អ្នកប្រឆាំងបេឡារុស៖វត្តមានទាហាន Wagner នៅបេឡារុសនឹងជះផលវិបាកដល់បេឡារុស និងប្រទេសជិតខាងបេឡារុស
ព័ត៌មានស្តីពីព្រឹត្តិការណ៍បះបោររបស់ក្រុមទាហានស៊ីឈ្នួលរុស្ស៊ី Wagner នៅរុស្ស៊ីកាលពីចុងសប្តាហ៍កន្លងទៅនៅមិនទាន់ស្ងប់ស្ងាត់ទេ។ ប្រធានាធិបតីបេឡារុសលោកអាឡិចសង់ លូកាឆេនកូបានធានាក្នុងថ្ងៃអង្គារ ទី២៧ មិថុនាថា លោកបាននិយាយប្រាប់ប្រធានាធិបតីរុស្ស៊ីលោកពូទីនកុំឲ្យសម្លាប់មេទាហាន Wagner លោកព្រីហ្គោហ្ស៊ីន។ គួរបញ្ជាក់ថា លោកលូកាឆេនកូដែលជាសម្ព័ន្ធមិត្តចាក់ទឹកមិនលេចរបស់លោកពូទីនបានដើរតួនាទីជាអាជ្ញាកណ្តាលនៅក្នុងព្រឹត្តិការណ៍បះបោរមួយនេះ និងបានទទួលលោកព្រីហ្គោហ្ស៊ីនឲ្យជ្រកកោនក្នុងទឹកដីបេឡារុស។ តួនាទីជាអាជ្ញាកណ្តាលរបស់លោកលូកាឆេនកូត្រូវបានលោកពូទីនអរគុណច្រើនដង ព្រោះវាបានធ្វើឲ្យរុស្ស៊ីបញ្ជៀសសង្រ្គាមស៊ីវិល។ តែនេះមិនមែនជាការយល់ឃើញរបស់ក្រុមប្រឆាំងបេឡារុសទេ។ សម្រាប់ពួកគេ សុន្ទរកថារបស់លោកលូឡាឆេនកូជាសុន្ទរកថាឃោសនា និងយល់ថា វត្តមានទាហាន Wagner លើទឹកដីបេឡារុសនឹងបង្កគ្រោះថ្នាក់ដល់បេឡារុស និងប្រទេសជិតខាងបេឡារុស។
ចុះផ្សាយនៅថ្ងៃ៖
ស្តាប់ - ០១:៣២
« លូកាឆេនកូព្យាយាមបង្ហាញខ្លួនឯងជាបុរសដែលបានរកឃើញកិច្ចព្រមព្រៀងរវាងព្រីហ្គោហ្ស៊ីន និងពូទីន។ គាត់ចង់ពិពណ៌នាខ្លួនឯង និងតាំងខ្លួនជាសកម្មជនម្នាក់ដើម្បីសន្តិភាព និងជាអ្នកដែលបានស្រោចស្រង់ពិភពលោកឲ្យគេចផុតពីគ្រោះមហន្តរាយនុយក្លេអ៊ែរ។ ពិតណាស់ គាត់កេងបានប្រយោជន៍ពីការឃោសនានេះ។ ក៏ប៉ុន្តែ វត្តមានក្រុមទាហានស៊ីឈ្នួលរុស្ស៊ី Wagner របស់ព្រីហ្គោហ្ស៊ីននៅលើទឹកដីបេឡារុសនឹងជះផលវិបាកធ្ងន់ធ្ងរ។
ផលវិបាកធ្ងន់ធ្ងរចំពោះសង្គមបេឡារុស និងចំពោះឯករាជ្យភាពរបស់បេឡារុស។ ផលវិបាកធ្ងន់ធ្ងរបន្ទាប់ទៀត គឺចំពោះក្រុមប្រទេសជិតខាងរបស់បេឡារុស ដូចយ៉ាងប៉ូឡូញ លីទុយអានី និងឡេតូនី។ ខ្ញុំគិតថា លូកាឆេនកូខ្លួនឯងមិនបានដឹងពីផលវិបាក មិនបានដឹងពីការគំរាមកំហែង និងមិនបានដឹងពីហានិភ័យនៃវត្តមានទាហាន Wagner ច្រើនពាន់នាក់នៅលើទឹកដីបេឡារុសរបស់យើងទេ។
អ្វីដែលគួរឲ្យស្តាយ គឺប្រជាជនបេឡារុសដែលមិនបានចូលរួមជាជនរងគ្រោះពីព្រឹត្តិការណ៍បះបោរនៅរុស្ស៊ីកាលពីចុងសប្តាហ៍កន្លងទៅ។ វិបត្តិផ្ទៃក្នុងនៅរុស្ស៊ីបានឆ្លងចូលក្នុងប្រទេសរបស់យើង។ ហេតុអ្វី?។ យើងមិនយល់ទាល់តែសោះ។ ប្រជាជនបេឡារុសមិនចង់ឃើញវត្តមានទាហានរុស្ស៊ី និងទាហានស៊ីឈ្នួលរុស្ស៊ីនៅលើទឹកដីរបស់ខ្លួនឡើយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ