ប្រធានាធិបតីអ៊ុយក្រែន ទាមទារបង្កើតតុលាការពិសេសសម្រាប់បទឧក្រិដ្ឋឈ្លានពាន
នៅថ្ងៃព្រហស្បតិ៍ទី ៥ ឧសភានេះ លោក វ៉ូឡូឌីមៀរ ហ្សេឡេនស្គី ប្រធានាធិបតីអ៊ុយក្រែន បានអញ្ជើញទៅដល់ទីស្នាក់ការតុលាការព្រហ្មទណ្ឌអន្តរជាតិ នៅទីក្រុងឡាអេ ដែលបានចេញដីកាតាមចាប់ខ្លួនលោកប្រធានាធិបតីរុស្ស៊ី ពូទីន កាលពីខែមីនា។ នៅតុលាការ លោក ហ្សេឡេនស្គី បានថ្លែងទាមទារឱ្យបង្កើតតុលាការពិសេសសម្រាប់កាត់ទោសបទឧក្រិដ្ឋឈ្លានពានគេ។
ចុះផ្សាយនៅថ្ងៃ៖
ស្តាប់ - ០១:៤៦
ក្នុងដំណើរទស្សនកិច្ច ដោយឥតព្រាងទុក នៅប្រទេសហូឡង់ លោកប្រធានាធិបតីអ៊ុយក្រែន បានអញ្ជើញទៅទីស្នាក់ការតុលាការព្រហ្មទណ្ឌអន្តរជាតិ ក្រោមការការពារសុវត្ថិភាពយ៉ាងតឹងតែងបំផុត។ នៅចំពោះមុខប្រធានតុលាការនិងតំណាងការទូតដ៏ច្រើន លោកហ្សេឡេនស្គីបានថ្លែងសុន្ទរកថាទៅកាន់តុលាការព្រហ្មទណ្ឌអន្តរជាតិ ក្នុងអត្ថន័យបញ្ជាក់ថា “គ្មានសន្តិភាពទេ បើគ្មានយុត្តិធម៌ចំពោះអ៊ុយក្រែន”។
“ត្រូវតែមានអ្នកទទួលខុសត្រូវចំពោះបទឧក្រិដ្ឋឈ្លានពាន ដែលជាដើមហេតុនៃវិបត្តិ។ ខ្ញុំចង់ឃើញវ្លាដេមៀរម្នាក់ទៀត នៅក្រុងឡាអេ ព្រោះគេសមតែត្រូវទទួលការដាក់ទោសនៅទីជារដ្ឋធានីនៃច្បាប់អន្តរជាតិ។ នេះជាប្រសាសន៍របស់លោកហ្សេឡេនស្គី ដោយអំពាវនាវឱ្យមានការបង្កើតតុលាការពិសេស ដើម្បីផ្តល់យុត្តិធម៌ដ៏ទូលំទូលាយ មិនមែនជាតុលាការកូនកាត់ដូចប្រទេសមួយចំនួនស្នើឡើងឡើយ។
បើតាមនិយមន័យរបស់អង្គការសហប្រជាជាតិ រាល់ការប្រើកម្លាំងយោធារបស់រដ្ឋមួយប្រឆាំងនឹងបូរណភាព និងអធិបតេយ្យភាព ឬឯករាជ្យភាពនយោបាយរបស់មួយផ្សេងទៀត ត្រូវបានចាត់ទុកបទឈ្លានពាន។ ប៉ុន្តែតុលាការព្រហ្មទណ្ឌអន្តរជាតិ គ្មានសមត្ថកិច្ចកាត់ទោសបទឈ្លានពានរបស់រុស្ស៊ីដែលមិនមែនជាប្រទេសហត្ថលេខីសន្ធិសញ្ញាក្រុងរ៉ូមទេ គឺមានសមត្ថកិច្ចត្រឹមកាត់ទោសបទឧក្រិដ្ឋកម្មប្រល័យពូជសាសន៍នៅអ៊ុយក្រែនតែប៉ុណ្ណោះ។
សូមបញ្ជាក់ថា មុននឹងទៅដល់តុលាការព្រហ្មទណ្ឌអន្តរជាតិ លោកហ្សេឡេនស្គីបានអញ្ជើញទៅព្រឹទ្ធសភាហូឡង់ លោកប្រធានាធិបតីហ្សេឡេនស្គី ក៏មានជំនួបជាមួយនាយករដ្ឋមន្ត្រីហូឡង់ និងប៊ែលហ្សិកទៀត ដើម្បីពិភាក្សាអំពីស្ថានភាពនៅអ៊ុយក្រែន។ កាលពីថ្ងៃពុធម្សិលមិញ លោកហ្សេឡេនស្គី បានអញ្ជើញទៅបំពេញទស្សនកិច្ចដ៏គួរឱ្យភ្ញាក់ផ្អើលនៅហ្វាំងឡង់។ នៅទីនោះលោកបានសន្យា បើកយុទ្ធនាការវាយបកលើប្រទេសឈ្លានពានរុស្ស៊ី។ ជាយុទ្ធនាការផ្តាច់ព្រ័ត្រនៅឆ្នាំនេះ សម្រាប់អ៊ុយក្រែននិងអឺរ៉ុប ប្រឆាំងនឹងរុស្ស៊ី។ តែលោកបានបដិសេធថាគ្មានវាយប្រហារអ៊ុយក្រែនសំដៅលើបុគ្គលវ្លាដេមៀពូទីនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ