មិនដល់៤៨ម៉ោងផង ស៊ែរប៊ីជួបហេតុការណ៍បាញ់រះសម្លាប់មនុស្សពីរផ្ទួនគ្នា
ស៊ែរប៊ីមិនទាន់បាត់ស្លុតនឹងហេតុការណ៍បាញ់រះសម្លាប់មនុស្សនៅក្នុងសាលាកាលពីថ្ងៃពុធផង ស្រាប់តែមានការបាញ់រះថ្មីមួយទៀតកើតឡើងនៅយប់មិញ។ ការបាញ់រះថ្មីបាន ផ្តាច់ជីវិតមនុស្សអស់៨នាក់ និងរបួស១៤នាក់។ ហេតុការណ៍បានកើតឡើងនៅចម្ងាយប្រមាណ៦០គីឡូម៉ែត្រពីរដ្ឋធានី។ ប៉ូលិសចាប់ខ្លួនខ្មាន់កាំភ្លើងដ៏ចម្បងគេបាន និងបាញ់សម្លាប់អ្នករួមដៃម្នាក់។
ចុះផ្សាយនៅថ្ងៃ៖
ស្តាប់ - ០២:១២
បើតាមទូរទស្សន៍ជាតិ ខ្មាន់កាំភ្លើងបានផ្តើមបាញ់ប្រហារ ក្រោយពីមានជម្លោះនៅក្នុងគ្រួសារ។ បន្ទាប់មកទើបជននេះចេញបាញ់រះលើហ្វូងមនុស្សនៅក្នុងភូមិ ចំនួនបី ជាបន្តបន្ទាប់គ្នា មុននឹងឡើងឡានរត់គេចខ្លួន។ ជនដៃដល់បានប្រើកាំភ្លើងស្វ័យប្រវត្តិ និងបន្តបាញ់ទៀតនៅពេលរត់គេចខ្លួន។
នៅក្នុងប្រតិបត្តិការតាមប្រមាញ់ ស្ទើរពេញមួយយប់ ដែលមានប្រើកម្លាំងប៉ូលិស៦០០នាក់ និងឧទ្ធម្ភាគចក្រជាច្រើនគ្រឿងឆ្វែលពីលើអាកាស ព្រមទាំងក្រុមសង្គ្រោះជាច្រើន ប៉ូលិសអាចចាប់ខ្លួនខ្មាន់កាំភ្លើងចម្បងគេ ដែលមានអាយុ២១ឆ្នាំ នៅព្រឹកថ្ងៃសុក្រ។ ចំណែកជនផ្សំគំនិតម្នាក់ ត្រូវបានបាញ់សម្លាប់នៅពេលប៉ូលិសឡោមបង្ខំឱ្យចុះចូល។ រដ្ឋមន្ត្រីក្រសួងមហាផ្ទៃបានចាត់ទុកការបាញ់ប្រហារនេះ ជាទង្វើភេរវកម្ម។
ហេតុការណ៍បាញ់រះថ្មីនេះ បានកើតឡើង មិនដល់៤៨ម៉ោងក្រោយការបាញ់រះនៅក្នុងសាលារៀនផង។ កាលពីរសៀលថ្ងៃពុធ សិស្សវ័យ១៣ឆ្នាំម្នាក់ បានបាញ់សម្លាប់មនុស្សអស់៩នាក់ និងរបួស៧នាក់ ដោយប្រើកាំភ្លើងរបស់ឪពុក។ រដ្ឋាភិបាលស៊ែរប៊ីបានចេញក្រិត្យកាន់ទុក្ខជាតិរយៈពេលបីថ្ងៃ ចាប់ពីថ្ងៃសុក្រនេះទៅ។ ប៉ុន្តែកម្មវិធីខ្លះត្រូវលុបចោលទៅវិញ។ ជាថ្ងៃដ៏សោកសៅបំផុតមួយ សម្រាប់ស៊ែរប៊ីសម័យទំនើប។ នេះជាប្រសាសន៍របស់លោកប្រធានាធិបតីស៊ែរប៊ី អាឡេកសង់ដារ វូឈីក Aleksandar Vucic ដោយប្រកាសបើកយុទ្ធនាការប្រមូលអាវុធពីប្រជាពលរដ្ឋ ឱ្យបានស្ទើរទាំងស្រុង។ លោកប្រធានាធិបតីក៏បានសន្យាសើរើច្បាប់ផ្តល់សិទ្ធិកាន់អាវុធធុនស្រាល និងអាវុធសម្រាប់បរបាញ់សត្វ។
ស៊ែរប៊ីមានប្រជាជនសរុប៦លាន៨សែននាក់ ហើយមានអាវុធជាផ្លូវការ ចំនួន៧៦៥០០០ដើម ក្នុងនោះ៣៦០០០០ដើមជាអាវុធបាញ់សត្វ។ នេះបើតាមទិន្នន័យផ្តល់ដោយលោកប្រមុខរដ្ឋ ដែលក៏ប្តេជ្ញាប្រយុទ្ធប្រឆាំងនឹងការកាន់អាវុធខុសច្បាប់ទៀត។
បើតាមការសិក្សានៅឆ្នាំ២០១៨ ដោយអង្គការក្រៅរដ្ឋាភិបាលស្វីស ស៊ែរប៊ីជាប់ចំណាត់ទីបី ពិភពលោក ខាងមានចរាចរណ៍អាវុធច្រើនជាងគេ ដោយមានអាវុធ៣៩ដើមសម្រាប់ប្រជាពលរដ្ឋ១០០នាក់។ ជាការប្រៀបធៀប អាមេរិកដែលជាប់លេខមួយនោះ មានអាវុធច្រើនមនុស្ស គឺ១២០ដើមសម្រាប់ពលរដ្ឋ១០០នាក់ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ