ទីភ្នាក់ងារចារកិច្ចអង់គ្លេស អំពាវនាវឲ្យប្រជាជនរុស្ស៊ីធ្វើជាភ្នាក់ងារចារកិច្ចឲ្យអង់គ្លេស
ថ្ងៃពុធទី១៩កក្កដា ប្រធានទីភ្នាក់ងារចារកិច្ចក្រៅប្រទេស របស់អង់គ្លេស បានថ្លែងអំពាវនាវ ហៅឲ្យប្រជាជនរុស្ស៊ីទាំងអស់ ដែលអត់ទ្រាំលែងបានចំពោះសង្គ្រាមឈ្លានពានដែលមេដឹកនាំខ្លួនបានធ្វើនៅអ៊ុយក្រែន ថាអាចងាកមកធ្វើជាភ្នាក់ងារចារកិច្ច បម្រើឲ្យអង់គ្លេសបាន។ នេះគឺជាសារប្រកូកប្រកាស របស់លោកប្រធានទីភ្នាក់ងារចារកិច្ចអង់គ្លេស ដែលកំពុងតែត្រូវការ ជ្រើសរើសសមាជិកចារកិច្ចសម្ងាត់ថ្មីៗបន្ថែមទៀតនៅរុស្ស៊ី។
ចុះផ្សាយនៅថ្ងៃ៖
ស្តាប់ - ០២:២៤
ថ្លែងពីទីក្រុងប្រាហ្ក លោក Richard Moor ប្រធានទីភ្នាក់ងារចារកិច្ចក្រៅប្រទេស របស់អង់គ្លេស ដែលគេហៅកាត់ថា MI6 បានលើកឡើងថា បច្ចុប្បន្ននេះ មានប្រជាជនរុស្ស៊ីច្រើននាក់ណាស់ ដែលអត់ធន់ ខាំមាត់ មិនហ៊ាននិយាយអ្វី ដោយឃើញសកម្មភាពព្រៃផ្សៃ របស់កងទ័ពរុស្ស៊ី បានបាញ់ប្លោងទម្លាក់គ្រាប់បែកលើទីក្រុងអ៊ុយក្រែន ធ្វើឲ្យប្រជាជនស៊ីវីលអ៊ុយក្រែន ត្រូវស្លាប់ ត្រូវរបួស ត្រូវភៀសខ្លួន ហើយបានថែមទាំងចាប់កេណ្ឌកុមារអ៊ុយក្រែនយកទៅថែមទៀត។
ប្រធានក្រុមចារកិច្ចអង់គ្លេស MI6 បន្តថា ប្រជាជនរុស្ស៊ី បានឃើញនឹងភ្នែក នូវភាពអមនុស្សធម៌ គ្មានមនសិការជាមនុស្ស ក៏ដូចជាភាពអសមត្ថភាព នៃមេដឹកនាំរបស់រុស្ស៊ី។ តែប្រជាជនរុស្ស៊ី ត្រូវស្ថិតនៅចំពោះមុខជម្រើសដ៏គ្រោះថ្នាក់បំផុត មិនអាចធ្វើអ្វីបានដើម្បីគោរពមនសិការរបស់ខ្លួន។ ពោលគឺមិនខុសពីកាលពីជំនាន់ ឆ្នាំ១៩៦៨ នៅពេលដែលកងទ័ពសូវៀត បានលើកទ័ពចូលវាយបង្ក្រាបចលនាបដិវត្តន៍ នៅទីក្រុងប្រាហ្ក នោះទេ។
ក្នុងន័យនេះ ក្នុងនាមជាប្រធានទីភ្នាក់ងារចារកិច្ចក្រៅប្រទេសរបស់អង់គ្លេស បានអំពាវនាវ ហៅឲ្យប្រជាជនរុស្ស៊ីទាំងអស់ ងាកមកចូលរួមបម្រើចារកម្មអង់គ្លេស។ ចារបុរសរូបនេះ អះអាងថា ១៨ខែមកនេះ មានជនជាតិរុស្ស៊ីច្រើននាក់ហើយដែលបានចូលរួមហើយលោកសូមហៅមនុស្សថ្មីបន្ថែមទៀត ព្រោះថាទ្វារនៅតែបើកចំហជានិច្ច។ បើតាមការធានារបស់លោក Richard Moor គឺការចូលបម្រើទីភ្នាក់ងារចារកិច្ចអង់គ្លេស នឹងត្រូវធ្វើដោយសម្ងាត់ និងដោយគោរពវិជ្ជាជីវៈបំផុត។ ទីភ្នាក់ងារចារកិច្ចអង់គ្លេស មានទំនួលខុសត្រូវខ្ពស់ និងធានាការពារសុវត្ថិភាពភ្នាក់ងារនីមួយរបស់ខ្លួន យ៉ាងម៉ដ្ឋចត់។
ជាមួយគ្នានេះដែរ លោក Richard Moor បានទទួលស្គាល់ថា បច្ចុប្បន្ននេះ បច្ចេកវិទ្យាបញ្ញាសិប្បនិម្មិត បានដើរតួនាទីកាន់តែចាំបាច់ នៅក្នុងសកម្មភាពការងារចារកម្ម។ លោកបញ្ជាក់ថា MI6 ក៏ប្រើបច្ចេកវិទ្យាបញ្ញាសិប្បនិម្មិត នៅក្នុងបេសកកម្មការងារ ទាក់ទិននឹង ចិន ដែរ។ តែទន្ទឹមគ្នានេះ លោកបានធានា អង់គ្លេសនិងប្រទេសសម្ព័ន្ធមិត្ត មានឆន្ទៈ ប្រើប្រាស់បច្ចេកវិទ្យានេះ ប្រកបដោយមនសិការ និងការទទួលខុសត្រូវបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ