បន្ទាប់ពីបារាំង បែលហ្ស៊ិកប្រកាសអាសន្នភេរវនិយមក្រោយការបាញ់សម្លាប់មនុស្ស២នាក់
តាមប្រមាញ់ពេញយប់ថ្ងៃចន្ទ ប៉ូលិសបែលហ្ស៊ិកបាញ់សម្លាប់ នៅព្រឹកថ្ងៃអង្គារ ជនសង្ស័យម្នាក់ដែលបានបាញ់រះសម្លាប់មនុស្ស២នាក់ ដែលអ្នកគាំទ្រកីឡាបាល់ទាត់ ស៊ុយអែត កាលពីថ្ងៃយប់ថ្ងៃចន្ទទី ១៦តុលា។ តាមនាយករដ្ឋមន្រ្តីបែលហ្ស៊ិក ជនសង្ស័យបាញ់សម្លាប់ជនជាតិស៊ុយអែត កាលពីថ្ងៃចន្ទ មានសញ្ជាតិទុយនីស៊ី រស់នៅខុសច្បាប់ ក្នុងប៊ែលហ្សិក និងត្រូវប៉ូលិស តាមដានក្នុងនាមជាអ្នកជួញដូរមនុស្សខុសច្បាប់ ប៉ុន្តែមិនស្ថិតក្នុងបញ្ជីក្រុមជ្រុលនិយម របស់ប៉ូលិសបែលហ្ស៊ិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១០
បន្ទាប់ពីតាមប្រមាញ់ចាប់ពេញមួយយប់ ប៉ូលិសបែលហ្ស៊ិកបាញ់សម្លាប់ជនសង្ស័យ ដែលបានបាញ់សម្លាប់អ្នកគាំទ្រកីឡាបាល់ទាត់ ស៊ុយអែត នៅទីក្រុងព្រុយស៊ែល កាលពីយប់ថ្ងៃចន្ទម្សិលមិញ។ តាមរាជអាជ្ញាប៊ែលហ្សិក នៅក្នុងពេលបាញ់តដៃជាមួយប៉ូលិស ដែលចូលឡោមព័ទ្ធអគារមួយនៅភាគខាងជើងទីក្រុងព្រុចស៊ែល នៅព្រឹកថ្ងៃអង្គារនេះ ជនសង្ស័យត្រូវគ្រាប់កាំភ្លើង និងស្លាប់ដោយសារមុខរបួស។ រដ្ឋមន្រ្តីក្រសួងមហាផ្ទៃបែលហ្ស៊ិកបានបញ្ជាក់ថា កាំភ្លើងដែលគេរកឃើញនៅជាប់ខ្លួនជនសង្ស័យ ដូចគ្នានឹងអាវុធដែលគេប្រើបាញ់សម្លាប់មនុស្សកាលពីយប់ថ្ងៃចន្ទ និងថា គេកំណត់បានអត្តសញ្ញាណរបស់ជនដៃដល់។
តាមរដ្ឋមន្រ្តីយុត្តិធម៌ ជនសង្ស័យដែលបានបាញ់សម្លាប់ជនជាតិស៊ុយអែត ពីរនាក់ និងធ្វើឲ្យរបួសធ្ងន់ អ្នកបើកឡានតាក់ស៊ីម្នាក់ មានសញ្ជាតិទុយនីស៊ី អាយុ ៤៥ឆ្នាំ និងកំពុងរស់នៅខុសច្បាប់ក្នុងប្រទេសប៊ែលហ្សិក។ តាមអាជ្ញាធរប៊ែលហ្សិកដដែល ជនសង្ស័យធ្លាប់ជាប់ក្នុងបញ្ជីរបស់ប៉ូលិស ក្នុងរឿងជួញដូរមនុស្សខុសច្បាប់ក្នុងទឹកដីបែលហ្ស៊ិក ប៉ុន្តែ មិនស្ថិតក្នុងបញ្ជីក្រុមជ្រុលនិយម ដែលទាមទារការតាមដានពិសេសពីសំណាក់ក្រុមប្រយុទ្ធប្រឆាំងអំពើភេរវនិយម។
នៅក្រោយហេតុការណ៍បាញ់សម្លាប់ កាលពីយប់ថ្ងៃចន្ទ នាយករដ្ឋមន្រ្តីបែលហ្ស៊ិក លោកAlexandre de Croo ថ្កោលទោស ចាត់ទុក ការបាញ់សម្លាប់មនុស្ស ថា ជាអំពើភេរវកម្មដ៏ឆ្កួតលីលា និងបានប្រកាសដាក់ប្រទេសក្នុងស្ថានភាពអាសន្នភេរវនិយម។ សាលារៀនជាច្រើននៅក្នុងទីក្រុងព្រុចស៊ែលត្រូវបិទទ្វារ ពេញមួយថ្ងៃអង្គារ។
បើតាមរាជអាជ្ញា ដោយយោងទៅលើវីដេអូរបស់ជនដៃដៃល់ ដែលរូបគេផ្ទាល់ បង្ហោះផ្សាយ នៅលើបណ្តាញសង្គម នៅក្រោយការបាញ់សម្លាប់ នៅយប់ថ្ងៃចន្ទ ជនជាតិស៊ុយអែតគឺជាផ្ទាំងស៊ីបនៃការវាយប្រហារ។ នៅក្នុងវីដេអូ ជនដៃដល់អះអាងថា ខ្លួនដើរតាមក្រុមជីហាតអង្គការរដ្ឋអ៊ីស្លាម ក្រុមជីហាតជ្រុលនិយម ដោយបានសម្លាប់ជនជាតិស៊ុយអែត៣នាក់។ នៅក្នុងខែ្សវីដេអូមួយទៀតដែលបង្ហោះមុន ការវាយប្រហារ ជនដៃដល់ដែលពាក់មុខបិទជិត បាននិយាយថា គម្ពីកូរ៉ាន របស់ព្រះអាឡា ជាបន្ទាត់ក្រហម។
មានរូបភាពធ្លាក់ចុះអាក្រក់ នៅក្នុងពិភពអ្នកកាន់សាសនាអ៊ីស្លាម ស៊ុយអ៊ែតបានប្រកាសដាក់ប្រទេសក្នុងស្ថានភាពអាសន្ន ភេរវនិយម តាំងពីខែ សីហា បន្ទាប់ពី គម្ពីកូរ៉ានត្រូវគេដុតនៅក្នុងបាតុកម្មជាច្រើនដងនៅក្នុងទឹកដីស៊ុយអែត។
ការបាញ់រះសម្លាប់ជនជាតិស៊ុយអែត ក្នុងទីក្រុងព្រុចស៊ែល នៅយប់ថ្ងៃចន្ទ កើតឡើងនៅប៉ុន្មាននាទីមុន ការប្រកួតជម្រុះកីឡាបាល់ទាត់អឺរ៉ុប ឆ្នាំ ២០២៤។ ហេតុការណ៍បាញ់សម្លាប់មនុស្ស បានបណ្តាលឲ្យការប្រកួតរវាងក្រុមប៊ែលហ្សិក និងស៊ុយអែតត្រូវផ្អាកពាក់កណ្តាលទី ចំណែកអ្នកចូលមើលជាង ៣ម៉ឺននាក់ ត្រូវរង់ចាំជាច្រើនម៉ោងនៅក្នុងស្តាត ដើម្បីសុវត្ថិភាព។
សូមបញ្ជាក់ដែរ ហេតុការណ៍បាញ់សម្លាប់មនុស្ស នៅប៊ែលហ្សិក កើតឡើងនៅតែ ៤ថ្ងៃក្រោយ បារាំងរងការវាយប្រហារភេរវកម្មអ៊ីស្លាមជ្រុលនិយម បន្ទាប់ពី ជនជ្រុលនិយម ដើមឆេឆិន ចូលចាក់សម្លាប់គ្រូបង្រៀនម្នាក់ នៅសាលាភាគខាងជើងប្រទេសបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ