ហ្វាំងឡង់លុបចោលកិច្ចសន្យាសាងសង់រោងចក្រនុយក្លេអ៊ែរជាមួយក្រុមហ៊ុនរុស្ស៊ី
សម្ព័ន្ធក្រុមហ៊ុនរបស់ប្រទេសហ្វាំងឡង់បានប្រកាសកាលពីថ្ងៃចន្ទទី២ឧសភាថា ក្រុមហ៊ុនសម្រេចលុបចោលកិច្ចសន្យាសាងសង់ម៉ាស៊ីនប្រតិករនុយក្លេអ៊ែរ ជាមួយក្រុមហ៊ុនរុស្ស៊ី។ នៅប៉ុន្មានថ្ងៃ មុនរុស្ស៊ីធ្វើសង្រ្គាមឈ្លានពានអ៊ុយក្រែនកាលពីចុងខែកុម្ភៈ រដ្ឋាភិបាលហ្វាំងឡង់ធ្លាប់បានពន្លយរួចហើយថា នឹងសើរើឡើងវិញ គម្រោងការសាងសង់ដែលមានការចូលរួមវិនិយោគពីក្រុមហ៊ុនរុស្ស៊ី។
ចុះផ្សាយនៅថ្ងៃ៖
នៅក្នុងសន្និសីទកាសែតកាលពីថ្ងៃចន្ទ ប្រធានសម្ព័ន្ធក្រុមហ៊ុនហ្វាំងឡង់ លោកEsa Härmäläបានអះអាងថា ក្រុមហ៊ុនមិនបានរងសម្ពាធពីខាងរដ្ឋាភិបាល ប៉ុន្តែ ទទួលស្គាល់ថា សង្រ្គាមអ៊ុយក្រែនបានជះផលអាក្រក់ ទៅលើគម្រោងការសាងសង់រោងចក្រនុយក្លេអ៊ែរ ដែលមានការចូលរួមមួយចំណែកពីក្រុមហ៊ុនរុស្ស៊ី Rosatom។
សង្រ្គាមអ៊ុយក្រែនបានបង្កើនហានិភ័យកាន់តែធំសម្រាប់គម្រោងការសាងសង់នៅរោងចក្រនុយក្លេអ៊ែរជាប់មាត់សមុទ្របាល់ទិក។ តាមក្រុមហ៊ុនហ្វាំងឡង់ ក្រុមហ៊ុនរុស្ស៊ីគ្មានសមត្ថភាព ជួយកាត់បន្ថយហានិភ័យ។ មួយវិញទៀត ទោះជាក្រុមហ៊ុននុយក្លេអ៊ែរស៊ីវិលរបស់រុស្ស៊ី នៅមិនទាន់ជាប់សំណាញ់ទណ្ឌកម្មរបស់សហភាពអឺរ៉ុប ប៉ុន្តែ ទណ្ឌកម្មសេដ្ឋកិច្ចជាទូទៅ ទៅលើរុស្ស៊ី ដោយសារសង្រ្គាមអ៊ុយក្រែន បានប៉ះពាល់តិចឬច្រើនដល់គម្រោងការសាងសង់ម៉ាស៊ីនប្រតិករនៅរោងចក្រនុយក្លេអ៊ែរហ្វាំងឡង់។ ជាលទ្ធផល សម្ព័ន្ធក្រុមហ៊ុនហ្វាំងឡង់ បានសម្រេចលុបចោលកិច្ចសន្យា ជាមួយក្រុមហ៊ុនរុស្ស៊ី។
នៅក្នុងសេចក្តីថ្លែងការណ៍ កាលពីថ្ងៃចន្ទ ក្រុមហ៊ុនរុស្ស៊ី Rosatom ដែលមានចំណែកភាគហ៊ុន៣៤%នៃគម្រោងការសាងសង់នៅរោងចក្រនុយក្លេអ៊ែរហ្វាំងឡង់ បានសំដែងការខកចិត្ត និងសន្យាការពារផលប្រយោជន៍របស់ក្រុមហ៊ុន តាមផ្លូវច្បាប់។
តើសម្ព័ន្ធក្រុមហ៊ុនហ្វាំងឡង់បោះបង់ចោលទាំងស្រុងគម្រោងការសាងសង់ម៉ាស៊ីនប្រតិករនុយក្លេអ៊ែរ ឬគ្រាន់តែការផ្តាច់កិច្ចសន្យាជាមួយក្រុមហ៊ុនរុស្ស៊ី ដើម្បីស្វែងរកដៃគូថ្មី? នៅក្នុងសន្និសីទកាសែត កាលពីថ្ងៃចន្ទ ប្រធានក្រុមហ៊ុនបានអះអាងថា វានៅឆាប់ពេកដែលគេនិយាយពីអនាគតរបស់គម្រោងនៅពេលនេះ។
តាមគម្រោង ដែលសម្ព័ន្ធក្រុមហ៊ុនហ្វាំងឡង់ដាក់បង្ហាញកាលពីឆ្នាំមុន ដំណើរការសាងសង់ម៉ាស៊ីនប្រតិករនុយក្លេអ៊ែរ ត្រូវចាប់ផ្តើមនៅ២០២៣ និងអាចដាក់ឲ្យដំណើរការនៅឆ្នាំ ២០២៩។ ជាមួយតម្លៃសាងសង់ប្រមាណ ៧៥០០លានដុល្លារ អនាគតម៉ាស៊ីនប្រតិករនុយក្លេអ៊ែរថ្មីអាចមានសមត្ថភាព ផលិតអគ្គិសនី ១២០០មេហ្កាវ៉ាត់។ ជាប្រទេសអឺរ៉ុបមួយដែលវិនិយោគច្រើនទៅលើថាមពលនុយក្លេអ៊ែរស៊ីវិល ហ្វាំងឡង់មានម៉ាស៊ីនប្រតិករចំនួន ៤ ដែលដំណើរការជាប្រចាំ នៅរោងចក្រនុយក្លេអ៊ែរចំនួន ២ សម្រាប់ផលិតអគ្គិសនី។
ការសម្រេចលុបចោលកិច្ចសន្យាវិនិយោគ ជាមួយក្រុមហ៊ុននុយក្លេអ៊ែរស៊ីវិលរបស់រុស្ស៊ីធ្វើឡើងនៅក្នុងខណៈពេលដែលហ្វាំងឡង់កំពុងត្រៀមរៀបចំដាក់ពាក្យសុំចូលជាសមាជិកមួយទៀតរបស់អូតង់ នៅក្នុងបរិបទនៃសង្រ្គាមឈ្លានពានរបស់រុស្ស៊ី នៅអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ