ហ្វាំងឡង់ដាក់ឲ្យដំណើរការនូវម៉ាស៊ីនប្រតិកម្មនុយក្លេអ៊ែរ EPR ក្រោយពីបានប្រើពេលសាងសង់ ២០ឆ្នាំ
ខណៈដែលប្រទេសអាល្លឺម៉ង់បានបិទទ្វារមជ្ឈមណ្ឌលនុយក្លេអ៊ែរចុងក្រោយរបស់ខ្លួនក្នុងថ្ងៃសៅរ៍ ទី១៥ មេសា ប្រទេសហ្វាំងឡង់បានបើកទ្វារមជ្ឈមណ្ឌលនុយក្លេអ៊ែរថ្មីក្នុងថ្ងៃអាទិត្យ ទី១៦ មេសាដោយដាក់ឲ្យដំណើរការនូវម៉ាស៊ីនប្រតិកម្មនុយក្លេអ៊ែរជំនាន់ថ្មីឈ្មោះ EPR Olkiluoto 3 (អឺប៉េអ៊ែរ អូគីលុយអូតូ ៣)។ ម៉ាស៊ីនប្រតិកម្មនុយក្លេអ៊ែរជំនាន់ថ្មីនេះផលិតដោយប្រទេសបារាំង និងអាល្លឺម៉ង់។ តែអ្វីជាការកត់សម្គាល់ ការសាងសង់មានភាពយឺតយ៉ាវដល់ទៅ ១៣ឆ្នាំ ហើយទឹកប្រាក់សាងសង់មានទំហំលើសឆ្ងាយពីគម្រោងដែលបានគិតទុក។
ចុះផ្សាយនៅថ្ងៃ៖
ស្តាប់ - ០១:៤៧
ខុសពីម៉ាស៊ីនប្រតិកម្មនុយក្លេអ៊ែរដែលពិភពលោកកំពុងមានក្នុងដៃសព្វថ្ងៃ ម៉ាស៊ីនប្រតិកម្មនុយក្លេអ៊ែរជំនាន់ថ្មី EPR ជាម៉ាស៊ីនប្រតិកម្មនុយក្លេអ៊ែរដែលមានបច្ចេកវិទ្យាខ្ពស់ មានកម្លាំងខ្លាំងជាងគេរបស់អឺរ៉ុប និងមានសុវត្ថិភាពល្អជាង។ តែអ្វីដែលគេមិនត្រូវភ្លេចនិយាយនោះ EPROlkiluoto 3 (អឺប៉េអ៊ែរ អូគីលុយអូតូ ៣) ដែលប្រទេសហ្វាំងឡង់ទើបដាក់ឲ្យដំណើរការបានចំណាយពេល និងចំណាយលុយសាងសង់លើសពីការគ្រោងទុកឆ្ងាយណាស់។ ទំរាំបានដាក់ឲ្យប្រើប្រាស់ពេលនេះ ការសាងសង់បានអូសបន្លាយពេលដល់ទៅ ២០ឆ្នាំ ពោលមានការយឺតយ៉ាវដល់ទៅ ១៣ឆ្នាំ។
នេះដោយមិនទាន់រាប់បញ្ចូលពីបញ្ហាផ្សេងៗដែលក្រុមហ៊ុនសាងសង់បានជួបប្រទះ ពិសេសនាពេលដាក់សាកល្បងក្នុងខែកញ្ញា ឆ្នាំ ២០២២។ កាលណោះ ក្រុមហ៊ុនសាងសង់បានរកឃើញភាពប្រេះស្រាំលើទួរប៊ីនដែលត្រូវធ្វើការជួសជុលដោយចៀសមិនរួច។ ចំណែកការចំណាយក្នុងការសាងសង់ដែលបានគ្រោងពីដំបូងចំនួន ៣ ៥០០លានអឺរ៉ូបានហក់ឡើងដល់ទៅប្រមាណជា ១១ ០០០លានអឺរ៉ូឯណោះ។ យ៉ាងណាក៏ដោយពេលនេះ ហ្វាំងឡង់ហាក់បានធូរទ្រូងច្រើនព្រោះជាមួយនឹងម៉ាស៊ីនប្រតិកម្មដែលមានកម្លាំង ១ ៦០០មេហ្កាវ៉ាត់ EPROlkiluoto 3 (អឺប៉េអ៊ែរ អូគីលុយអូតូ ៣) តែមួយអាចផលិតភ្លើងអគ្គិសនីបានដល់ទៅ ១៤% នៃតម្រូវការភ្លើងអគ្គិសនីសរុបរបស់ហ្វាំងឡង់។
គួរបញ្ជាក់ថា ដើម្បីបញ្ជៀសការកាត់ភ្លើងក្នុងរដូវរងារ និងដោយសាររុស្ស៊ីឈប់លក់ឧស្ម័នឲ្យ ហ្វាំងឡង់បានបង្ខំចិត្តដាក់ឲ្យដំណើរការនូវមជ្ឈមណ្ឌលអគ្គិសនីប្រើប្រេង និងបានទិញភ្លើងអគ្គិសនីពីប្រទេសស៊ុយអែត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ