របាយការណ៍អ.ស.ប៖ ពិភពលោកឆ្នាំ២០២២រងគ្រោះធ្ងន់ធ្ងរដោយសារការប្រែប្រួលអាកាសធាតុ
ការប្រែប្រួលអាកាសធាតុពិតជាជះផលអាក្រក់ បណ្តាលឲ្យមានគ្រោះធម្មជាតិនៅលើផែនដី។ នៅក្នុងរបាយការណ៍ប្រចាំឆ្នាំ ចេញផ្សាយកាលពីថ្ងៃសុក្រ ទី ២១ មេសា អង្គការឧតុនិយមពិភពលោកដែលជាស្ថាប័នរបស់អង្គការសហប្រជាជាតិ បានបញ្ជាក់ថា នៅឆ្នាំ ២០២២ ពិភពលោកបានជួបប្រទះគ្រោះធម្មជាតិដ៏ធ្ងន់ធ្ងរ តាំងពីគ្រោះទឹកជំនន់ គ្រោះរាំងស្ងួត និងការរលាយផ្ទាំងទឹកកកក្នុងល្បឿនមួយដ៏លឿនមិនធ្លាប់មាន។ គ្រោះធម្មជាតិដែលបង្កឲ្យមានការខូចខាតមហាសាល សម្រាប់សង្គមសេដ្ឋកិច្ចរស់នៅរបស់មនុស្សលើផែនដី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
អង្គការឧតុនិយមពិភពលោកចេញរបាយការណ៍ បញ្ជាក់និន្នាការអវិជ្ជមានដែលផែនដីបានជួបប្រទះកាលពីឆ្នាំកន្លងទៅ ឆ្នាំ២០២២។ ផែនដីកាន់តែឡើងកំដៅ ផ្ទាំងទឹកកករលាយក្នុងល្បឿនមួយដ៏លឿន ចំណែក មនុស្សកាន់តែច្រើនធ្លាក់ខ្លួន រងគ្រោះដោយសារ គ្រោះទឹកជំនន់ទឹកភ្លៀង គ្រោះរាំងស្ងួតហួតហែង និងរលកកំដៅ។
នៅក្នុងរបាយការណ៍ប្រចាំឆ្នាំ អង្គការឧតុនិយមពិភពលោកដែលមានទីស្នាក់ការនៅទីក្រុងហ្សឺណែវបានបញ្ជាក់ថា នៅឆ្នាំ ២០២២ សីតុណ្ហភាព ជាមធ្យម នៅលើផែនដី ពិតជាកើនឡើងខ្ពស់ ប្រមាណ ១,១៥អង្សា បើប្រៀបធៀបនឹងសម័យបុរេឧស្សាហកម្ម ប៉ុន្តែ មិនមែន ១អង្សាដូចការព្យាករកន្លងមក។ ការកើនឡើងកំដៅលើផែនដីបានធ្វើឲ្យផ្ទាំងទឹកកកនៅអង់តាក់ទិក តំបន់ប៉ូលខាងត្បូង រលាយលឿន គួរព្រួយបារម្ភ។ តាមរបាយការណ៍ គេមិនដែលឃើញ ផ្ទៃផ្ទាំងទឹកកកអង់តាក់ទិកមានទំហំរួញតូច ដូចកាលឆ្នាំ ២០២២។ ចំណែកផ្ទាំងទឹកកកនៅទឹកដីអឺរ៉ុបរលាយក្នុងកម្រិតមួយមិនធ្លាប់មានពីមុនមក។ ជាក់ស្តែង ភ្នំទឹកកកនៅស្វ៊ីស បានរលាយអស់៦% នៅចន្លោះឆ្នាំ ២០២១ និងឆ្នាំ ២០២២។
សម្រាប់អគ្គលេខាធិការអង្គការឧតុនិយមពិភពលោក លោក Petteri Taalas ពិភពលោកបាត់បង់ផ្ទាំងទឹកកក ដោយគ្មានថ្ងៃវិលត្រលប់ ព្រោះថា ការប្រមូលផ្តុំឧស្ម័នកាបូនិក (ស្នាដៃរបស់មនុស្ស?) នៅតែមានកម្រិតខ្ពស់ ចំណែក កំពស់ទឹកសមុទ្រវិញ នៅតែបន្តកើនឡើង និងកាន់តែលឿន។ ជាតិអាស៊ីដក្នុងមហាសមុទ្របានកើនឡើងខ្ពស់ ជាងពេលណាៗទាំងអស់ (នៅក្នុងរយៈពេល ២៦០០០ឆ្នាំ)។ ហានិភ័យ គ្រោះថ្នាក់សម្រាប់ជីវិតមនុស្សនៅលើផែនដី។ នៅអាហ្វ្រិកខាងកើត គ្រោះរាំងស្ងួតខ្លាំងបានបណ្តាលឲ្យមនុស្ស២០លាននាក់ ប្រឈមនឹងបញ្ហាអសន្តិសុខស្បៀង។ ផ្ទុយទៅវិញ ទឹកភ្លៀងច្រើនជ្រុលដែលបានបង្កឲ្យមានគ្រោះទឹកជំនន់ នៅប្រទេសប៉ាគីស្ថានបានធ្វើឲ្យមនុស្ស៣លាននាក់ត្រូវផ្លាស់ទី ប្រឈមជំងឺរាតត្បាត និងកង្វះស្បៀងអាហារ។
នៅឆ្នាំ ២០២២ បណ្តាប្រទេសនៅអឺរ៉ុប និងចិនបានជួបរងគ្រោះខ្យល់ព្យុះ និងរលកកំដៅ ភ្លើងឆេះព្រៃ កាន់តែញឹកញាប់។ ស្ថានភាពនឹងអាចធ្ងន់ធ្ងរនៅឆ្នាំនេះ ឆ្នាំ ២០២៣ នៅពេលបាតុភូតអែល នីញ៉ូ ដែលជាដើមហេតុនៃខ្យល់ព្យុះ គ្រោះរាំងស្ងួត និងគ្រោះទឹកជំនន់ ចាប់វិលត្រលប់មកវិញ នៅខែកក្កដាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ