ជនសង្ស័យចាក់សម្លាប់មនុស្ស នៅសួនកុមារ ក្នុងក្រុងAnnecyស្រែកក្នុងនាមព្រះយេស៊ូគ្រឹស្ត
បារាំងតក់ស្លុត រន្ធត់ នៅចំពោះមុខហេតុការណ៍ចាក់សម្លាប់មនុស្ស នៅទីក្រុងអានស៊ី (Annecy) ភាគខាងត្បូងប្រទេស។ នៅថ្ងៃព្រហស្បតិ៍ម្សិលមិញ ជនសង្ស័យម្នាក់បានដើរទៅចាក់មនុស្សនៅក្នុងសួនកុមារ ក្បែរបឹង Annecy ដែលបានបណ្តាលឲ្យមានមនុស្សរបួស ៦នាក់ ដែលនៅក្នុងនោះ ៤នាក់ ជាកុមារ អាយុ ពី ២ ទៅ៣ឆ្នាំ។ តាមរដ្ឋអាជ្ញាបារាំង គេនៅមិនទាន់រកឃើញមានភស្តុតាងណាដែលបញ្ជាក់ថា ការដើរចាក់សម្លាប់មនុស្ស កាលពីថ្ងៃម្សិលមិញ ធ្វើឡើងក្នុងហេតុផលភេរវកម្ម។
ចុះផ្សាយនៅថ្ងៃ៖
ស្តាប់ - ០២:១៧
មានវត្តមានផ្ទាល់ នៅជិតកន្លែងកើតហេតុ ក្បែរបឹង Annecy នាយករដ្ឋមន្រ្តីបារាំង លោកស្រីអេលីហ្សាបែត ប៊ន ចាត់ទុក ហេតុការណ៍ចាក់សម្លាប់មនុស្ស នៅព្រឹកថ្ងៃព្រហស្បតិ៍ថា ជារឿងដ៏អាក្រក់ គ្មានអ្វីមកប្រៀបផ្ទឹមបាន។
នៅព្រឹកថ្ងៃព្រហស្បតិ៍ ជនសង្ស័យដើមកំណើតស៊ីរីម្នាក់បានចូលទៅចាក់សម្លាប់មនុស្សនៅក្នុងសួនកុមារ ក្បែរបឹងដ៏ស្រស់ស្អាតAnnecy ដែលបានបណ្តាលឲ្យមានមនុស្សរបួស ៦នាក់ ដែលនៅក្នុងនោះ ៣នាក់របួសធ្ងន់។ តាមប៉ូលិសបារាំង ក្នុងចំណោមជនរងគ្រោះ មាន៤នាក់ ជាកុមារ អាយុ ពី២ ទៅ៣ឆ្នាំ។ នៅក្នុងវីដេអូដែលអ្នកដំណើរតាមផ្លូវថតបាន និងចុះផ្សាយដោយទីភ្នាក់ងារព័ត៌មានបារាំង AFP នៅពេលដើរសំដៅទៅរកជនរងគ្រោះ ជនសង្ស័យបានស្រែក ពាក្យ “ក្នុងនាមព្រះយេស៊ូគ្រឹស្ត”។
រដ្ឋអាជ្ញាបារាំង ប្រចាំក្រុងAnnecy បាននិយាយប្រាប់អ្នកកាសែតថា គ្មានអង្គហេតុណាដែលអាចឲ្យគេសន្និដ្ឋានថា ជាអំពើភេរវកម្ម ប៉ុន្តែ អាជ្ញាធរបារាំងបើកការស៊ើបអង្កេតរួចហើយ សម្រាប់ការប៉ុនប៉ងធ្វើឃាត។ តាមនាយករដ្ឋមន្រ្តីបារាំង ជនសង្ស័យគ្មានឈ្មោះក្នុងបញ្ជីតាមដានរបស់ភ្នាក់ងារស៊ើបការណ៍សម្ងាត់បារាំង ហើយក៏មិនដែលមានប្រវត្តិកើតជំងឺផ្លូវចិត្ត។
មានដើមកំណើតស៊ីរី ជនសង្ស័យអាយុ ៣១ឆ្នាំ បានធ្វើដំណើរមកដល់ទឹកដីបារាំង នៅចុងឆ្នាំ ២០២២ ជាមួយ ក្រដាសស្នាមជាជនភៀសខ្លួន ស៊ីរី នៅប្រទេសស៊ុយអែត។ តាមទីភ្នាក់ងារព័ត៌មានបារាំង AFP ជនសង្ស័យដែលបានចាកចេញពីប្រទេសស៊ីរី ដោយសារសង្រ្គាមស៊ីវិល នៅឆ្នាំ ២០១១បានរៀបការជាមួយស្រ្តីស៊ុយអែតម្នាក់ និងរស់នៅស៊ុយអែត រយៈពេល ១០ឆ្នាំ ប៉ុន្តែ ត្រូវរដ្ឋាភិបាលស៊ុយអែតបដិសេធមិនផ្តល់សញ្ញាតិ។
តាមស្រ្តីជាប្រពន្ធស៊ុយអែត ដែលបានលែងលះគ្នា កាលពីឆ្នាំមុន ជនសង្ស័យជាមនុស្សស្លូតត្រង់ ប៉ុន្តែ បានសម្រេចចិត្តចាកចេញពីស៊ុយអែត មករស់នៅប្រទេសបារាំង។ មានប្រភពមកពីសហគមន៍អ្នកកាន់សាសនាគ្រឹស្តនៅប្រទេសស៊ីរី ជនសង្ស័យធ្លាប់បាននិយាយប្រាប់អតីតភរិយា តាមទូរស័ព្ទ កាលពី៤ខែមុន ថា រូបគេស្នាក់នៅក្នុងវិហារកាតូលិក។ នៅប្រទេសបារាំង ជនសង្ស័យបានដាក់ពាក្យសុំសាជាថ្មី សិទ្ធិសុំជ្រកកោន។ ប៉ុន្តែ អាជ្ញាធរបារាំងមិនផ្តល់ចម្លើយអ្វី ដោយគិតថា ជនសង្ស័យបានទទួលសិទ្ធិជាជនភៀសខ្លួនរួចហើយ នៅប្រទេសស៊ុយអែត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ