បាក់ទំនប់ទឹកនៅអ៊ុយក្រែន៖ កាកបាទក្រហមព្រួយបារម្ភ អំពីគ្រាប់មីនដែលត្រូវទឹកហូរនាំរាយប៉ាយ
ករណីបាក់ទំនប់ទឹកដ៏ធំ នៅភាគខាងត្បូងអ៊ុយក្រែន មិនត្រឹមតែបានបង្កឲ្យមនុស្សរាប់ពាន់នាក់ត្រូវភៀសខ្លួន ព្រមទាំងបង្កឲ្យមានការព្រួយបារម្ភ អំពីមហន្តរាយធម្មជាតិប៉ុណ្ណោះទេ តែពេលនេះ គឺមានការបារម្ភដ៏ធំមួយទៀត ទាក់ទិននឹងគ្រាប់មីនរាប់ពាន់គ្រាប់ ដែលនៅរាយប៉ាយក្នុងតំបន់នេះ។ យោងតាមអង្គការកាកបាទក្រហមអន្តរជាតិ ទឹកទន្លេជន់លិចក្រោយបាក់ទំនប់ បានហូរនាំគ្រាប់មីនជាច្រើនគ្រាប់ ឲ្យរសាត់រាយប៉ាយ បង្កគ្រោះថ្នាក់យ៉ាងខ្លាំងដល់សុវត្ថិភាពនៅតំបន់នេះ។
ចុះផ្សាយនៅថ្ងៃ៖
ស្តាប់ - ០២:២៣
យោងតាមលោក Erik Tollefsen អ្នកជំនាញផ្នែកបោសសំអាតអាវុធជាតិផ្ទុះ នៃអង្គការកាកបាទក្រហមអន្តរជាតិ គឺគ្រាប់មីនជាច្រើនគ្រាប់ ត្រូវបានភាគីជម្លោះទាំងសងខាង ដាក់បង្កៃកប់ក្រោមដី នៅតំបន់ Kherson ជាប់ដងទន្លេ Dniepr ដែលជាខ្សែសមរភូមិជួរមុខ។ ក្រុមការងារកាកបាទក្រហម បានបើកប្រតិបត្តិការ ដាក់ផ្លាកសញ្ញាសំគាល់ ទីតាំង ដែលមានគ្រាប់មីន បានមួយផ្នែកហើយ ដើម្បីរងចាំការបោសសំអាត។ ក៏ប៉ុន្តែ ក្រោយហេតុការណ៍ បាក់ទំនប់ទឹក Kakhovka កាលពីថ្ងៃអង្គារកន្លងទៅ តំបន់នេះត្រូវទឹកជន់លិចហួរគួចត្របាញ់ នាំយកទាំងផ្លាកសញ្ញា ហើយអាចប្រហែលជាគ្រាប់មីនជាច្រើនគ្រាប់ ឲ្យរសាត់រាយប៉ាយ ទៅតាមខ្សែទឹក។
អ្នកជំនាញរូបនេះបានថ្លែងការបារម្ភថា ចាប់ពីពេលនេះទៅ គេមិនដឹងថាគ្រាប់មីនទាំងអស់នោះ ត្រូវបានទឹកហូរនាំទៅដល់ត្រង់ណាខ្លះទេ។ វាគឺជាគ្រោះថ្នាក់ខ្លាំងណាស់ សម្រាប់ក្រុមសង្គ្រោះ ដែលចូលទៅជួយប្រជាពលរដ្ឋ នៅតំបន់ដែលត្រូវទឹកជន់លិច។ គ្រាប់មីនខ្លះ អាចត្រូវទឹកហូរនាំទៅឆ្ងាយនៅខាងក្រោម គំរាមដល់សុវត្ថិភាពប្រជាជន។
សូមបញ្ជាក់ថា ទំនប់វារីអគ្គីសនី Kakhovka ត្រូវបានបាក់ធ្លាយ ដោយការបាញ់ប្លោងគ្រាប់ចំ។ អ៊ុយក្រែន និងរុស្ស៊ីចោទគ្នាទៅវិញទៅមក ថាជាអ្នកធ្វើរឿងនេះ។ ប្រជាជនជាច្រើនពាន់នាក់ ត្រូវបានអាជ្ញាធរទាំងសងខាងជម្លៀសចេញ ខណៈទឹកបានជន់លិចភូមិ និងទីក្រុងមួយចំនួន ក្នុងតំបន់Kherson។ យោងតាមកាកបាទក្រហមអន្តរជាតិ ទោះមិនមានតួលេខច្បាស់ក៏ដោយ តែគេជឿថាតំបន់Kherson នេះ ត្រូវបានកងទ័ពទាំងសងខាងកប់បង្កៃគ្រាប់មីនក្នុងចំនួនដ៏សន្ធឹក។
បញ្ហាប្រើប្រាស់គ្រាប់មីនកប់ក្នុងដី នៅតាមសមរភូមិប្រយុទ្ធនៅអ៊ុយក្រែន ត្រូវបានអង្គការសហប្រជាជាតិទាញសញ្ញាអាសន្នរួចហើយ និងបានអំពាវនាវ ឲ្យភាគីជម្លោះត្រូវតែបញ្ឈប់ជាបន្ទាន់។ ប្រតិបត្តិការបោសសំអាតទឹកដីអ៊ុយក្រែនពីគ្រាប់មីន គឺជាអ្វីដែលសហគមអន្តរជាតិ បានផ្តោតការយកចិត្តទុកដាក់។ យ៉ាងណាមិញ នៅទីស្នាក់ការអង្គការកាកបាតក្រហមអន្តរជាតិ ក្បែរក្រុងហ្សឺណែវ អ្នកជំនាញទើបតែបានបង្ហាញយានដ្រូនប្រភេទថ្មី ដែលអាចហោះពីលើ ដឹងថាត្រង់ណាមានមីនក្នុងដី តាមរយៈការចាំកំដៅ។ យោងតាមលោកស្រីប្រធានកាកបាទក្រហមអន្តរជាតិ មនុស្សម្នាក់អាចដើររាវរកគ្រាប់មីន ក្នុងបរិវេណ៥០ម៉ែត្រការ៉េក្នុងមួយថ្ងៃ តែយានដ្រូនពិសេសនេះវិញ អាចធ្វើបាន ក្នុងទំហំដល់ទៅ ១សែនម៉ែត្រការ៉េ ក្នុងមួយថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ