ប្រធានាធិបតីកូរ៉េខាងត្បូងបំពេញទស្សនកិច្ចឥតព្រាងទុកនៅអ៊ុយក្រែន និងបង្កើនជំនួយឲ្យអ៊ុយក្រែន
ប្រធានាធិបតីកូរ៉េខាងត្បូងលោកយូន ស៊ុកយោលបានបំពេញទស្សនកិច្ចឥតព្រាងទុកនៅអ៊ុយក្រែននាថ្ងៃសៅរ៍ ទី១៥ កក្កដា។ នាឱកាសនៅអ៊ុយក្រែន លោកយូន ស៊ុកយោលបានទៅទស្សនកិច្ចនៅក្រុងប៊ូតឆា និងក្រុងអៀពីន ហើយបានចូលជួបសន្ទនាជាមួយប្រធានាធិបតីអ៊ុយក្រែនលោកហ្សេឡេនស្គីក្នុងទីក្រុងកៀវ។ លោកយូន ស៊ុកយោលបានសន្យាបង្កើនជំនួយមនុស្សធម៌ និងជំនួយយោធា។ គួរបញ្ជាក់ថា តាំងពីរុស្ស៊ីចូលឈ្លានពានអ៊ុយក្រែន នេះជាលើកទី១ ដែលលោកយូន ស៊ុកយោលបានបំពេញទស្សនកិច្ចនៅអ៊ុយក្រែន
ចុះផ្សាយនៅថ្ងៃ៖
ស្តាប់ - ០២:១៩
ដំណើរទៅកាន់ក្រុងប៊ូតឆា និងក្រុងអៀពីនរបស់ប្រធានាធិបតីកូរ៉េខាងត្បូងលោកយូន ស៊ុកយោលជាដំណើរមិនអាចខ្វះបាន ព្រោះទី១ ក្រុងប៊ូតឆាជាទីកន្លែងសម្លាប់រង្គាលលើជនស៊ីវិលពីសំណាក់កងទ័ពរុស្ស៊ី និងទី២ ក្រុងអៀពីនជាទីកន្លែងដែលការវាយប្រហារដោយមីស៊ីលរបស់រុស្ស៊ីបានសំដៅតែលើតំបន់របស់ប្រជាជន។ បន្ទាប់មក លោកយូន ស៊ុកយោលបានដាក់កម្រងផ្កានៅស្តូបគោរពវិញ្ញាណក្ខន្ទចំពោះអ្នកស្លាប់ក្នុងសង្រ្គាម។ មុននឹងចាកចេញពីអ៊ុយក្រែន លោកយូន ស៊ុកយោលបានជួបសន្ទនាជាមួយប្រធានាធិបតីអ៊ុយក្រែនលោកហ្សេឡេស្គីក្នុងទីក្រុងកៀវ។
នាឱកាសនោះ ប្រធានាធិបតីកូរ៉េខាងត្បូងបានប្រកាសបង្កើនជំនួយមនុស្សធម៌ឲ្យអ៊ុយក្រែនដល់ ១៥០លានដុល្លារក្នុងឆ្នាំ ២០២៣ ពោលកើនបន្ថែមចំនួន ៥០លានដុល្លារបើធៀបនឹងឆ្នាំ ២០២២។ ក្រៅពីជំនួយមនុស្សធម៌ ក្រុងសេអ៊ូលក៏បានផ្តល់ឲ្យក្រុងកៀវនូវជំនួយយោធាក្រៅពីអាវុធ ដូចជាមួកសុវត្ថិភាព និងអាវពាក់ការពារគ្រាប់។ ជាការឆ្លើយការតបវិញ លោកហ្សេឡេនស្គីបានអរគុណចំពោះកិច្ចសន្ទនាប្រកបដោយអត្ថន័យ និងអរគុណចំពោះការគាំទ្ររឹងមាំរបស់លោកយូន ស៊ុកយោល។ ទន្ទឹមគ្នានេះ លោកហ្សេឡេនស្គីក៏បានអរគុណចំពោះគំនិតផ្តួចផ្តើមថ្មីរបស់លោកយូន ស៊ុកយោលក្នុងការផ្តល់ជំនួយហិរញ្ញវត្ថុ បច្ចេកទេស និងមនុស្សធម៌ឲ្យអ៊ុយក្រែន។
ក្រៅពីនេះ លោកហ្សេឡេនស្គី និងលោកយូន ស៊ុកយោលក៏បានជជែកគ្នាពីកិច្ចសហប្រតិបត្តិការទ្វេភាគីនៅក្នុងវិស័យថាមពល ចំណីអាហារ និងសេដ្ឋកិច្ចដែរ។ កូរ៉េខាងត្បូងក្នុងនាមជាប្រទេសនាំអាវុធចេញលំដាប់ទី៩ ក្នុងលោកបានផ្តល់ជំនួយយោធាទៅឲ្យអ៊ុយក្រែន និងបានលក់រថក្រោះ រួមទាំងគ្រាប់កាំភ្លើងឲ្យប៉ូឡូញដែលជាសម្ព័ន្ធមិត្តគន្លឹះរបស់អ៊ុយក្រែន។ ក្រុងសេអ៊ូលមិនផ្តល់អាវុធឲ្យក្រុងកៀវ ព្រោះក្រុងសេអ៊ូលបានប្រកាន់យកនយោបាយមិនបញ្ជូនគ្រឿងសព្វាវុធទៅកាន់តំបន់ដែលកំពុងមានជម្លោះ។ តែវិមានប្រធានាធិបតីកូរ៉េខាងត្បូងបានទម្លាយនាដើមឆ្នាំ ២០២៣ នេះថា ការវាយប្រហារទ្រង់ទ្រាយធំរបស់រុស្ស៊ីប្រឆាំងជនស៊ីវិលអាចធ្វើឲ្យកូរ៉េខាងត្បូងប្តូរនយោបាយមួយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ