WHO បានស្នើឲ្យចិនបើកផ្លូវឲ្យធំសម្រាប់ក្រុមអ្នកជំនាញដើម្បីស្វែងរកប្រភពដើមកូវីដ១៩
លោកទេដ្រូស ប្រមុខអង្គការសុខភាពពិភពលោកបានថ្លែងក្នុងថ្ងៃអាទិត្យ ទី១៧ កញ្ញាថា លោកត្រៀមខ្លួនរួចហើយដើម្បីបញ្ជូនក្រុមអ្នកជំនាញទៅបំពេញបេសកកម្មថ្មីនៅក្នុងប្រទេសចិន។ គោលដៅ គឺដើម្បីស្វែងរកអត្តសញ្ញាណពិត និងប្រភពចម្លងរបស់វីរុសកូវីដ១៩។ លោកទេដ្រូសបានលើកឡើងយ៉ាងដូចនេះនៅក្នុងបទសម្ភាសមួយឲ្យកាសែតអង់គ្លេស Financial Times។
ចុះផ្សាយនៅថ្ងៃ៖
ស្តាប់ - ០៣:១០
« យើងជំរុញឱ្យប្រទេសចិនផ្តល់សិទ្ធិពេញលេញដល់ក្រុមអ្នកជំនាញ និងស្នើឱ្យប្រទេសនានាលើកបញ្ហានេះទៅនិយាយជាមួយចិននៅក្នុងកិច្ចប្រជុំទ្វេភាគីចិនដើម្បីលើកទឹកចិនឲ្យចូលរួម » នេះជាការលើកឡើងរបស់ប្រមុខអង្គការសុខភាពពិភពលោក WHO នៅក្នុងបទសម្ភាសន៍ជាមួយកាសែតអង់គ្លេស Financial Times។ អ្វីដែលប្រមុខអង្គការសុខភាពពិភពលោកចង់បាន គឺបញ្ជូនក្រុមអ្នកជំនាញអន្តរជាតិទៅកាន់ចិនជាថ្មីដើម្បីស្វែងរកអត្តសញ្ញាណពិត និងប្រភពចម្លងរបស់មេរោគកូវីដ១៩។ តាមកាសែតអង់គ្លេស Financial Times ដដែល លោកទេដ្រូសបានដាក់សំណើនេះទៅចិនជាលាយលក្ខណ៍អក្សរ និងថា លោកបានត្រៀមខ្លួនរួចហើយដើម្បីបញ្ជូនក្រុមអ្នកជំនាញទៅចិន បើចិនអនុញ្ញាត។
គួរបញ្ជាក់ថា ជាង ៣ឆ្នាំក្រោយការផ្ទុះជំងឺកូវីដ១៩ អាថ៌កំបាំងជុំវិញជំងឺឆ្លងសកលមួយនេះកំពុងមានដោយគេនៅមិនទាន់ដឹងពីអត្តសញ្ញាណពិត និងប្រភពចម្លងរបស់វានៅឡើយទេ។ មានការលើកឡើងនូវសម្មតិកម្មចំនួនពីរមកដល់សព្វថ្ងៃ ទី១ មេរោគកូវីដ១៩បានធ្លាយចេញពីមន្ទីរពិសោធន៍ចិនក្នុងក្រុងវូហាន រួចឆ្លងទៅមនុស្ស និងទី២ មេរោគកូវីដ១៩ បានឆ្លងចេញពីសត្វប្រចៀវទៅសត្វមួយទៀត រួចបន្តឆ្លងទៅមនុស្សនៅក្នុងផ្សារលក់សត្វព្រៃមួយក្នុងក្រុងវូហាន។ កាលពីដើមឆ្នាំ ២០២១ ក្រុមអ្នកជំនាញរបស់ WHO បានទៅចិនម្តងហើយដើម្បីធ្វើការស៊ើបអង្កេតជាមួយក្រុមអ្នកជំនាញចិនក្នុងរឿងជំងឺកូវីដ១៩ នេះ។
នៅក្នុងរបាយការណ៍រួមមួយកាលណោះ ពួកគេបានផ្តោតលើសម្មតិកម្មដែលថា មានសត្វមួយបានដើរតួនាទីជាអ្នកចម្លងមេរោគកូវីដ១៩ពីសត្វប្រចៀវទៅមនុស្ស។ តែប្រមុខ WHO លោកទេដ្រូសបានបញ្ជាក់កាលណោះថា គេមិនអាចទាត់ចោលសម្មតិកម្មណាមួយទេ ក្នុងនោះក៏មានរឿងមេរោគកូវីដ១៩ ធ្លាយចេញពីមន្ទីរពិសោធន៍ចិនក្នុងក្រុងវូហានមួយដែរ។ លោកទេដ្រូសធ្លាប់បានបញ្ជាក់ច្រើនដងនាពេលកន្លងមកថា WHO នឹងមិនបោះបង់ចោលការស្រាវជ្រាវរបស់ខ្លួនទេ និងបានអំពាវនាវច្រើនដងឲ្យចិនមានតម្លាភាពនៅក្នុងការស៊ើបអង្កេត និងការចែករំលែកទិន្នន័យស្តីពីជំងឺកូវីដ១៩។
ពិតណាស់សព្វថ្ងៃ និងដោយមានថ្នាំវ៉ាក់សាំងបង្ការ រួមទាំងថ្នាំព្យាបាល ពិភពលោកអាចគ្រប់គ្រងជំងឺឆ្លងសកលមួយនេះបាន។ តែក្នុងពេលជាមួយគ្នា និងចំពេលរដូវស្លឹកឈើជ្រុះរំកិលចូលមក អត្រានៃការឆ្លងកំពុងកើនឡើងជាថ្មីនៅតំបន់ប៉ែកខាងជើង រួមទាំងការលេចចេញនូវមេរោគបំប្លែងខ្លួនថ្មីៗទៀត។ នេះ ស បញ្ជាក់ឲ្យឃើញថា កូវីដ១៩ នៅបន្តវិលវិលដោយនៅមិនទាន់ទៅណាឆ្ងាយនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ