សោកនាដកម្មថ្មីរបស់ជនអន្តោប្រវេសន៍ឆ្លងសមុទ្ទពីបារាំងទៅអង់គ្លេស
ទោះជាមានគ្រោះថ្នាក់យ៉ាងណា ក៏ជនអន្តោប្រវេសន៍មិនខ្លាចនឹងប្រថុយជីវិតដែរ។ នៅថ្ងៃសៅរ៍ទី ១២សីហាម្សិលមិញ មានស្លាប់យ៉ាងហោចណាស់ជនអន្តោប្រវេសន៍អាហ្វហ្កានីស្ថាន៦នាក់ ដែលប៉ុនប៉ងឆ្លងសមុទ្ទពីបារាំងទៅអង់គ្លេស និងយ៉ាងហោចម្នាក់ឬក៏ពីរនាក់ផ្សេងទៀតបាត់ខ្លួន ក្នុងគ្រោះលិចទូកពោង។ រដ្ឋាភិបាលបារាំងបានចង្អុលមុខក្រុមជួញអន្តោប្រវេសន៍ថាជាឧក្រិដ្ឋជននាំមនុស្សទៅស្លាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
ទូកពោងទំនងផ្ទុកមនុស្សហួសចំណុះ ប្រមាណ៦៥ទៅ៦៦នាក់ ភាគច្រើនជាជនជាតិអាហ្វហ្កានីស្ថាន និងស៊ូដង់ពីរបីនាក់ ក្មេងមិនទាន់វ័យពីរបីនាក់ដែរ និងបានធ្លាយលិចនៅក្នុងសមុទ្ទManche ខណ្ឌចែកបារាំងនិងអង់គ្លេស នៅថ្ងៃសៅរ៍ម្សិលមិញ។ ក្រុមអ្នកសង្គ្រោះស្រង់បានអន្តោប្រវេសន៍ប្រហែល៥៨-៥៩នាក់ (៣៦នាក់ខាងបារាំងនិង២២នាក់ខាងអង់គ្លេស)ឱ្យរួចជីវិត និងបន្តស្វែងរកជនបាត់ខ្លួនម្នាក់ឬពីរនាក់ទៀតរហូតដល់យប់ជ្រៅ។
នៅចំពោះមុខក្រុមអ្នកសង្គ្រោះ រដ្ឋលេខាធិការទទួលបន្ទុកកិច្ចការសមុទ្ទបារាំង លោក Hervé Berville ដែលចុះទៅពិនិត្យស្ថានការណ៍ផ្ទាល់នឹងកន្លែង បានទម្លាក់ទំនួលខុសត្រូវលើពួកឧក្រិដ្ឋជនរកស៊ីចម្លងអន្តោប្រវេសន៍ថាបានបញ្ជូនមនុស្សឱ្យទៅស្លាប់ និងបានសន្យាប្រយុទ្ធប្រឆាំងនឹងបណ្តាញនេះឱ្យខ្ទេច។ ចំណែកលោកស្រីនាយករដ្ឋមន្ត្រីបារាំង បានផ្ញើសារចែករំលែកការក្រៀមក្រំជាមួយជនរងគ្រោះ។ ប៉ុន្តែសម្រាប់សមាគមជួយជនអន្តរប្រវេសន៍ សោកនាដកម្មក្នុងសមុទ្ទនេះបណ្តាលមកពីគំនាបនិងវិធានការប្រយុទ្ធប្រឆាំងការជួញដូរអន្តោប្រវេសន៍តឹងតែងពេកដែលជំរុញឱ្យពួកគេត្រូវប្រថុយនឹងគ្រោះថ្នាក់កាន់តែខ្លាំង។
តាំងពីថ្ងៃពុធសប្តាហ៍នេះមក ដោយមេឃចាប់ផ្តើមស្រលះល្អ សកម្មភាពប៉ុនប៉ងឆ្លងសមុទ្ទបានកើនឡើងយ៉ាងខ្លាំង។ ឡុងដ៍បានរាប់ឃើញមានអន្តោប្រវេសន៍៧៥៥នាក់បានឆ្លងតាមទូកទៅដល់អង់គ្លេស ក្នុងមួយថ្ងៃព្រហស្បតិ៍ទី ១០សីហា ពោលជាចំនួនច្រើនបំផុតប្រចាំថ្ងៃគិតចាប់តាំងពីដើមឆ្នាំ២០២៣មក និង៣៣០០នាក់ សម្រាប់តែមួយខែកក្កដា២០២៣។ ២០២២ជាឆ្នាំមានអន្តោប្រវេសន៍ឆ្លងដល់អង់គ្លេសច្រើនជាងគេបំផុត គឺដល់ទៅ ៤៥០០០នាក់។ គ្រោះលិចទូកដែលមានមនុស្សស្លាប់បាត់បង់ជីវិតច្រើនជាងគេ គឺនៅខែវិច្ឆិកា២០២១ ដែលជំរុញឱ្យបារាំងនិងអង់គ្លេសមើលមុខគ្នាស្ទើរមិនចំកាលណោះ។
បើតាមតួលេខរបស់ទីភ្នាក់ងារសារព័ត៌មានបារាំង មានអន្តោប្រវេសន៍ជាង១០ម៉ឺននាក់បានឆ្លងសមុទ្ទManche ដោយប្រើទូកពោងដែលក្លាយជាមធ្យោបាយដ៏ពេញនិយមរបស់ឈ្មួញអន្តោប្រវេសន៍តាំងពីឆ្នាំ២០១៨។ គ្រោះលិចទូកស្លាប់មិនបានបង្អាក់ឆន្ទៈរបស់ជនអន្តោប្រវេសន៍ដែលចង់ស្វែងរកអនាគតនៅអង់គ្លេសទេ។ បើតាមអាជ្ញាធរ បច្ចុប្បន្ននេះមានជនអន្តោប្រវេសន៍ប្រមាណ១ពាន់នាក់កំពុងរង់ចាំរត់ឆ្លងសមុទ្ទនៅភាគខាងជើងប្រទេសបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ