អាកាសធាតុ៖ រងសម្ពាធមកពីតំបន់ប៉ូល អឺរ៉ុបធ្លាក់ត្រជាក់ខ្លាំងមិនធ្លាប់មាន
រលកខ្យល់ត្រជាក់ខ្លាំងជាធម្មតានៃតំបន់ប៉ូល កំពុងរាលដាលមកដល់អឺរ៉ុប។ ជាបាតុភូតធម្មជាតិ ដ៏កម្រ ដែលធ្វើឱ្យសីតុណ្ហភាពធ្លាក់ចុះជាគំហុក និងត្រជាក់ក្រោមដល់ក្រោមសូន្យស្ទើរពេញអឺរ៉ុប។ សីតុណ្ហភាពចុះត្រជាក់ខ្លាំងបំផុតនៅថ្ងៃអង្គារស្អែក នៅប្រទេសបារាំង។ តើរលកខ្យល់ត្រជាក់នេះមានពាក់ព័ន្ធនឹងការប្រែប្រួលអាកាសធាតុដែរឬទេ?
ចុះផ្សាយនៅថ្ងៃ៖
ស្តាប់ - ០២:៣៩
ជាបាតុភូតដ៏កម្រមែន តែជាបាតុភូតធម្មជាតិពិតៗ។ ជារៀងរាល់រដូវរងារ សីតុណ្ហភាពចុះត្រជាក់ខ្លាំងនៅតំបន់ប៉ូល ហើយបង្កើតជាចរន្តត្រជាក់នៅរយៈកម្ពស់៣០គីឡូម៉ែត្រដែលគេហៅថាខ្យល់ត្រជាក់នៃតំបន់ប៉ូល។ ប៉ុន្តែយូរៗម្តង ខ្យល់ក្តៅបានមកចោះរំខានចរន្តខ្យល់ប៉ូល ច្រានភាពត្រជាក់ឱ្យរាលធ្លាក់មកដល់តំបន់ខ្សែស្របក្រោមៗ ពោលគឺវានឹងធ្វើមានរលកសីតុណ្ហភាពត្រជាក់ខ្លាំងខុសប្រក្រតីនៅអឺរ៉ុប។
ជាឧទាហរណ៍ជាក់ស្តែង ដោយសារបាតុភូតក៏កម្រនេះ សីតុណ្ហភាពនៅប្រទេសស៊ុយអែត បានធ្លាក់ដល់-៤៣,៦អង្សា ក្រោមសូន្យ។ នេះជាលើកទីមួយហើយគិតចាប់តាំងពី២៥ឆ្នាំមកដែលអឺរ៉ុបខាងជើង (ស៊ុយអែត ន័រវែល ដាណឺម៉ាក) ជួបសីតុណ្ហភាពទាបខ្លាំងដូច្នេះ។ ភាពត្រជាក់អមដោយការធ្លាក់ព្រិល ទឹកកកសំឡីយ៉ាងសម្បូរបែប បានរំខានសកម្មភាពរស់នៅប្រចាំថ្ងៃយ៉ាងខ្លាំង ដូចជារថភ្លើងរអាក់រអួលយឺតយ៉ាវ លុបជើងយន្តហោះជាច្រើន បណ្តាញទុយយោទឹកស្អាតត្រូវកក ឬស្ទះចរាចរណ៍ខ្លាំង។
រលកត្រជាក់ជាបាតុភូតធម្មតារបស់តំបន់អឺរ៉ុបទេ និងជាផលវិជ្ជមានសម្រាប់ប្រព័ន្ធរុក្ខជាតិ ប៉ុន្តែអ្វីដែលខុសប្រក្រតីគឺភាពមិនត្រជាក់ និងការប្តូរផ្លាស់សីតុណ្ហភាពក្តៅត្រជាក់ឡើងចុះដ៏លឿនរហ័សជ្រុល។ ពី១០អង្សា ទៅដប់អង្សាក្រោមសូន្យ ក្នុងពេលតែប៉ុន្មានថ្ងៃ។
ថ្វីបើអឺរ៉ុបខាងជើង ឬអឺរ៉ុបទាំងមូលកំពុងរងរលកត្រជាក់សីតុណ្ហភាពចង្អុលក្រោមសូន្យស្ទើរគ្រប់ទិសទីពេលនេះមែន ប៉ុន្តែគេមិនភ្លេចទេថាសីតុណ្ហភាពតំបន់អឺរ៉ុបនិងតំបន់ប៉ូលខាងជើងនិងខាងត្បូង ឡើងកម្តៅលឿនជាងតំបន់ណាៗទាំងអស់។ សីតុណ្ហភាពនឹងឡើងខ្ពស់វិញនៅសប្តាហ៍ក្រោយ ខ្ពស់លើសូន្យអង្សាផងនៅតំបន់អាកទិក។ សីតុណ្ហភាពគ្មានស្ថិរភាព ឡើងចុះកាន់តែខ្លាំង កាន់តែញឹក ចុះត្រជាក់ដល់កកមួយភ្លែតរួចឡើងក្តៅភ្លាម បានធ្វើរចនាសម្ព័ន្ធផ្លូវថ្នល់ ទឹកស្អាត... រងសម្ពាធយ៉ាងខ្លាំង។ សម្រាប់ផែនដីវិញ ការឡើងចុះៗម្តងត្រជាក់ម្តងក្តៅជុំវិញសីតុណ្ហភាពសូន្យអង្សា នឹងធ្វើឱ្យស្រទាប់ដីលែងសូវហាប់ ដើមឈើលែងរឹងមាំដោយរង្គើឫស និងងាយមានការបាក់ដីស្រុត នៅពេលមានភ្លៀងខ្លាំង។
កាន់តែគួរឱ្យព្រួយបារម្ភខ្លាំងទៀត គឺសីតុណ្ហភាពវិជ្ជមាននៅជុំវិញតំបន់ប៉ូលក្នុងរដូវរងារដែលប្រព័ន្ធអេកូសាស្ត្រធ្លាប់តែត្រជាក់ខ្លាំង។ អស្ថិរភាពសីតុណ្ហភាពនេះជាលក្ខណៈសម្គាល់នៃការប្រែប្រួលអាកាសធាតុនៅតំបន់ប៉ូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ