កូសូវ៉ូ៖ របួសទាហានអូតង់ជាង៣០នាក់ ក្នុងបាតុកម្មហិង្សាចលាចល រវាងជនជាតិស៊ែរប៊ីនិងអាល់បានី
ស្ថិរភាពតំបន់កូសូវ៉ូ ហាក់កំពុងតែរំជើបរំជួលខ្លាំង ដោយសារតែការប្រឈមមុខដាក់គ្នាយ៉ាងហិង្សា របស់ជនជាតិស៊ែរប៊ី និងជនជាតិអាល់បានី។ ក្រុមជនជាតិស៊ែរប៊ីបានធ្វើបាតុកម្ម ប្រឆាំងនឹងលទ្ធផលបោះឆ្នោត ដែលបានប្រគល់ អំណាចទៅឲ្យមេឃុំជាជនជាតិអាល់បានី។ បាតុកម្មហិង្សានេះបានបណ្តាលឲ្យរបួស ទាហានអន្តរជាតិរបស់អូតង់ ចំនួនជាង៣០នាក់ ដែលបានបើកប្រតិបត្តិការបំបែកបាតុកម្ម និងរក្សាសណ្តាប់ធ្នាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៩
ជាច្រើនថ្ងៃមកហើយ ដែលស្ថានភាពនៅភាគខាងជើងតំបន់កូសូវ៉ូ បានរំជើបរំជួលខ្លាំង បន្ទាប់ពីជនជាតិស៊ែប ដែលរស់នៅក្នុងឃុំ៤ បានចេញធ្វើបាតុកម្មប្រឆាំងនឹងការបោះឆ្នោតឃុំសង្កាត់ ព្រមទាំងប្រឆាំងនឹងការចូលកាន់អំណាចរបស់មេឃុំជនជាតិអាល់បានី។ ការបោះឆ្នោតឃុំសង្កាត់នៅតំបន់ភាគខាងជើងកូសូវ៉ូ កាលពីខែមេសា ត្រូវបានក្រុមជនជាតិស៊ែបធ្វើពហិកា ដែលបានបណ្តាលឲ្យ មេឃុំដែលជាប់ឆ្នោត គឺជាជនជាតិអាល់បានី ជាមួយនឹងកម្រិតចំនួនអ្នកទៅបោះឆ្នោត មានតែប្រមាណ៣,៥%ប៉ុណ្ណោះ។
ក្រុមជនជាតិស៊ែបបាននាំគ្នាធ្វើបាតុកម្ម ដោយស្រែកបន្លឺថា គឺរដ្ឋាភិបាលកូស៊ូវ៉ូ ដឹកនាំដោយជនជាតិអាល់បានី ដែលបានរៀបគម្រោង លើកបន្តុបក្រុមជនជាតិអាល់បានីគ្នាឯង ឲ្យដឹកនាំតំបន់នេះ ជាទីដែលសំបូរដោយជនជាតិស៊ែបរស់នៅ។ កងទាហានអន្តរជាតិ ដឹកនាំដោយអង្គការសម្ព័ន្ធមិត្តអូតង់ (KFOR) ដែលមានវត្តមានរក្សាសន្តិភាពនៅតំបន់កូសូវ៉ូ បានចូលធ្វើអន្តរាគមន៍ បំបែកក្រុមបាតុករស៊ែប កាលពីថ្ងៃចន្ទ ទី២៩ឧសភា។ ក្រុមបាតុករស៊ែប បានគុបដុំថ្ម គុបដបភ្លើង មកលើក្រុមទាហាន និងបានដុតបំផ្លាញរថយន្តជាច្រើន។
ក្រសួងការពារជាតិហុងគ្រី បានបញ្ជាក់ថា មានទាហានខ្លួនចំនួនជាង២០នាក់បានរងរបួស ក្នុងនោះ៧នាក់រងរបួសធ្ងន់។ អ៊ីតាលីវិញបានអះអាងថា មានទាហានខ្លួន១១នាក់រងរបួស។ អគ្គបញ្ជាការកងទ័ពអន្តរជាតិរក្សាសន្តិភាពនៅកូសូវ៉ូ ដែលដឹកនាំដោយអូតង់ បានចេញលិខិត ថ្កោលទោសអំពើហិង្សា ដែលបង្កឡើងដោយបាតុករ សំដៅវាយប្រហារដោយចំពោះតែម្តង មកលើរូបរាងកាយរបស់កងទាហានអន្តរជាតិ។ យោងតាមលិខិតនេះ យ៉ាងហោចណាស់ មានទាហានអន្តរជាតិចំនួន២៥នាក់បានរងរបួស។ ដោយឡែក លោកប្រធានាធិបតីស៊ែប៊ី បានអះអាងថា ជនជាតិស៊ែប៊ីចំនួនយ៉ាងហោច៥២នាក់ បានរងរបួស ដោយសារតែប្រតិបត្តិការបង្ក្រាបរបស់កងទាហាន និងនគរបាលកូសូវ៉ូ។
សូមបញ្ជាក់ថា ក្រោយរលត់ភ្លើងសង្គ្រាមស៊ីវីលជាមួយស៊ែប៊ី តំបន់កូសូវ៉ូបានប្រកាសឯករាជ្យនៅឆ្នាំ២០០៨។ តែ ស៊ែប៊ីមិនបានទទួលស្គាល់ឯករាជ្យនេះទេ ដោយចាត់ទុកកូសូវ៉ូ ដែលមានជនជាតិស៊ែប រស់នៅប្រមាណជាង១២ម៉ឺននាក់នោះ ថាជាតំបន់ស្វយ័ត្នរបស់ខ្លួន។ សហគមន៍អន្តរជាតិ ដូចជាអង្គការសហប្រជាជាតិជាដើម ក៏នៅមិនទាន់ទទួលស្គាល់ជាផ្លូវការដែរ នូវឯករាជ្យរបស់តំបន់កូសូវ៉ូ។ ក្រោយផ្ទុះអំពើហិង្សាថ្មីៗនេះ លោកប្រធានាធិបតីស៊ែប៊ី បានប្រកាសបញ្ជូនទាហានទៅកាន់ព្រំដែនជាប់កូសូវ៉ូ។
ពីទីក្រុងព្រុចស៊ែល អង្គការអូតង់ បានចាត់ទុកការវាយប្រហារមកលើកងទាហានអន្តរជាតិ ថាជារឿងមិនអាចទទួលយកបានជាដាច់ខាត។ ដូចគ្នាដែរ រដ្ឋាភិបាលបារាំង បានអំពាវនាវ រន្ធាន់ឲ្យភាគីទាំងសងខាង គឺរដ្ឋាភិបាលប្រទេសស៊ែប៊ី និងរដ្ឋាភិបាលកូសូវ៉ូ ត្រូវតែចូលតុចរចាគ្នា ព្រោះជម្លោះហិង្សានេះ អាចក្លាយជាភ្នក់ភ្លើងសង្គ្រាមថ្មីមួយទៀត ដែលគំរាមសន្តិសុខរបស់អឺរ៉ុបទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ