នាយករដ្ឋមន្រ្តីកាណាដាស្តីបន្ទោសរុស្ស៊ីក្នុងរឿងបំផ្លាញទំនប់វារីអគ្គិសនីអ៊ុយក្រែន
នាយករដ្ឋមន្រ្តីកាណាដាលោកហ្សូសស្តាំង ទ្រុយដូបានបំពេញទស្សនកិច្ចដោយមិនបានព្រាងទុកនៅក្នុងទីក្រុងកៀវ ប្រទេសអ៊ុយក្រែននាថ្ងៃសៅរ៍ ទី១០ មិថុនា។ វត្តមានរបស់លោកទ្រុយដូក្នុងទឹកដីអ៊ុយក្រែនបានធ្វើឡើងបន្ទាប់ពីមានព្រឹត្តិការណ៍បំផ្ទុះបំផ្លាញទំនប់វារីអគ្គិសនី Kakhovka ក្នុងតំបន់ Kherson ដែលរុស្ស៊ី និងអ៊ុយក្រែនបន្តទម្លាក់ការទទួលខុសត្រូវដាក់គ្នា។ ផលវិបាកកើតចេញពីការបំផ្ទុះបំផ្លាញទំនប់វារីអគ្គិសនី Kakhovka គឺលំហូរទឹកទៅលិចតាមតំបន់ដែលស្ថិតក្រោមកាន់កាប់របស់អ៊ុយក្រែន និងតំបន់ដែលកាន់កាប់ដោយរុស្ស៊ី។
ចុះផ្សាយនៅថ្ងៃ៖
នៅក្នុងជំនួបជាមួយប្រធានាធិបតីអ៊ុយក្រែនលោកហ្សេឡេនស្គី នាយករដ្ឋមន្រ្តីកាណាដាលោកទ្រុយដូមិនបានចង្អុលចំមុខរុស្ស៊ីជាអ្នកទទួលខុសត្រូវនៃការបំផ្លាញទំនប់វារីអគ្គិសនី Kakhovka ទេ។ តែបានយល់ឃើញថា ការបំផ្លាញទំនប់វារីអគ្គិសនីមួយនេះជាផលវិបាកផ្ទាល់ដែលកើតចេញពីសង្រ្គាមរុស្ស៊ីឈ្លានពានអ៊ុយក្រែន។ អ្វីដែលលោកទ្រុយដូចង់មានន័យគឺថា បើរុស្ស៊ីមិនបានសម្រេចចិត្តចូលឈ្លានពានអ៊ុយក្រែនទេ ម្ល៉េះក៏ទំនប់វារីអគ្គិសនី Kakhovka មិនទទួលរងការបំផ្លាញដែរ។ គួរបញ្ជាក់ថា ទំនប់វារីអគ្គិសនីអ៊ុយក្រែនមួយនេះបានផ្ទុះបាក់ធ្លាយក្នុងថ្ងៃទី៥ មិថុនា។
ផលវិបាកនៃការផ្ទុះបាក់មួយនេះកាលណោះ គឺបង្កឲ្យមានទឹកជំនន់លិចភូមិ ស្រុកនៅក្នុងតំបន់ដែលកាន់កាប់ដោយអ៊ុយក្រែន និងតំបន់ដែលកាន់កាប់ដោយរុស្ស៊ី រួមទាំងមានមនុស្សស្លាប់ និងរបួស។ ក្រៅពីស្តីបន្ទោសរុស្ស៊ីក្នុងរឿងបំផ្លាញទំនប់វារីអគ្គិសនី Kakhovka នាយករដ្ឋមន្រ្តីកាណាដាក៏បានប្រកាសផ្តល់ជំនួយចំនួន ១០លានដុល្លារឲ្យអ៊ុយក្រែននៅក្នុងរឿងនេះ និងបន្ថែម ៥០០លានដុល្លារសម្រាប់ជំនួយយោធា។ ទន្ទឹមគ្នានេះ លោកទ្រុយដូក៏បានប្រកាសពីការចូលរួមជាមួយក្រុមប្រទេសលោកខាងលិចក្នុងការបង្ហាត់បង្រៀនអ្នកបើកបរយន្តហោះចម្បាំងអ៊ុយក្រែន និងចូលរួមនៅក្នុងកម្មវិធីថែទាំ និងគាំទ្រយន្តហោះចម្បាំងអ៊ុយក្រែន។
នៅមុនជំនួបជាមួយលោកហ្សេឡេស្គី លោកទ្រុយដូក៏បានជួបសន្ទនាជាមួយអនុរដ្ឋមន្រ្តីការពារជាតិអ៊ុយក្រែន និងក្រុមទាហានអ៊ុយក្រែនដែលបានទទួលការហ្វឹកហាត់នៅកាណាដា។ គួរបញ្ជាក់ថា កាណាដាដែលមានសហគមន៍អ៊ុយក្រែនរស់នៅយ៉ាងសំខាន់ជាប្រទេសមួយដែលបានគាំទ្រ និងផ្តល់ជំនួយច្រើនឲ្យអ៊ុយក្រែន ពិសេសជំនួយយោធា និងការហ្វឹកហាត់ទាហានអ៊ុយក្រែនជាង ៣៦ ០០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ