រដ្ឋមន្ត្រីការពារជាតិអាមេរិកធានាជួយគាំទ្រអ៊ុយក្រែនយូរអង្វែង
លោកឡូយដ៍អូស្ទីន រដ្ឋមន្ត្រីក្រសួងការពារជាតិអាមេរិកបានអញ្ជើញទៅដល់ក្រុងកៀវ នៅថ្ងៃចន្ទទី ២០វិច្ឆិកា២០២៣នេះ។ ជាទស្សនកិច្ចដែលមិនប្រាប់ឱ្យដឹងមុន និងក្នុងបំណងបញ្ជាក់អំពីការគាំទ្រឥតងាករេរបស់អាមេរិកចំពោះអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:២១
មិនជូនដំណឹងជាមុនក្រោមហេតុផលសុវត្ថិភាព ទស្សនកិច្ចជាលើកទីពីររបស់លោករដ្ឋមន្ត្រីក្រសួងការពារជាតិអាមេរិកឡូយដ៍អូស្ទីននៅអ៊ុយក្រែនគិតចាប់តាំងពីរុស្ស៊ីចូលឈ្លានពានអ៊ុយក្រែនមក មានកម្មវត្ថុពង្រឹងជំហរគាំទ្រឥតងាករេរបស់អាមេរិកចំពោះការតស៊ូដើម្បីសេរីភាពរបស់អ៊ុយក្រែន។ អាមេរិកនឹងបន្តផ្គត់ផ្គង់ជំនួយយោធាតាមសេចក្តីត្រូវការរបស់អ៊ុយក្រែនសម្រាប់ការពារសន្តិសុខជាតិពីទង្វើឈ្លានពានរបស់រុស្ស៊ី។ នេះបើតាមសេចក្តីថ្លែងការណ៍របស់មន្ទីរបញ្ចកោណអាមេរិក។
ចេញដំណើរពីប៉ូឡូញតាមរថភ្លើង លោក ឡូយដ៍ អូស្ទីន បានទៅដល់ក្រុងកៀវ នៅព្រឹកថ្ងៃចន្ទទី២០វិច្ឆិកានេះ។ ក្រៅពីជួបពិភាក្សាជាមួយលោករ៉ូស្តឹម អ៊ូមេរ៉ូហ្វ រដ្ឋមន្ត្រីការពារជាតិអ៊ុយក្រែន និងមេបញ្ជាការកងទ័ពអ៊ុយក្រែនលោកវ៉ាឡេរី ហ្សាឡូនី លោកអូស្ទីនក៏បានចូលជួបប្រធានាធិបតីអ៊ុយក្រែន ហ្សេឡេនស្គីទៀត។ “ជាទស្សនកិច្ចដ៏សំខាន់” នេះជាប្រសាសន៍របស់លោកហ្សេឡេនស្គីទៅកាន់លោកអូស្ទីនដែលធានាថាការគាំទ្រអាមេរិកនឹងជាជំនួយយូរអង្វែង។
តាំងផ្ទុះសង្គ្រាមភ្លាម អាមេរិកជាអ្នកផ្តល់ជំនួយយោធាដល់អ៊ុយក្រែនដ៏ច្រើនជាងគេ ក្នុងទំហំដល់ទៅរាប់សិបពាន់លានដុល្លារ និងសន្យាហើយសន្យាទៀតថាទោះត្រូវបើពេលយូរយ៉ាងក៏ដោយ ក៏អាមេរិកនឹងជួយអ៊ុយក្រែនជារៀងរហូតទៅ។ ប៉ុន្តែពាក្យសន្យាត្រូវរួញលិបដោយចរន្តប្រឆាំងកាន់តែច្រើនឡើងៗក្នុងចង្កោមសមាជិកសភាបក្សសាធារណរដ្ឋ ដែលមានសំឡេងភាគច្រើននៅក្នុងសភា និងដោយសង្គ្រាមអ៊ីស្រាអែល-ហាម៉ាសផង។ កាលពីថ្ងៃព្រហស្បតិ៍ លោកហ្សេឡេនស្គីបានទទួលស្គាល់ថា សង្គ្រាមអ៊ីស្រាអែលនិងហាម៉ាសបានពង្វាងចំណាប់អារម្មណ៍ចេញពីអ៊ុយក្រែន និងពន្យឺតការដឹកជញ្ជូនអាវុធនិងគ្រាប់កាំភ្លើងធំសម្រាប់យោធាអ៊ុយក្រែនខ្លាំងណាស់។
សម្រាប់លោករដ្ឋមន្ត្រីក្រសួងការពារជាតិអាមេរិក ក៏ដូចជាលោកប្រមុខការទូត គ្មានជំនួយអាមេរិក រុស្ស៊ីរបស់លោកពូទីននឹងឈ្នះ។ ជំនួយយោធាសម្រាប់អ៊ុយក្រែនកាន់តែចាំបាច់ខ្លាំងទៀតសម្រាប់ពេលនេះ ព្រោះយុទ្ធនាការវាយបកដណ្តើមយកទឹកដីមកវិញកាលពីរដូវក្តៅមិនបានជោគជ័យ ហើយរុស្ស៊ីទំនងកំពុងរៀបផែនការវាយប្រហារបកលើអ៊ុយក្រែនជាថ្មីនារដូវរងារនេះផង។ ជាក់ស្តែង នៅថ្ងៃចន្ទនេះ ស្ថានភាពកំពុងតានតឹងយ៉ាងខ្លាំង។ ឃែរសុន ក្រុងធំប្រចាំភាគខាងត្បូងអ៊ុយក្រែនដែលយោធារុស្ស៊ីបាញ់ប្រហារស្ទើរជារៀងរាល់ថ្ងៃ បានរងគ្រាប់ផ្លោងស្លាប់មនុស្សយ៉ាងហោចពីរនាក់ និងរបួសជាច្រើននាក់។ នៅភាគខាងកើត ក្នុងតំបន់ដូណេស្កត៍ទាហានរុស្ស៊ីកំពុងប៉ុនប៉ងឡោមព័ទ្ធយកមជ្ឈមណ្ឌលឧស្សាហកម្មAvdiïvka៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ