថ្មីត្រូវបានក្រុមសហជីពគ្រោងធ្វើនៅថ្ងៃអង្គារ ទី២៨ មីនាសប្តាហ៍ក្រោយ។ កម្មវត្ថុរបស់ក្រុមសហជីពនៅតែដដែល គឺទាមទារឲ្យរដ្ឋាភិបាលដកចេញវិញនូវច្បាប់កំណែទម្រង់សោធននិវត្តន៍ដែលទើបបានអនុម័ត និងដែលកំពុងស្ថិតក្នុងដៃរបស់ក្រុមប្រឹក្សាធម្មនុញ្ញ។ ចំណែករដ្ឋាភិបាលក៏បានបញ្ជាក់ពីការមិនដកច្បាប់នោះចេញវិញដែរ។ រូបភាពដែលគេបានឃើញពីចលនាបាតុកម្មពេលនេះ គឺអំពើហិង្សារវាងកម្លាំងប៉ូលិស និងក្រុមបាតុករជ្រុលនិយម និងការវាយកម្ទេច ដុតបំផ្លាញនៅក្នុងក្រុងប៉ារីស រួមទាំងនៅតាមខេត្ត ក្រុងផ្សេងទៀត។ ប្រឈមនឹងចលនាបះបោរសង្គមមួយនេះ ប្រធានាធិបតីបារាំងលោកម៉ាក្រុងបានថ្លែងពីទីក្រុងព្រុចសែលប្រទេសបែលហ្ស៊ិកដែលលោកបានទៅចូលរួមជំនួបកំពូលអឺរ៉ុបថា លោកត្រៀមខ្លួនដើម្បីជួបជជែកជាមួយក្រុមសហជីព។ ទន្ទឹមគ្នានេះ លោកម៉ាក្រុងបានពន្យល់ពីមូលហេតុដែលលោកបានសម្រេចលើកពេលព្រះរាជទស្សនកិច្ចផ្លូវរដ្ឋរបស់ព្រះមហាក្សត្រអង់គ្លេសក្នុងប្រទេសបារាំងដែលបានគ្រោងទុកនៅសប្តាហ៍ក្រោយ៕
ចុះផ្សាយនៅថ្ងៃ៖
ស្តាប់ - ០១:៥៤
« ខ្ញុំជឿថាអស់លោកឃើញស្ថានការណ៍ដែលជាប់ពាក់ព័ន្ធនឹងចលនាបាតុកម្មប្រឆាំងនឹងច្បាប់កំណែទម្រង់សោធននិវត្តន៍នៅក្នុងប្រទេសបារាំង។ នៅពេលដែលក្រុមសហជីពបានប្រកាសក្នុងយប់ថ្ងៃព្រហស្បតិ៍ ទី២៣ មីនាពីការរៀបចំក្បួនបាតុកម្មថ្មីទៀតនៅថ្ងៃអង្គារ ទី២៨ មីនាសប្តាហ៍ក្រោយ និងចំពេលដែលព្រះរាជដំណើរទស្សនកិច្ចរបស់ព្រះមហាក្សត្រអង់គ្លេសត្រូវបានគ្រោងទុកពីថ្ងៃចន្ទ ទី២៧ដល់ថ្ងៃពុធ ទី២៩ មីនា នោះ ខ្ញុំគិតថា វាមិនទំនងទាល់តែសោះ និងជាការខ្វះសុភវិនិច្ឆ័យក្នុងការស្នើឲ្យព្រះមហាក្សត្រ និងព្រះមហាក្សត្រីយាងបំពេញទស្សនកិច្ចផ្លូវរដ្ឋក្នុងប្រទេសបារាំងនៅកណ្តាលក្បួនបាតុកម្ម។
ដូច្នេះ ដោយសារតែយើងមានមិត្តភាពច្រើន មានការគោរព និងមានសេចក្តីរាប់អានចំពោះព្រះមហាក្សត្រ ព្រះមហាក្សត្រី និងប្រជារាស្រ្តអង់គ្លេសនោះ ខ្ញុំក៏បានសម្រេចចិត្តទូរស័ព្ទជួបព្រះមហាក្សត្រព្រឹកមិញនេះដើម្បីទូលព្រះអង្គពីស្ថានភាពដែលកំពុងកើតមាននៅបារាំង និងថ្ងៃរៀបចំបាតុកម្មថ្មីរបស់ក្រុមសហជីព។ គឺផ្តើមចេញពីហេតុផលនេះហើយដែលនាំឲ្យយើងលើកពេលព្រះរាជទស្សនកិច្ចរបស់ព្រះមហាក្សត្រ និងព្រះមហាក្សត្រី។ នៅពេលដែលភាពស្ងប់ស្ងាត់នឹងត្រឡប់មកវិញ យើងបានស្នើថ្ងៃ ខែថ្មីនៅដើមរដូវក្តៅខាងមុខដោយផ្អែកលើកាលវិភាគជាក់ស្តែងរបស់យើង។ ការសម្រេចយ៉ាងនេះគឺដើម្បីអាចទទួលព្រះរាជទស្សនកិច្ចផ្លូវរដ្ឋរបស់ព្រះមហាក្សត្រថ្មី និងព្រះមហាក្សត្រីឲ្យបានល្អផង និងនៅក្នុងលក្ខខណ្ឌដែលនឹងអនុញ្ញាតឲ្យព្រះអង្គសប្បាយរីករាយនៅបារាំងទាំងនៅក្រុងប៉ារីស និងខេត្តប័រដូ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ