អ្នកទទួលខុសត្រូវអាមេរិក៖នាយក CIA លោក William Burns បានទស្សនកិច្ចស្ងាត់ៗនៅអ៊ុយក្រែន
នៅអាមេរិក អ្នកទទួលខុសត្រូវម្នាក់មិនព្រមបញ្ចេញឈ្មោះបានបញ្ជាក់ប្រាប់ AFP ក្នុងថ្ងៃសុក្រ ទី៣០ មិថុនាថា នាយក CIA លោក William Burns បានទៅទស្សនកិច្ចស្ងាត់ៗនៅអ៊ុយក្រែននាពេលថ្មីៗកន្លងទៅ។ នៅក្នុងទឹកដីអ៊ុយក្រែន លោក William Burns បានជួបសន្ទនាជាមួយថ្នាក់ដឹកនាំក្រសួងស៊ើបការណ៍សម្ងាត់ និងប្រធានាធិបតីលោកហ្សេឡេនស្គី។ គួរបញ្ជាក់ថា ព័ត៌មានស្តីពីទស្សនកិច្ចស្ងាត់ៗរបស់នាយក CIA អាមេរិកនៅអ៊ុយក្រែនត្រូវបានកាសែតអាមេរិក The Washington Post ទម្លាយមុនគេ។
ចុះផ្សាយនៅថ្ងៃ៖
ស្តាប់ - ០២:១៩
គេត្រូវរង់ចាំលោក William Burns ត្រឡប់ដល់ទឹកដីអាមេរិកវិញទើបអ្នកទទួលខុសត្រូវអាមេរិកម្នាក់បញ្ជាក់ពីទស្សនកិច្ចរបស់លោក Burns នៅក្នុងប្រទេសអ៊ុយក្រែន។ ទស្សនកិច្ចដែលមិនត្រូវបានទម្លាយជាសាធារណៈបានធ្វើឡើងក្នុងពេលដែលអ៊ុយក្រែនកំពុងបន្តការវាយបកទៅលើទ័ពរុស្ស៊ីនៅប៉ែកខាងកើត និងប៉ែកខាងត្បូងប្រទេស។ តាមអ្នកទទួលខុសត្រូវអាមេរិកមិនព្រមបញ្ចេញឈ្មោះ លោក Burns បានបញ្ជាក់ជាថ្មីប្រាប់ថ្នាក់ដឹកនាំអ៊ុយក្រែន ពិសេសប្រធានាធិបតីលោកហ្សេឡេនស្គីពីការសន្យារបស់អាមេរិកក្នុងការចែករំលែកព័ត៌មានសម្ងាត់ដើម្បីជួយអ៊ុយក្រែនឲ្យការពារខ្លួនប្រឈមនឹងការឈ្លានពានរបស់រុស្ស៊ី។ អ្នកទទួលខុសត្រូវអាមេរិករូបនេះដដែលបានបន្ថែមថា លោក Burns ឧស្សាហ៍ទៅអ៊ុយក្រែនតាំងពីថ្ងៃផ្ទុះសង្រ្គាមជាង ១ឆ្នាំកន្លងទៅ។
ចំណែកកាសែតអាមេរិក The Washington Post ដែលបានទម្លាយព័ត៌មានរឿងទស្សនកិច្ចរបស់លោក Burns នៅអ៊ុយក្រែនមុនគេបានប្រាប់ឲ្យដឹងថា ថ្នាក់ដឹកនាំអ៊ុយក្រែនបានបង្ហាញលោក Burns នូវផែនការចំនួន ២ចំណុច ទី១ វាយដណ្តើមយកវិញនូវទឹកដីដែលរុស្ស៊ីកំពុងកាន់កាប់ និងទី១ ផ្តើមកិច្ចចរចាស្តីពីបទឈប់បាញ់ពីពេលនេះទៅដំណាច់ឆ្នាំ ២០២៣។ តាមអ្នកទទួលខុសត្រូវអាមេរិកដដែល នាយក CIA លោក William Burns បានទៅអ៊ុយក្រែននៅមុនផ្ទុះព្រឹត្តិការណ៍បះបោររបស់ក្រុមទាហានស៊ីឈ្នួលរុស្ស៊ី Wagner ដឹកនាំដោយលោកព្រីហ្គោហ្ស៊ីនក្នុងថ្ងៃទី២៤ មិថុនា។ តែរឿងរ៉ាវមួយនេះមិនត្រូវបានលោក Burns លើកយកទៅជជែកជាមួយថ្នាក់ដឹកនាំអ៊ុយក្រែនទេ។
ម្យ៉ាងទៀត និងបើតាមបណ្តាញសារព័ត៌មានអាមេរិកធំៗមួយចំនួន លោក Burns បានទូរស័ព្ទប្រាប់ប្រមុខក្រសួងស៊ើបការណ៍សម្ងាត់របស់រុស្ស៊ីថា អាមេរិកមិនមានជាប់ពាក់ព័ន្ធនឹងព្រឹត្តិការណ៍បះបោររបស់ក្រុមទាហានស៊ីឈ្នួល Wagner ទេ។ ដោយឡែក The Washington Post បានចុះផ្សាយក្នុងថ្ងៃសុក្រ ទី៣០ មិថុនានូវកិច្ចសន្ទនាជាមួយមេបញ្ជាការកងទ័ពអ៊ុយក្រែនលោក Valery Zaloujny។ នៅក្នុងកិច្ចសន្ទនា លោក Valery Zaloujny បានប្រាប់ពីការខ្វះអាវុធ ពិសេសយន្តហោះចម្បាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ