ឡុងដ៍អំពាវនាវសុំកិច្ចសហការពីបារាំងប្រឆាំងនឹងឈ្មួញអន្តោប្រវេសន៍
ក្នុងខណៈដែលបារាំង កំពុងជួបប្រជុំបន្ទាន់ជាមួយអឺរ៉ុបស្តីពីបញ្ហាអន្តោប្រវេសន៍ ដោយមិនឱ្យភាគីអង់គ្លេសចូលរួម ឡុងដ៍បានប្រកាសអំពាវនាវជាថ្មី សុំកិច្ចសហការពីបារាំង ក្នុងយុទ្ធនាការប្រយុទ្ធប្រឆាំងនឹងបណ្តាញជួញដូរអន្តោប្រវេសន៍ឆ្លងសមុទ្ទManche។ អង់គ្លេសកំពុងស្វះស្វែងពន្លត់កំហឹងបារាំង ក្រោយពីនាយករដ្ឋមន្ត្រីអង់គ្លេសបង្ហោះសារលិខិតមិនសមរម្យ។
ចុះផ្សាយនៅថ្ងៃ៖
ស្តាប់ - ០២:១៩
“យើងត្រូវតែប្រឹងធ្វើគ្រប់យ៉ាងតាមដែលអាចធ្វើទៅបាន ដើម្បីកម្ចាត់គំរូសេដ្ឋកិច្ចជួញដូរមនុស្ស។ ហើយដើម្បីសម្រេចបំណង យើងត្រូវការកិច្ចសហប្រតិបត្តិការស្អិតល្មួតជាមួយមិត្តបារាំង”។ នេះជាសេចក្តីប្រកាសរបស់លោករដ្ឋមន្ត្រីក្រសួងសុខាភិបាលអង់គ្លេស នៅក្នុងកញ្ចក់ទូរទស្សន៍Sky news ដោយឆ្លៀតការពារលោកនាយករដ្ឋមន្ត្រីអង់គ្លេសថា នៅក្នុងលិខិតផ្ញើជូនប្រធានាធិបតីបារាំងជាសាធារណៈ លោកបូរីស ចនស៊ុន បានស្នើសុំបញ្ចេញសកម្មភាពរួមជាច្រើនជាមួយបារាំង មានអាទិ៍ការដាក់ពង្រាយកងកម្លាំងឆ្មាំការពារឆ្នេរត្រើយខាងបារាំង។
លោករដ្ឋមន្ត្រីបានអះអាងទៀតថា អង់គ្លេសមាននយោបាយច្បាស់លាស់ ចង់បញ្ឈប់មិនឱ្យមានទូកអន្តោប្រវេសន៍អាចមកតោងដល់ឆ្នេរអង់គ្លេសបាន។ អង់គ្លេសមិនអាចសម្រេចកម្មវត្ថុនេះ តែម្នាក់ឯងបានឡើយ គឺចាំបាច់ត្រូវតែមានកិច្ចសហការជាមួយបារាំង។
ក្រៅអំពីសេចក្តីថ្លែងការណ៍របស់រដ្ឋមន្ត្រីក្រសួងសុខាភិបាល រដ្ឋមន្ត្រីក្រសួងមហាផ្ទៃអង់គ្លេស លោកស្រី Priti Patel ក៏អំពាវនាវសុំឱ្យមានកិច្ចសហប្រតិបត្តិការកាន់តែច្រើនឡើងជាមួយបារាំង។ ជាមួយនឹងការសោកស្តាយដែលមិនអាចមកចូលរួមប្រជុំជាមួយបារាំងនិងអឺរ៉ុប ស្តីពីវិបត្តិអន្តោប្រវេសន៍បាន លោកស្រីរដ្ឋមន្ត្រីក្រសួងមហាផ្ទៃអង់គ្លេស បានរំលឹក នៅក្នុងទំព័រសារព័ត៌មានអង់គ្លេស The Sun ថា កិច្ចសហប្រតិបត្តិការរួមបារាំង-អង់គ្លេស កន្លងមកបានបញ្ចៀសសកម្មភាពឆ្លងសមុទ្ទតាមទូកបានជាង ២ម៉ឺនករណីក្នុងមួយឆ្នាំនេះ និងឈានដល់ការចាប់ខ្លួនជាង៤០០ករណីលើសឆ្នាំ ២០២០។ អង់គ្លេសនឹងកោះប្រជុំបន្ទាន់មួយដែរ ជាមួយសមភាគីអឺរ៉ុបនៅសប្តាហ៍ក្រោយ ដើម្បីបញ្ចៀសកុំឱ្យមានសោកនាដកម្មថ្មីទៀតកើតឡើងនៅច្រកសមុទ្ទManche ដូចសោកនាដកម្មស្លាប់ជនអន្តោប្រវេសន៍២៧នាក់កាលពីថ្ងៃពុធទី ២៤វិច្ឆិកា២០២១ទៀត។
សូមបញ្ជាក់ថា ទំនាក់ទំនងតានតឹងនិងធ្លាក់ដុនដាបខ្លាំងរវាងបារាំងនិងអង់គ្លេស មិនមែនដោយហេតុតែបញ្ហាអន្តោប្រវេសន៍មួយនេះទេ។ ទំនាក់ទំនងបារាំងអង់គ្លេសមានភាពស្មុគស្មាញតាំងពីដើមមក ជាមិត្តផង ជាដៃគូផង និងជាគូប្រជែងគ្នាផង។ នៅពេលអង់គ្លេសបែកចេញពីសហភាពអឺរ៉ុប ប្រទេសទាំងពីរមានវិវាទនឹងគ្នាកាន់តែច្រើន ផ្តើមដោយជម្លោះក្នុងវិស័យនេសាទ។ បារាំងបាត់បង់ទំនុកចិត្តកាន់តែខ្លាំងទៀត នៅពេលប៉ារីសរកឃើញថាអាមេរិក អង់គ្លេស និងអូស្ត្រាលី លួចចរចាគ្នាបង្កើតកិច្ចព្រមព្រៀងជាដៃគូយុទ្ធសាស្ត្រដោយស្ងាត់ៗ រហូតធ្វើឱ្យបារាំងរបូតកិច្ចសន្យាលក់នាវាមុជទឹកទៅឱ្យអូស្ត្រាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ