រុស្ស៊ី៖តុលាការក្រុងមូស្គូកាត់ទោសលោកវ្ល៉ាឌីមៀរ ការ៉ាមូរហ្សាឲ្យជាប់គុកចំនួន ២៥ឆ្នាំ
នៅក្នុងប្រទេសរុស្ស៊ី តុលាការក្រុងមូស្គូបានកាត់ទោសលោកវ្ល៉ាឌីមៀរ ការ៉ាមូរហ្សាឲ្យជាប់គុកចំនួន ២៥ឆ្នាំក្នុងថ្ងៃចន្ទ ទី១៧ មេសា។ លោកការ៉ាមូរហ្សាត្រូវបានគេស្គាល់ជាអ្នកប្រឆាំងដ៏សំខាន់ម្នាក់ដែលហ៊ានចេញមុខរិះគន់វិមានក្រឹមឡាំងមិនសំចៃមាត់ និងដែលមិនបាននិរទេសខ្លួនទៅបរទេសទេ។ មេធាវីម្នាក់របស់លោកការ៉ាមូរហ្សាបានប្រកាសថា លោកការ៉ាមូរហ្សានឹងប្តឹងឧទ្ទរណ៍។ ចំណែកក្រុមប្រទេសលោកខាងលិចបាននាំគ្នាថ្កោលទោសចាស់ដៃលើការកាត់ទោសអ្នកប្រឆាំងរុស្ស៊ីរូបនេះ។
ចុះផ្សាយនៅថ្ងៃ៖
ស្តាប់ - ០២:២៦
សវនាការកាត់ទោសលោកវ្ល៉ាឌីមៀរ ការ៉ាមូរហ្សាត្រូវបានតុលាការក្រុងមូស្គូធ្វើឡើងដោយបិទទ្វារ។ ជាសរុប អ្នកប្រឆាំងរុស្ស៊ីវ័យ ៤១ឆ្នាំរូបនេះត្រូវបានតុលាការកាត់ទោសឲ្យជាប់គុកចំនួន ២៥ឆ្នាំពីបទក្បត់ជាតិ ផ្សព្វផ្សាយព័ត៌មានមិនពិតស្តីពីកងទ័ពរុស្ស៊ី និងធ្វើការខុសច្បាប់ឲ្យអង្គការមួយ។ ជាប់គុក ២៥ឆ្នាំជាទម្ងន់ទោសដែលធ្ងន់មិនធ្លាប់មានពីមុនមកប្រឆាំងនឹងអ្នកប្រឆាំងម្នាក់នៅក្នុងប្រវត្តិថ្មីៗរបស់រុស្ស៊ី។ តែយ៉ាងណាក៏ដោយ លោកការ៉ាមូរហ្សាដែលកំពុងឈរក្នុងបន្ទប់សម្រាប់ជនជាប់ចោទ មានពាក់អាវយឺតពណ៌ខ្មៅ មានពាក់អាវធំពណ៌ប្រផេះ និងមានដៃជាប់ខ្នោះបានទទួលយកសាលក្រមដោយទឹកមុខញញឹម។
ចំណែកលោកស្រីម៉ារីយ៉ា អេម៉ុងដែលជាមេធាវីម្នាក់របស់លោកការ៉ាមូរហ្សាបានប្រកាសថា កូនក្តីរបស់លោកស្រីនឹងប្តឹងឧទ្ធរណ៍។ « ជាសាលក្រមមួយដ៏អាក្រក់ តែវាបង្ហាញពីតម្លៃដ៏អស្ចារ្យនៃសកម្មភាពរបស់វ្ល៉ាឌីមៀរ » នេះជាការយល់ឃើញរបស់លោកស្រីម៉ារីយ៉ា អេម៉ុង។ មេធាវីរបស់លោកការ៉ាមូរហ្សារូបនេះដដែលបានបន្ថែមថា កូនក្តីរបស់គាត់នៅតែស្ថិតក្នុងអារម្មណ៍ក្លាហាន និងគិតដោយស្មោះពីសកម្មភាពដែលលោកបានធ្វើដើម្បីផលប្រយោជន៍ប្រទេសរុស្ស៊ី។ យ៉ាងណាក៏ដោយ ការកាត់ទោសអ្នកប្រឆាំងរុស្ស៊ីរូបនេះបានបង្កឲ្យមានប្រតិកម្មព្រោងព្រាតពីក្រុមប្រទេសលោកខាងលិច។
លោកវ៉ុលក័រ តួក ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សបានស្នើឲ្យរដ្ឋអំណាចរុស្ស៊ីដោះលែងលោកការ៉ាមូរហ្សាដោយគ្មានបង្អង់យូរ។ សហភាពអឺរ៉ុបបានថ្កោលទោសលើទម្ងន់ទោសដ៏សាហាវ។ ប្រតិកម្មដូចគ្នានេះក៏មានពីប្រទេសអាល្លឺម៉ង់ដែរ។ ចំណែកប្រទេសអង់គ្លេសតាមប្រមុខការទូតបានថ្លែងថា អង់គ្លេសនឹងបន្តអំពាវនាវឲ្យដោះលែងលោកការ៉ាមូរហ្សាភ្លាម។ នៅបារាំង ក្រសួងការបរទេសបានសម្តែងការខកចិត្ត និងយល់ថា តុលាការរុស្ស៊ីបានក្លាយជាឧបករណ៍គាបសង្កត់ក្រុមប្រឆាំងរបស់វិមានក្រឹមឡាំង។ ប្រតិកម្មរបស់អាមេរិកវិញ អ្នកនាំពាក្យក្រសួងការបរទេសបានទាមទារឲ្យដោះលែងលោកការ៉ាមូរហ្សាភ្លាម និងយល់ថា អុ្នកប្រឆាំងរុស្ស៊ីរូបនេះជាជនរងគ្រោះនៃយុទ្ធនាការគាបសង្កត់កាន់តែខ្លាំងឡើងរបស់រដ្ឋាភិបាលក្រុងមូស្គូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ